رامازان ايى قارساڭىندا الماتى ورتالىق مەشىتى بارشا قالام ۇستاعان ازاماتتار اراسىندا جاراپازان جىرىنىڭ جاڭا ءماتىنىن جازۋ بويىنشا بايقاۋ جاريالاعان بولاتىن. بۇگىن وسى بايقاۋدىڭ ناتيجەسى قورىتىندىلانىپ, جەڭىمپازدار ماراپاتتالدى, دەپ حابارلايدى Egemen.kz.
بايقاۋعا قاتىسۋشىلارعا رامازان ايىنىڭ كەلگەنىن سۇيىنشىلەۋ, ورازا ايىنىڭ ارتىقشىلىعىن جەڭىل تۇردە جەتكىزۋ, ءدىن مەن ءداستۇردىڭ ساباقتاستىعىن كورسەتۋ, جاراپازان ايتۋ اتا-بابادان مۇرا بولعان ءداستۇر ەكەندىگىن ايتۋ شارتتارى قويىلدى.
جاقسىلىقتىڭ جارشىسى – جاراپازان
بايقاۋعا 30-دان استام جاراپازان ءماتىنى كەلىپ ءتۇستى. الماتى قالاسىنىڭ باس يمامى تولەبي وسپان, يسلام عىلىمي زەرتتەۋ ينستيتۋتىنىڭ ديرەكتورى ءتورالى قىدىر, ادەبيەت جانە ونەر ينستيتۋتىنىڭ عىلىمي قىزمەتكەرى باۋىرجان مىرزاقۇل جانە تاعى باسقا قازىلار وسى ماتىندەر اراسىنان جەڭىمپازداردى انىقتادى. ناتيجەسىندە ءبىرىنشى ورىنعا – ءبىلال قۋانىش (الماتى قالاسى), ەكىنشى ورىنعا – ەركەبۇلان قاينازار (استانا قالاسى), ءۇشىنشى ورىنعا بوتاكوز مۇحيدەن (استانا قالاسى) يە بولدى. ەڭ ۇزدىك جاراپازان ءماتىنى رامازان ايىندا ورىندالىپ, باسقا جاراپازان ماتىندەرى سايتقا جاريالانادى.
جاراپازان قانداي ءداستۇر؟
ايتا كەتەيىك, بايقاۋ ۋاقىت تالابىنا ساي جاراپازان جىرىن جاڭا ۇلگىدە جازىپ, حالىققا ۇمىت بولىپ بارا جاتقان جاراپازان جىرىن ايتۋ ءداستۇرىن جاڭعىرتۋ ماقساتىندا ۇيىمداستىرىلدى.