پارلامەنت سەناتى قارجى جانە بيۋدجەت كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ جانە ساقتاندىرۋ قىزمەتى, باعالى قاعازدار نارىعى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.
زاڭ جوباسى قارجى-قاراجات سالاسىندا كورسەتىلەتىن قىزمەتتەر بويىنشا تۇتىنۋشىلار قۇقىقتارىن قورعاۋدىڭ ءتيىمدى تەتىكتەرىن قالىپتاستىرۋعا, قور نارىعىن دامىتۋعا جاعداي جاساۋعا, قولدانىستاعى زاڭنامانى جەتىلدىرۋگە جانە حالىقارالىق تاجىريبەگە سايكەس كەلتىرۋگە باعىتتالعان.
ونلاين ساقتاندىرۋدى ەنگىزۋ ەڭ ماڭىزدى جاڭالىقتاردىڭ ءبىرى بولىپ تابىلادى. ساقتاندىرۋ سالاسىن تسيفرلاندىرۋ حالىقتىڭ كەڭسەگە كەلمەي-اق, ساقتاندىرۋ كومپانيالارىنىڭ ينتەرنەت-رەسۋرستارى ارقىلى ەلەكتروندى تۇردە شارت جاساسۋعا مۇمكىندىك بەرەدى. كەلەشەكتە دەلدالداردىڭ بولماۋى ساقتاندىرۋ قۇنىن تومەندەتۋگە اكەلەدى.
شەتەلگە شىعاتىن قازاقستاندىق تۋريستەردى قورعاۋ ءۇشىن ولاردىڭ ساقتاندىرۋ كەستەلەرى وزگەرتىلەتىن بولادى. تۋريستەردىڭ م ۇلىك جونىندەگى مۇددەلەرىن مىندەتتى ساقتاندىرۋعا كوشىرۋ قاراستىرىلىپ وتىر. تۋروپەراتورلار تۋريستىك قىزمەتتى مىندەتتى ساقتاندىرۋ جونىندە شارت جاساسۋعا مىندەتتى, بۇل رەتتە ساقتاندىرۋ ۇيىمىن تاڭداۋ قۇقىعى ەسكەرىلەتىن بولادى. ساقتاندىرۋعا جاتاتىن وقيعالار بولعان جاعدايدا ساقتاندىرىلاتىن جاعدايلار مەن شىعىندار كولەمى انىقتالادى.
زاڭ جوباسىندا ساقتاندىرۋدىڭ جاڭا تۇرلەرىن – ساقتاندىرۋ جۇكتەمەسىن ەنگىزۋ قاراستىرىلعان. ساقتاندىرۋ ومبۋدسمەنىنىڭ وكىلەتتىكتەرى كەڭەيىپ كەلەدى. حالىق پەن بيزنەسكە ارنالعان ساقتاندىرۋ قىزمەتتەرىنىڭ قولجەتىمدىلىگى مەن قۇنىن تومەندەتۋدى قامتاماسىز ەتۋ ءۇشىن بىرقاتار شەكتەۋ شارالارى ەنگىزىلدى.
قۇجاتتا ساقتاندىرۋ تولەمدەرىنە كەپىلدىك بەرۋ قورىنا قوسىمشا كەپىلدىكتەر بەلگىلەندى. اۆتوكولىك يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋدىڭ اياسىندا ساقتاندىرىلعان وقيعالار سانىنا قاراماستان, ساقتاندىرۋ ءپوليسىن ءبىر جىل ىشىندە ۇزدىكسىز قولدانۋدى قامتاماسىز ەتۋ قاعيداسى ەتىلەدى. سونداي-اق, جابىرلەنۋشىنىڭ ءومىرى مەن دەنساۋلىعىنا كەلتىرىلگەن زيان ءۇشىن ساقتاندىرۋشىنىڭ جاۋاپكەرشىلىك اۋقىمى ۇلعايتىلدى. ودان باسقا, جوبادا قور نارىعىنىڭ ينفراقۇرىلىمىن جاقسارتۋعا باعىتتالعان ەرەجەلەر دە بار.
زاڭ جوباسى پالاتانىڭ قاراۋىنا جىبەرىلدى.