استانادا مەملەكەت باسشىسى نۇرسۇلتان نازارباەۆتىڭ قاتىسۋىمەن قر پرەزيدەنتىنىڭ جانىنداعى شەتەل ينۆەستورلارى كەڭەسىنىڭ 31-ءشى پلەنارلىق وتىرىسى باستالدى.
كۇن تارتىبىنە ءۇش سۇراق قويىلىپ وتىر. ەڭ الدىمەن, كەڭەستىڭ 30-شى جالپى وتىرىسىنداعى حاتتامالىق مىندەتتەردىڭ اتقارىلۋى تۋرالى ەسەپ تىڭدالادى. ەكىنشىدەن, شەتەلدىك تاراپتىڭ ينۆەستيتسيالىق ساياسات, ەنەرگەتيكا, ەكولوگيا جانە مۇناي-گاز سالاسى, ەڭبەك زاڭناماسى, ادام كاپيتالىن دامىتۋ مەن شەتەلدىك جۇمىس كۇشىن تارتۋ تۋرالى كەڭەسى ايتىلادى.
ء«بىز تاۋەلسىزدىك العاننان كەيىنگى جىلدار استە وڭاي بولعان جوق. كەڭەس وداعىنىڭ كۇيرەۋى مەن داعدارىستان سوڭ, وڭتۇستىك-شىعىس داعدارىسى, 2007 جىلعى داعدارىس وتكەنىمەن, قازاقستان رەزەرۆىنىڭ, وڭتايلى شەشىمنىڭ ارقاسىندا رەتسەسسياعا جول بەرگەن جوق. دەسە دە, ماسەلەلەر, قاتەلىكتەر, كەمشىلىكتەر بارشىلىق. بىراق, ەڭ باستىسى ايتايىن دەگەنىم ينۆەستيتسيا بويىنشا قازاقستاننىڭ كورسەتكىشى الەمدىك كورسەتكىشتەن جوعارى جانە قازاقستاننىڭ جەتىستىگى دامىعان ەلدەردىڭ كورسەتكىشىنەن ەكى ەسەگە جوعارى. وسىنىڭ ارقاسىندا قازاقستان قازىر دامۋ ۇستىندە. ءبىز وسىلايشا جاڭا باعدارلامالاردى جۇزەگە اسىرىپ جاتىرمىز», - دەدى نۇرسۇلتان نازارباەۆ كەڭەستىڭ اشىلۋىندا.
سونىمەن بىرگە, وتىرىستىڭ نەگىزگى كوتەرەتىن تاقىرىبى - جەدەلدەتىلگەن جاڭعىرتۋ بولماق. ايتا كەتسەك, شەتەلدىك ينۆەستورلار كەڭەسى قۇرىلعالى بەرى مەملەكەت باسشىسىنىڭ توراعالىعىمەن 30 پلەنارلىق وتىرىس وتكىزىلگەن. ول وتىرىستاردا اۋقىمدى تۇردە وزەكتى ماسەلەلەر, اتاپ ايتقاندا ەلدەگى شەتەل ينۆەستيتسياسىنىڭ قۇقىقتىق رەجىمىن جاقسارتۋ, قازاقستاننىڭ سوت جۇيەسىن جەتىلدىرۋ, سالىق جۇيەسىن وڭتايلاندىرۋ مەن شەتەلدەن جۇمىس كۇشىن تارتۋ, قر ينۆەستيتسيالىق ءيميدجىن جاقسارتۋ, بولاشاق ەنەرگياسى سەكىلدى ماڭىزدى تاقىرىپتار تالقىلانعان. قر پرەزيدەنتىنىڭ توراعالىعىمەن وتەتىن شەتەلدىك ينۆەستورلار كەڭەسى بىرەگەي الاڭ. كەڭەس ەلدىڭ ينۆەستيتسيا سالاسىنا, قازاقستانداعى ينۆەستيتسيالىق كليماتتى ارتتىرۋعا قاتىستى وزەكتى ماسەلەلەردى شەشۋ ءۇشىن قر ۇكىمەتى مەن شەتەل ينۆەستورلارىنىڭ اراسىنداعى تىكەلەي ديالوگتى قامتاماسىز ەتۋ ماقساتىندا 1998 جىلى قۇرىلعان.