جەزقازعانداعى جاڭا نان زاۋىتىنىڭ قۇرىلىسى بىلتىرعى جىلدىڭ قىركۇيەك ايىندا باستالعان بولاتىن. «Ulytaý Nan» دەپ اتالعان كاسىپورىننىڭ الدىنا جەزقازعان, ساتباەۆ, قاراجال قالالارى مەن جايرەم كەنتى جانە ۇلىتاۋ اۋدانى تۇرعىندارىن ساپالى نان-توقاش ونىمدەرىمەن قامتاماسىز ەتۋ مىندەتى قويىلدى.
زاۋىتتىڭ الىپ جاتقان اۋماعى 2640 شارشى مەتردى قۇرايدى, قۋاتى تاۋلىگىنە 35 توننا نان-توقاش ونىمدەرىن وندىرۋگە جەتەدى دەپ جوسپارلانعان. بۇل جوبانى ىسكە اسىرۋعا 2 ملرد تەڭگەدەن استام ينۆەستيتسيا جۇمسالدى. جاڭا نان زاۋىتى ەلباسى نۇرسۇلتان ءابىش ۇلى نازارباەۆتىڭ ەكونوميكالىق ستراتەگياسىن, ء«تورتىنشى ونەركاسىپتىك دامۋ جاعدايىنداعى دامۋدىڭ جاڭا مۇمكىندىكتەرى» جولداۋىن, «تسيفرلى قازاقستان» كەشەندى باعدارلاماسىن جۇزەگە اسىرۋ ماقساتىندا سالىندى. زاۋىت حالىقارالىق ستاندارتتارعا, ءوندىرىستى تسيفرلاندىرۋ بويىنشا تالاپتارعا تولىق سايكەستەندىرىلگەن, ول تمد مەن ەۋروپا ەلدەرى اۋماعىنداعى زاماناۋي نان زاۋىتتارىنىڭ ءبىرى بولىپ تابىلادى.
بۇل كولەمدى دە سەرپىندى جوبانى نان ءپىسىرۋ ءوندىرىسىنىڭ ەڭ جاڭا تەحنولوگيالارىن قولدانا وتىرىپ, ءونىمنىڭ جوعارى ساپاسىن قامتاماسىز ەتۋدى ماقسات ەتكەن بىلىكتىلىگى جوعارى كاسىبي ماماندار جۇزەگە اسىردى. «Ulytaý Nan» نان زاۋىتى الدىڭعى قاتارلى ەۋروپا ەلدەرىندە شىعارىلعان ەنەرگيالىق ءتيىمدى, جوعارى تەحنولوگيالىق زاماناۋي قۇرالدارمەن جابدىقتالعان. يتاليانىڭ «ەچەر» كومپانياسىنان قامىر يلەيتىن ماشينالار, قامىر اشىتاتىن اۋدارعىشتار, ميكسەر, «مونديال فورني» كومپانياسىنان قامىر بولگىشتەر مەن قامىر دوڭگەلەكتەگىشتەر, تولىقسىتۋ شكافتارى, تاباندى جانە روتاتسيالى پەشتەر, «سارتوري» كومپانياسىنان توقاشتارعا ارنالعان بولگىشتەر مەن دوڭگەلەتكىشتەر, «دجەنەرال سيستەم پاك» كومپانياسىنان نان-توقاش ونىمدەرىن وراۋعا ارنالعان جابدىق, سلوۆاكيانىڭ «ا-ت» كومپانياسىنان قاپتاردا ساقتاۋعا, ۇندى تاسۋ مەن مولشەرلەۋگە, اشىتقى جاساۋعا ارنالعان جابدىق جيناقتارى, شۆەيتساريالىق «روندو» كومپانياسىنان كرۋاسسان تۇرىندەگى قاتتاما ونىمدەردى شىعارۋ ءۇشىن قامىر جايۋعا ارنالعان جابدىق ساتىپ الىندى. گەرمانيادان «حوبارت» كومپانياسىنان شىعارىلعان نان جاشىكتەرىن جۋعا ارنالعان ماشينا اكەلىندى. نان زاۋىتىنىڭ جوعارى تەحنولوگيالى جابدىقتارىن مونتاجداۋ جانە قالپىنا كەلتىرىپ رەتتەۋدى ەۋروپالىق ماماندار ىسكە اسىردى, سونداي-اق ولار كەلەشەكتە وسى قۇرىلعىلاردا قىزمەت كورسەتۋشى جەرگىلىكتى مامانداردان قۇرىلعان وندىرىستىك بريگاديرلەردى وقىتتى. نان زاۋىتىنىڭ وندىرىستىك قىزمەتىندە دۋالدى ءبىلىم بەرۋ جۇيەسى قولدانىلادى.
