ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان باستاۋ الاتىن «تۋعان جەر» جوباسى اياسىندا رەسپۋبليكالىق ولكەتانۋ اكتسياسى ءوز جۇمىسىن باستادى. تۇڭعىش رەت قولعا الىنىپ وتىرعان اكتسيا شەڭبەرىندە قىزىلوردا مەن باتىس قازاقستان وبلىستارى مەكتەپتەرىنىڭ وقۋشىلارى ءۇش كۇن بويى اقمولا وبلىسىنىڭ كيەلى جەرلەرىن ارالاپ, ولكەنىڭ ءوڭىن كەلتىرەتىن قاسيەتتى مەكەندەردى كوزدەرىمەن كورىپ, بالعىن كوڭىلدەرىنە كورىكتى وي تۇيمەك.
وتكەن جەكسەنبى كۇنى ششۋچينسك قالاسىنا كەلىپ جەتكەن وقۋشىلاردى وبلىستىق ءبىلىم باسقارماسىنىڭ وكىلدەرى قارسى الدى. الەۋمەتتىك جاعىنان از قامتىلعان وتباسىلارىنىڭ 134 بالا مەن ولاردىڭ جەتەكشىلەرىن بىرنەشە توپقا ءبولىپ, تابيعاتى تامىلجىعان بۋرابايدىڭ باۋرايىنداعى «زۆەزدنىي» بالالار ساۋىقتىرۋ ورتالىعىنا جايعاستىردى. قارسى الۋشى جاقتىڭ وكىلى, وبلىستىق ءبىلىم باسقارماسى باسشىسىنىڭ ورىنباسارى بوتاگوز دۇيسەنوۆانىڭ ايتۋىنشا, مەيمان بالالار ءۇش كۇن بويى كوكشەتاۋ مەن قاراوتكەلدىڭ ءۇزىلىپ تۇسكەن مونشاقتاي كوگىلدىر كولدەر مەن ماڭگى جاسىل قاراعايلار كومكەرگەن اجارلى ايماعىن ارالاپ, تاريح تىلسىمىنان تامىلجىتا سىر شەرتەر كيەلى جەرلەرىن ءسۇزىپ شىقپاق. جالعىز ول عانا ەمەس, اكتسيا بارىسىندا ءارتۇرلى قىزىقتى مادەني-سپورتتىق شارالاردى قامتۋ دا مەجەلەنىپ وتىر.
– ەل تاريحىن ۇعىندىرۋ جاس ۇرپاقتىڭ ءبىلىم كوكجيەگىن كەڭەيتە تۇسەدى. بۇگىن ءبىز وسى ەكى وبلىستىڭ مەكتەپ وقۋشىلارىن قۇشاق جايا قارسى الىپ جاتساق, كەيىن اقمولالىق بالالار دا سول ايماقتارعا ساياحات جاسايدى, – دەدى بوتاگوز دۇيسەنوۆا.
العاشقى كۇنى بالالار بۋرابايدىڭ باۋرايىنداعى مارال شارۋاشىلىعى ماڭىنداعى كونە ءداۋىردىڭ كوزىندەي بولىپ كورىنەتىن «جايلاۋ» ەتنواۋىلىندا بولدى. قاز-قاتار تىگىلگەن اقشاڭقان كيىز ۇيلەر بەينەبىر باعزى زاماننان ۇدەرە كوشىپ كەلىپ, تاۋ ەتەگىندە ات شالدىرىپ, بايىز تاپقانداي. مەيمان بالالار قوناقجاي ەلدىڭ دارحان پەيىلىمەن ۇسىنعان ۇلتتىق تاعامداردان ءدام تاتتى. مامىراجاي تىرشىلىكتىڭ وزىندىك ءسانى مەن سالتاناتى كوڭىل ارباپ, ەرتەگىدەي سۇلۋ الەمگە جەتەلەيدى. ارقانىڭ سامال جەلىمەن قوسىلا تەربەلگەن التىباقان باسىندا «قۇلاقتان كىرىپ بويدى الار» اسەم ءان اۋەلەپ تۇر. جەلى باسىندا شۇرقىراعان ق ۇلىننىڭ سىمباتى قانداي ادەمى. مەيماندار جۋاس اتتارعا ءمىنىپ, جەلە شوقىتىپ, جەر تانىپ ءبىر جاساپ قالدى.
– وسىنداي ادەمى جەرگە كەلگەنىمە قۋانىپ تۇرمىن,–دەيدى ورال قالاسىنان كەلگەن 8-سىنىپ وقۋشىسى جاسمين بەيسەنعاليەۆا.
– تابيعاتى عانا ەمەس, ادامدارى دا اقجارقىن ەكەن. اپايلارىمىز ەرتەڭ ابىلاي حان الاڭى مەن مۇراجايىندا بولاسىزدار دەدى, تاماشا ەمەس پە؟!
ۇيىمداستىرۋشىلاردىڭ ايتۋىنا قاراعاندا, تالاي تاريح مەلتەكتەپ بوگىپ جاتقان بۋراباي اۋدانىنداعى كيەلى جەرلەردى ارالاتىپ, جاس مەيمانداردىڭ جادىنا ەل تاريحىنىڭ ەلەۋلى بەلەستەرىن ورنىقتىرماق. سونىمەن قاتار وبلىس ورتالىعىنداعى تاريحي جەرلەردى دە كورسەتپەك.
ەل تانىعان, جەر تانىعان قانداي جاقسى. الىستان وسى ساپاردى اڭساپ جەتكەن جاس تولقىن قاس-قاعىم ءساتىن بوس جىبەرمەي, ۇلتىنىڭ وتكەن ۇلاعاتى, تاريحى جانە مادەنيەتىمەن باجايلاي تانىسىپ, تەرەڭىنەن بويلاماق. جوبانىڭ كوزدەگەنى دە وسى ەمەس پە؟
بايقال ءبايادىلوۆ
اقمولا وبلىسى