الەم چەمپيوناتى باستالماي تۇرىپ كوپشىلىكتىڭ نازارىن وزىنە اۋدارتقان مىسىر قۇراماسىنىڭ فۋتبول تويىندا ءبىر ايتارى بولارى انىق. بۇل كوماندانىڭ باستى جۇلدىزى مۇحامەد سالاح چەمپيوندار ليگاسىنىڭ فينالىندا جاراقات الىپ قالدى. دارىگەرلەر سۇرمەرگەن شابۋىلشى توپ ىشىندەگى ەكىنشى ويىندا الاڭعا شىعۋى ءتيىس دەپ بولجاپ وتىر.
ەگيپەت ۇلتتىق قۇراما كومانداسى الەم چەمپيوناتىنا وسىمەن ءۇشىنشى مارتە قاتىسادى. وسىعان دەيىنگى دودالاردا مىسىرلىق اياقدوپشىلار توپتىق كەزەڭنەن ءارى اسا الماي قالعان-دى. پەرعاۋىنداردىڭ العاشقى جورىعى سوناۋ 1934 جىلى باستالدى. يتاليا جەرىندە وتكەن دوپ دوداسىندا 13-ورىندى الىپ ەدى. ودان كەيىن كوپ ۋاقىت مىسىر قۇراماسى ىرىكتەۋدەن وتە الماي, ءبىراز ىركىلىپ ءجۇردى. ال ەكىنشى مارتە چەمپيوناتقا ولار 1990 جىلى عانا قايتا ورالدى. ءبىر قىزىعى 90-جىلعى چەمپيونات تا يتاليا جەرىندە وتكەن. 2 ويىندى تەڭ ويناپ, ءبىر ماتچتا جەڭىلىپ, ەگيپەت توپتان ءارى اسا المادى.
ال 2000 جىلداردىڭ سوڭىنا قاراي مىسىر فۋتبولى قايتا جاندانعانداي كورىندى. اعىلشىننىڭ «توتتەنحەمىندە» وينايتىن يوحان ميدو مەن بۋندەسليگادا ءتاپ-ءتاۋىر شابۋىلشى بولعان مۇحاممەد زيدانداردىڭ كەزىندە مىسىر حالقى زور ءۇمىت كۇتتى. بىراق كوماندا ىشىندەگى الاۋىزدىق ۇشپاققا شىعارمادى.
باپكەرگە ارتىلعان سەنىمەگيپەت قۇراماسى وتكەن جىلى قاراشا ايىندا بىرنەشە مىقتى ماتچ وتكىزدى. ىرىكتەۋ ءتۋرنيرىنىڭ 5-تۋرىندا ەگيپەت الەكساندريا قالاسىندا كونگونى قابىلدادى. وسى ماتچتا مۇحامەد سالاح دۋبل اۆتورى اتاندى. ال ونىڭ نەگىزگى ۋاقىتقا قوسىلعان مينۋتتا سوققان پەنالتيى ەگيپەتتى الەم چەمپيوناتىنا الىپ شىقتى.
ودان كەيىن مىسىرلىقتار گانانى 2:0 ەسەبىمەن جەڭدى. سول ويىندا ماڭىزدى گولدى تاعى دا «ليۆەرپۋل» شابۋىلشىسى مۇحامەد سالاح سوقتى. دەگەنمەن, مىسىرلىق جانكۇيەرلەر ەگيپەت قۇراماسىنىڭ وسىنشاما جەتىستىككە جەتكەنىنە سالاحپەن قاتار باس باپكەر ەكتور كۋپەردى دە قاتار ايتادى. ارگەنتينالىق باپكەر ءوز تاجىريبەسىندە ءبىرشاما جەتىستىككە جەتكەن. يسپانيانىڭ «ۆالەنسيا» كومانداسىمەن 2000 جىلداردىڭ باسىندا كلۋبتىق دەڭگەيدە زور تابىسقا جەتتى. «ۆالەنسيا» چەمپيوندار ليگاسىنىڭ فينالىنا جىلما-جىل شىعىپ, كارى قۇرلىق فۋتبولىندا ۇستەمدىك قۇردى. ودان كەيىن كۋپەر يتاليانىڭ «ينتەرىمەن» باپكەرلىك قىزمەتتىڭ شىڭىنا شىقتى. گرۋزيا ۇلتتىق قۇراماسىنىڭ باپكەرى قىزمەتىن دە ابىرويمەن اتقاردى. ال 2015 جىلدان باستاپ كۋپەر ەگيپەت ەلىنىڭ قۇراما كومانداسىنا باس باپكەر بولىپ كەلدى. مىنە, سودان بەرى پەرعاۋىندار جەڭىستىڭ ءدامىن سەزە باستادى. مىسالى, 2017 جىلى سالاح باستاعان جىگىتتەر ەكتور كۋپەردىڭ باسقارۋىمەن افريكا ۇلتتار كۋبوگىنىڭ چەمپيونى اتاندى. بىلايشا ايتقاندا, قارا قۇرلىقتا قازىر ەگيپەت ەڭ مىقتى ۇجىم.
سالاحتىڭ ساۋلىعىن تىلەيدىالەم چەمپيوناتىندا ەگيپەت «ا» توبىندا ونەر كورسەتەدى. قارسىلاستارى الاڭ يەسى رەسەي, شابۋىلى جويقىن ۋرۋگۆاي جانە مۇسىلمان باۋىرلارى ساۋد ارابياسى قۇراماسى. العاشقى ويىن 15 ماۋسىم كۇنى ۋرۋگۆايعا قارسى وتەدى. بۇل ماتچ ارگەنتينالىق ەكتور كۋپەرگە ناعىز سىن بولعالى تۇر. ودان كەيىنگى 2 ويىندا مىسىرلىقتار 6 ۇپاي الۋدى جوسپارلاپ وتىر. سەبەبى 19 ماۋسىم كۇنى مىسىر رەسەيمەن, ال 25 ماۋسىم كۇنى ساۋد ارابياسىمەن ۇشىراسادى. چەمپيوندار ليگاسىنىڭ فينالىندا جاراقات العان مۇحامەد سالاح ۋرۋگۆايمەن وتكەن ويىنعا قاتىسپايدى دەگەن اقپارات بار. ال ودان كەيىنگى 2 ماتچقا سۇرمەرگەن شىعىپ قالۋى ابدەن ىقتيمال. سوندىقتان دا, بۇكىل ەگيپەت جانكۇيەرلەرى قازىرگى كۇنى سالاحتىڭ ساۋلىعىن تىلەپ, دۇعا ايتۋدا. توپىراعىن تۇرتسەڭ تاريحى سويلەپ بەرەتىن, بابامىز بەيبارىس باسقارعان مىسىر ەلىنىڭ قۇراماسىنا جانكۇيەر بولامىز دەپ وتىرعان وتانداستارىمىز دا جوق ەمەس.
ەرمۇحامەد ماۋلەن, «ەگەمەن قازاقستان»