مەملەكەتتىك رامىزدەر كۇنىنە وراي «نۇر وتان» ماڭعىستاۋ وبلىستىق فيليالى «اقتاۋ قالاسىنىڭ قايىرىمدى جاندارى» ەرىكتىلەر توبىن ماراپاتتادى.
ءىس-شارادا وڭىرىمىزدەگى مۇقتاج, از قامتىلعان, مۇمكىندىگى شەكتەۋلى ازاماتتارىنا ەرىكتى تۇردە قول ۇشىن بەرىپ جۇرگەن 16 ادامعا سىي-قۇرمەت كورسەتىلدى. «نۇر وتان» ماڭعىستاۋ وبلىستىق فيليالى توراعانىڭ ءبىرىنشى ورىنباسارى نۇري تۋمىشەۆ ەرىكتىلەر توبىنا جىلى لەبىزىن ايتىپ, العىس ءبىلدىردى.
- سىزدەردىڭ ازاماتتارعا كورسەتكەن شىنايى قامقورلىعىڭىز بەن ەلىمىزدىڭ الەۋمەتتىك ماسەلەسىنە قوسقان ۇلەسىڭىزدى, وتان الدىنداعى پاتريوتتىقتىڭ بەلگىسى دەپ بىلەمىز. «پاتريوتيزم – كىندىك قانىڭ تامعان جەرىنە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى» دەپ ەلباسى نۇرسۇلتان نازارباەۆ اتاپ وتكەن بولاتىن. ءبىز «بولاشاققا باعدار: رۋحاني جاڭعىرۋ» باعدارلاماسىنىڭ جاڭعىرۋ جولىنداعى جاستارعا رۋح پەن جىگەر بەرەتىن, وزگە جاستارعا ۇلگى بولاتىن قادامدارىڭىزدى قۇرمەتتەيمىز!-دەدى ول.
«اقتاۋ قايىرىمدى جاندار» توبىنىڭ جەتەكشىسى تۇركمەنباەۆا ناعيما تورەبايقىزى ەرىكتىلەر توبىنىڭ ماقساتى جونىندە اتقارىلىپ وتىرعان شارالار جونىندە ايتىپ بەردى.
- قايىرىمدىلىق توبىنىڭ باستى ماقساتى ەلىمىزدە قارتتار ءۇيى مەن جەتىم بالالار ءۇيىنىڭ بولماۋىن, قوعامدا از قامتىلعان وتباسىلاردىڭ سانىن ازايتىپ, ادامدار اراسىندا سىيلاستىق, كىشىپەيىلدىلىك ورناتۋ. ءوز جۇمىسىمىزدى وسىدان ەكى جىل بۇرىن, ياعني 2016 جىلدىڭ كۇزىندە باستادىق. ەرىكتىلەر توبىندا ءار ءتۇرلى جاستاعى ازاماتتار, كاسىپكەرلەر, ستۋدەنتتەر, انالار بار. بىزدەر وسى ۋاقىتقا دەيىن وتاسىنا قارجى تالاپ ەتىلەتىن بالالارعا, باسپاناسى جوق وتباسىلارعا, مەكتەپ جاسىنداعى بالالاردىڭ كيىمدەرىن بۇتىندەۋگە كۇش جۇمساپ كەلەمىز. ماسەلەن, جەتىبايدا كولىك اپاتىنا تۇسكەن بالانىڭ 4-5 وتاسىنا جەتەتىندەي ەتىپ, 10 كۇننىڭ ىشىندە 4,5 ملن. تەڭگە جيناپ بەردىك. وسىنداي بالالاردىڭ ساۋىعۋىنا قاراجات ءبولىپ, ولاردىڭ تولىق جازىلىپ كەتۋىن باقىلاپ وتىرامىز. ءمۇجالسىز وتباسىلاردان شىققان بالالارعا ارناپ «ارمانىڭ ورىندالسىن بالاقاي!» اتتى اكتسيا ۇيىمداستىرىپ, مەكتەپكە باراتىن كەرەكتى زاتتارمەن قامتاماسىز ەتتىك. ولاردىڭ ءتىزىمىن مەشىتتەن جانە جۇمىسپەن قامتۋ ورتالىعىنان الامىز. ونىمەن قوسا مۇمكىندىگى شەكتەۋلى بالالار تاسادا قالماسىن دەپ «جۇلدىزدى ءسات» دەگەن شارا وتكىزدىك. وندا بالالار ءوز ونەرلەرىن ورتاعا سالادى,- دەگەن ناعيما تۇركمەنبايقىزى بولاشاق جوسپارلارىمەن دە ءبولىستى.
«اقتاۋ قايىرىمدى جاندار» ءتورايىمى توپتىڭ اعىمداعى جىلدىڭ تامىز ايىندا تۇركىستان قالاسىندا وتەتىن سلەتكە قاتىسىپ, رەسپۋبليكا كولەمىندە قايىرىمدىلىق شارالارىن ۇيىمداستىراتىنىن ايتتى.
گۇلايىم شىنتەمىرقىزى, «ەگەمەن قازاقستان»