ەلباسى جولداۋىندا جاھاندىق باسەكەگە قابىلەتتىلىكتى ارتتىرۋ ماقساتىندا ازىرلەنگەن «تسيفرلى قازاقستان» مەملەكەتتىك باعدارلاماسى بويىنشا وڭىرلەردە كوپتەگەن جۇمىس اتقارىلۋدا. بۇل باعىتتا اقمولا وبلىسى ەسىل اۋداندىق ەمحاناسى ستاتسيونار بولىمدەرىنىڭ 95 پايىزى ەلەكتروندى قۇجات اينالىمىنا كوشىرىلدى.
مەملەكەت باسشىسى العا قويعان مىندەتتەردى جۇزەگە اسىرۋ ماقساتىندا دەنساۋلىق ساقتاۋ سالاسىن تسيفرلاندىرۋ ارقىلى كەشەندى مەديتسينالىق اقپاراتتاندىرۋ جۇيەسىن ىسكە قوسۋ, ءموبيلدى قوسىمشالار مەن قازاقستاندىقتاردى مىندەتتى مەديتسينالىق ساقتاندىرۋمەن ءوزارا تىعىز بايلانىستاعى ەلەكتروندى دەنساۋلىق پاسپورتىن پايدالانۋ, ەڭ باستىسى مەديتسينالىق كومەك ساپاسى مەن قولجەتىمدىلىگىن ارتتىرۋ كوزدەلگەن. قازىرگى تاڭدا ەسىل اۋدانىندا 25220 ادام تىركەلسە, اۋداندىق ەمحانانىڭ ءار كابينەتىندە جانە ايەلدەر مەن بالالار كونسۋلتاتسياسىندا مەديتسينالىق اقپاراتتىق جۇيە كەشەنى باعدارلاماسى ورناتىلعان. وسىلايشا بارلىق ستاتسيونار بولىمىندەگى ەلەكتروندى قۇجات اينالىمى 95 پايىزعا جەتىپ وتىر. بۇل رەتتە ناۋقاس قاعازىن بەرۋ, دارىگەرگە جازىلۋ جانە ۇيگە شاقىرۋ ەلەكتروندى فورماتقا كوشىرىلگەندىگىن باسا ايتا كەتۋ كەرەك.
ءاربىر دارىگەردىڭ كومپيۋتەرىنە ەنگىزىلگەن دارىگەردىڭ جەكە كابينەتىندە ناۋقاسقا قاتىستى بارلىق اقپارات جيناقتالىپ, بۇرىنعى قاعاز تولتىرۋ قىسقارىپ, مەديتسينالىق قىزمەتكەرلەردىڭ ۋاقىتى ۇنەمدەلدى. دەي تۇرعانمەن اۋىلدىق مەديتسينالىق مەكەمەلەردە ينتەرنەت پەن ارنايى تەحنيكانىڭ بولماۋى سەبەبىنەن ەلەكتروندى قۇجات اينالىمى اقساپ وتىر. ونىڭ ۇستىنە ناۋقاستاردىڭ تەلەفونىنا «DamuMed» گادجەتىن ورناتۋ ماسەلەسى دە قيىنعا سوعىپ وتىر. وسىعان بايلانىستى امبۋلاتورلىق-ەمحانا جانە ستاتسيونار بولىمدەرىنىڭ قىزمەتكەرلەرى ەڭبەك ۇجىمدارىمەن كەزدەسۋلەر وتكىزىپ, ءتۇسىندىرۋ جۇمىستارىن جۇرگىزۋدە. بۇگىنگى تاڭدا مۇنداي «DamuMed» گادجەتى 400 ادامنىڭ بايلانىس قۇرىلعىسىنا ورناتىلىپ, دارىگەرگە جازىلۋ جاعىنان وتە ىڭعايلى ەكەندىگىن دالەلدەدى.
اسقار تۇراپباي ۇلى, «ەگەمەن قازاقستان»
اقمولا وبلىسى