مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ عالىم تۇرسىنباەۆ جەتەكشىلىك ەتەتىن وبلىستىق دەپارتامەنتى كوپتەگەن مادەني, رۋحاني ءىس-شارالارعا باستاما كورسەتىپ, جۇرتشىلىق تاراپىنان ۇلكەن قولداۋعا يە بولىپ ءجۇر. الايدا وسى جولى ۇيىمداستىرىلعان قايىرىمدىلىق كونتسەرتى بىرەۋلەرگە جاقپاي قالسا كەرەك.
13 جاستاعى ءامىر عابدۋللين احوندروپلازيا دەرتىنە شالدىققان. بۋىن سۇيەكتەرىنىڭ ءوسۋى تەجەلگەندىكتەن قاتارلاستارىنا قاراعاندا الدەقايدا ءالجۋاز. قول-اياقتارىن ۇزارتۋ ءۇشىن ءۇش رەت وتا جاسالىپتى. قينالعانىن قانشا بىلدىرتپەۋگە تىرىسقانىمەن, اناسى روزانىڭ شىعار جانى بولەك. ونىڭ بەينەۇندەۋى دەپارتامەنت ۇجىمىن بەي-جاي قالدىرماعان. ەلىمىز بويىنشا مەملەكەتتىك قىزمەتشىلەر اراسىندا تۇڭعىش رەت قايىرىمدىلىق كونتسەرتىن وتكىزۋگە مۇرىندىق بولعان.
وسى ماسەلەگە قاتىستى پەتروپاۆل قالالىق ءماسليحاتىنىڭ دەپۋتاتى پاۆەل افاناسەۆ ع.تۇرسىنباەۆقا سىن ايتتى. ونىڭ سوزىنە سەنسەك, اكتسيا «بوپسالاۋشىلىقتىڭ», دەمەۋشىلىككە زورلاپ-كۇشتەۋدىڭ ۇلگىسى كورىنەدى. ال ع.تۇرسىنباەۆتىڭ بۇعان قارسى ايتار ءۋاجى از ەمەس. ء«يا, پوگودين اتىنداعى ورىس دراما تەاترىندا «20 قايىرىمدى ءىس» اكتسياسى اياسىندا كونتسەرت وتكىزۋگە تىكەلەي اتسالىسقانىمىز, ۇيىمدارعا حات جولداپ, بيلەت ساتىپ الۋعا ءوتىنىش جاساعانىمىز راس. قاراجاتتىڭ قايدا اۋدارىلاتىنىنا دەيىن كورسەتىلدى. ۇسىنىسىمىزدى «دوم» رەسپۋبليكالىق قوعامدىق قورى دا قولدادى. تۇرمىسى تومەن وتباسىلارعا, ساۋىعىپ كەتۋدەن ءۇمىتتى بەيكۇنا بالالارعا قولىمىزدان كەلگەنشە جاردەمدەسسەك, نەسى ايىپ؟ مۇمكىندىگى شەكتەۋلى بالاقايلاردىڭ جۇزدەرىنە كۇلكى ءۇيىرىلىپ, بال-بۇل جايناپ جۇرگەندەرىنە ەشتەڭە جەتپەيدى». زەينەتكەرلەرگە دە, جەتىم بالالارعا دا قامقور قولىن سوزۋعا نيەت ەتكەن باسشى ىلكىمدى ىسكە قاتىستى مۇنداي سىننىڭ ايتىلعانىنا قىنجىلاتىنىن جەتكىزدى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى