دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە قاراعاندا جىل سايىن 100 ملن ادام مەديتسينالىق قىزمەتتىڭ اقىسىن تولەيمىن دەپ, كەدەيشىلىككە ۇرىنادى ەكەن.
راسىندا, مەديتسينالىق قىزمەتتىڭ باعاسى جوعارى. دەگەنمەن ەلىمىزدە مەملەكەت بولگەن قاراجاتپەن كۆوتا ارقىلى كۇردەلى وپەراتسيالار جاساۋدان, ديسپانسەرلىك ەسەپتەگىلەرگە تەگىن ءدارى-دارمەك بەرۋدەن تىس كەپىلدى تەگىن مەديتسينالىق كومەكتىڭ بولعانىنا شۇكىر دەيمىز. ەگەر ورگان الماستىرۋعا, ونكولوگيالىق جانە بىرقاتار الەۋمەتتىك اۋرۋلارعا تەگىن ەم كورسەتىلمەگەندە جىل سايىن قانشا قازاقستاندىقتىڭ كەدەيشىلىك قامىتىن مويىنىنا ىلەتىنىن ءبىر قۇداي بىلەر. ال الەمدە مەديتسينالىق كومەككە جۇگىنۋشىلەردىڭ 90 پايىزى قاراجاتتى ءوز قالتالارىنان تولەپ, مەملەكەتتەن ەشقانداي الەۋمەتتىك كارجىلىق قولداۋ كورمەيدى, 10 پايىزى عانا بيۋدجەتتەن نەمەسە الەۋمەتتىك مەديتسينالىق ساقتاندىرۋ ەسەبىنەن ەم الاتىن كورىنەدى. استانادا وتكەن تمد-عا مۇشە ەلدەردىڭ دسۇ-مەن ءوزارا ىنتىماقتاستىقتى دامىتۋ ماسەلەلەرىن تالقىلاعان مەملەكەتارالىق ماجىلىستە دۇنيەجۇزىلىك دەنساۋلىق ساقتاۋ ۇيىمىنىڭ ساراپشىسى دوردجسۋرەن بايارسايحان وسىلاي دەيدى. ساراپشى دۇنيەجۇزىلىك بانكتىڭ ەسەبى بويىنشا 800 ملن ادام نەمەسە جەر شارى تۇرعىندارىنىڭ 12 پايىزى سىرقاتتانا قالسا, وتباسىلىق بيۋدجەتتىڭ 10 پايىزىن جۇمسايتىنىن, ال قازاقستاندا بۇل كورسەتكىشتىڭ 7 پايىز شاماسىندا ەكەنىن دە ايتادى.
اتالعان وتىرىستا العاشقى مەديتسينالىق-سانيتارلىق كومەك كورسەتۋدەگى ماسەلەلەر اڭگىمەنىڭ وزەگىنە اينالدى. بۇگىنگى تاڭدا دەنساۋلىق ساقتاۋ مينيسترلىگىنىڭ باستاماسىمەن «پاتسيەنتكە قاجەتتى دەنساۋلىق ساقتاۋ اياسىنداعى قىزمەت كورسەتۋدى ينتەگراتسيالاۋ» جوباسى مەملەكەتتىك ورگانداردا ىسكە اسىرىلىپ جاتىر. سونىمەن قاتار دەنساۋلىق ساقتاۋعا جۇمسالاتىن مەملەكەتتىك جانە مەملەكەتتىك ەمەس قاراجاتتى ەسەپتەپ, مونيتورينگ جۇرگىزىپ, قارجىلاندىرۋ ماسەلەسىندە بيىل تۇڭعىش رەت ۇلتتىق دەنساۋلىق ساقتاۋ ەسەبى قولعا الىنعانىن جەتكىزگەن رەسپۋبليكالىق دەنساۋلىق ساقتاۋدى دامىتۋ ورتالىعىنىڭ دەنساۋلىق ساقتاۋ ەكونوميكاسى ورتالىعىنىڭ جەتەكشىسى زارينا تەمەكوۆا: «دەنساۋلىق ساقتاۋدىڭ ۇلتتىق ەسەبى تەحنيكالىق تۇرعىدان «قاراجات قايدان كەلدى, اقشانى كىم الدى جانە قارجى قايدا ءبولىندى, قانداي قىزمەت تۇرىنە جۇمسالدى؟» دەگەن ساۋالدارعا جاۋاپ بەرەتىن ەكى ولشەمدەگى تابليتسانى ەلەستەتەدى. بۇل ءتورت كاتەگوريا ورتاق كلاسسيفيكاتسياعا بىرىگىپ, دەنساۋلىق سالاسىن قارجىلاندىرۋدا تۋىنداعان ءار سۇراققا جاۋاپ بەرە الاتىن بولادى» دەدى. ز.تەمەكوۆا ءوز سوزىندە ەلىمىز بويىنشا دەنساۋلىققا جۇمسالاتىن قاراجاتتىڭ جىل سايىن ءوسىپ وتىرعانىن ايتتى. ماسەلەن, 2016 جىلى 1,6 ترلن تەڭگە نەمەسە ءىجو-ءنىڭ 3,4 پايىزىن قۇراسا, بىلتىر 3,7 پايىزدى كورسەتكەن. ال دوللارعا شاققاندا 2016 جىلى 280$ بولسا, 2017-دە 319$ قۇراعان.
قازاقستاننىڭ دەنساۋلىق ساقتاۋ سالاسىندا ۇسىنىپ وتىرعان جوباسى حالىقتىڭ ءوز دەنساۋلىعىن باسقارۋعا بەلسەندى قاتىسۋعا ۇيرەتەتىنىن ايتقان ماماندار بۇل ماقساتتا ەلىمىزدە العاشقى كومەك كورسەتۋدىڭ ۇلتتىق تۇجىرىمداماسى جاسالعانىن جەتكىزەدى.
شاراعا قاتىسۋشىلار دۇنيەجۇزىلىك دەنساۋلىق ساقتاۋ اسسامبلەياسىنىڭ 71-ءشى قارارىنا جانە 2019-2023 جىلدارعا ارنالعان ون ءۇشىنشى جالپى باعدارلاما جۇمىسىنا ۇسىنىستار ايتتى. تمد ەلدەرىنىڭ وكىلدەرى دەنساۋلىق ساقتاۋدى قارجىلاندىرۋ رەفورماسى بارىسىندا ءوزارا ىنتىماقتاستىق ورناتۋداعى ماسەلەلەر مەن ۇلتتىق ەسەپ, الەۋمەتتىك مەديتسينالىق ساقتاندىرۋ جانە دالەلدەمەلى مەديتسينانىڭ ماسەلەلەرىن جان-جاقتى تالقىلادى. باسقوسۋعا تمد ەلدەرىنەن باسقا شۆەيتساريا, تۇركيا جانە ەلىمىزدىڭ دەنساۋلىق ساقتاۋ مينيسترلىگى مەن رەسپۋبليكالىق دەنساۋلىق ساقتاۋدى دامىتۋ ورتالىعىنىڭ وكىلدەرى قاتىستى.
انار تولەۋحانقىزى, «ەگەمەن قازاقستان»