اتاقتى اتاتۇرىكتىڭ كومەكشىسى بولعان جەمال گراندانىڭ ەستەلىك كىتابىن وقىپ وتىرىپ, تۇركيانىڭ تۇڭعىش پرەزيدەنتىنىڭ ادەبيەتكە قانشالىقتى ءمان بەرىپ, قالامگەرلەرگە قامقورلىق جاساعانىن, ۇلت ادەبيەتىنىڭ دامۋىنا قانشالىقتى قولداۋ كورسەتكەنىن پايىمدايسىڭ.
«...ءبىر كۇنى اتاتۇرىك قالىڭدىعى كەرەقارىس تاريحي شىعارمانى باس الماي وقىپ وتىردى. ەلدەگى كوپتەگەن كوكەيكەستى ماسەلەلەر شەشىمىن تاپپاي جاتقاندا, مەملەكەت باسشىسىنىڭ كىتاپ وقىپ وتىرعانى بارىمىزگە وعاش كورىنەتىنى راس. سول كەزدە اتاتۇرىكتىڭ دەپۋتات دوسى حۇسەيىن ۆاسىچ چىنار:
– پاشام! تاريحتى وقىپ, باس قاتىرىپ نە قىلاسىڭ؟ سوناۋ 1919 جىلدىڭ 19 مامىرىندا سامسۋندا ەلدى ۇلت-ازاتتىق سوعىسقا باستاعانىڭدا, كىتاپ وقىپ شىعىپ پا ەدىڭ؟ – دەپ اڭگىمەگە تارتادى.
اتاتۇرىك دوسىنىڭ ءازىل ارالاس ءسوزىن بىردەن ۇعادى. ءسويتىپ كىتاپتىڭ بەتىن جاۋىپ:
– بالا كەزىمدە كوپ قيىندىق كوردىم, ۆاسىچ دوسىم. ەكى قۇرىش (تيىن) قولىما تيە قالسا ءبىر قۇرىشتى مىندەتتى تۇردە كىتاپقا جۇمسايتىنمىن. كىتاپ وقىماعانىمدا, وسى ۋاقىتقا دەيىن ەشتەڭە قولىمنان كەلمەس ەدى عوي. ومىرىمدەگى بارلىق جەتىستىكتەرىم وسى كىتاپتىڭ ارقاسىندا, – دەپ جاۋاپ قاتادى.
ءيا, اتاتۇرىك ۇلتتىق ادەبيەتتىڭ ءىرى وكىلدەرىن ۇنەمى ماقتانىش تۇتىپ وتىراتىن. «ەل ىرگەسى – مادەنيەت پەن ادەبيەت. سوندىقتان دا ونەر ادامى قول سۇيمەيدى, ونىڭ قولىن باسقالار ءسۇيۋى كەرەك» دەپ, قالام ۇستاعان قادىرلى قاۋىمعا بارىنشا قولداۋ ءبىلدىرۋشى ەدى. رەشات نۇري گۇنتەكين, نامىك كەمال, مەحمەت ەمين يۋرداكۋل, تاۋفيك فيكرەت سىندى اقىن-جازۋشىلاردىڭ شىعارمالارىن وقىپ, ەل-جۇرتپەن كەزدەسكەن سايىن ولاردى وقۋعا كەڭەس بەرەتىن...
ج.گراندانىڭ ەستەلىكتەرى مايداندا ءجۇرىپ شىعارما جازعان جاۋىنگەر قازاق قالامگەرلەرىن, ءتىلدىڭ مەرەيى ۇستەم بولسىن دەپ, ۇلتتىق ادەبيەتىمىزگە قامقورشى بولعان تاريحي تۇلعالارىمىزدى ەرىكسىز ەسكە سالادى.
اتاتۇرىك ءوز ەلىن ساقتاپ قالدى. وعان كەڭەسشى بولعان ەڭ الدىمەن كىتاپ ەدى.
مالىك وتارباەۆ