كاسىپورىندا 225 جاڭا, ونىڭ ىشىندە مۇمكىندىگى شەكتەۋلى ادامدارعا ارنالعان جۇمىس ورىندارى اشىلدى. قىزمەتشىلەردىڭ ەڭبەك جاعدايىن بارىنشا جاقسارتۋ جانە ولاردى الەۋمەتتىك پاكەتپەن قامتاماسىز ەتۋمەن قاتار, جالپى بەكىتىلگەن نورمالاردان تىس جۇمىس اۋىسىمى بارىسىندا تەگىن تاماقتاندىرۋ قاراستىرىلدى.
زاماناۋي تەحنولوگيالار مەن جابدىقتار, بىلىكتى پەرسونال ونىمدەردىڭ ەكولوگيالىق تازالىعىن, 50-دەن استام نان-توقاش ونىمدەرى تۇرلەرىنىڭ جوعارى ءدام ساپاسىن جانە تاعامدىق قۇندىلىعىن قامتاماسىز ەتەدى. تۇتىنۋشىلار ءۇشىن تۇتاس ءداندى سورتتاردان وندىرىلگەن قازاقستاندىق ۇننان جاسالعان جانە ءارتۇرلى داقىل داندەرى, كەبەك قوسىلعان ديەتالىق جانە باسقا دا نان سورتتارى شىعارىلادى.
جاڭا نان زاۋىتىنىڭ العاشقى ونىمدەرى بوبەكتەر ۇيىنە, جەزقازعان بالالار ۇيىنە, كامەلەتكە تولماعانداردى بەيىمدەۋ ورتالىعىنا, جاسوسپىرىمدەر ۇيىنە جانە قارتتار مەن مۇگەدەكتەر ۇيىنە جولدانادى. كاسىپورىن مەتاللۋرگتەردى, كەنشىلەردى جانە بايىتۋشىلاردى ساپالى ءارى پايدالى ونىممەن قامتاماسىز ەتۋ ءۇشىن وندىرىستىك اسحانالاردىڭ نان-توقاش ونىمدەرىن جەتكىزۋشى بولىپ تابىلادى. نان زاۋىتىنىڭ ساتۋ-وتكىزۋ بولىمىنە قازىرگى ۋاقىتتان باستاپ كاسىپكەرلەردەن, ءىرى سۋپەرماركەت جانە ساۋدا نۇكتەلەرى يەلەرىنەن كوپتەگەن سۇرانىستار ءتۇسىپ, تۇراقتى نەگىزدە ءونىمدى جەتكىزۋگە كەلىسىمشارتتار جاسالۋدا, ولاردى ءونىمنىڭ ساپاسى, سان الۋان تۇرلىلىگى مەن ارزان باعاسى قىزىقتىرادى. تۇتىنۋشىلارعا نان-توقاش ونىمدەرىن جەتكىزۋدى مەنشىكتەگى ساتىپ الىنعان جانە برەندتەلگەن اۆتوپارك ىسكە اسىرادى, سونىمەن قاتار جەزقازعان جانە ساتباەۆ قالالارىندا ءوز برەندىمەن «دوڭگەلەكتى دۇكەندەر» جۇمىس ىستەيتىن بولادى.
وسكەلەڭ ۇرپاق پەن ايماق تۇرعىندارىنىڭ بويىندا نانعا جانە ناۋبايشىلاردىڭ ەڭبەگىنە دەگەن قۇرمەتتى قالىپتاستىرۋ ءارى كاسىبي باعدارلاۋ جۇمىسىن جۇرگىزۋ ماقساتىندا كاسىپورىندا ەكسكۋرسيالىق ەستاكادا جۇمىس ىستەيتىن بولادى, وندا بارلىق تىلەك بىلدىرۋشىلەر نان-توقاش ونىمدەرىنىڭ ءوندىرىس تەحنولوگياسىمەن تانىسا الادى.
زاماناۋي جاڭا كاسىپورىن «Ulytaý Nan» نان زاۋىتى ايماقتا جاڭا جۇمىس ورىندارىنىڭ اشىلۋىنا, الدىڭعى قاتارلى يننوۆاتسيالىق تەحنولوگيالاردى ەنگىزۋ ارقىلى ادامي كاپيتالدى دامىتۋعا, سالىق سالۋ بازاسىن وسىرۋگە جاعداي تۋعىزا وتىرىپ, جاھاندىق دامۋ جاعدايىندا ەلىمىزدىڭ ەكونوميكاسىن كوتەرۋگە جانە ەلباسى نۇرسۇلتان ءابىش ۇلى نازارباەۆتىڭ قازاقستاننىڭ الەمنىڭ ەڭ دامىعان 30 مەملەكەتىنىڭ قاتارىنا كىرۋى جونىندەگى تاپسىرماسىن جۇزەگە اسىرۋعا مۇمكىندىك بەرەدى.
قايرات ءابىلدا,
«ەگەمەن قازاقستان»
قاراعاندى وبلىسى,
جەزقازعان قالاسى