جاڭاوزەندىك پوليتسەيلەر مەكتەپ وقۋشىلارىنا سالاۋاتتىلىق جايىندا كەڭەس بەردى

مەكتەپ ينسپەكتورى پوليتسيا لەيتەنانتى ءمادينا ابيەۆا مەن مەكتەپ اكىمشىلىگى بىرلەسىپ "سالاۋاتتى ءومىر سالتىن ناسيحاتتاۋ" ماقساتىندا ۇيىمداستىرعان  شاراعا ارنايى ماماندار شاقىرىلدى.

"جاستار رەسۋرس ورتالىعىنىڭ" مامانى ءمولدىر سوتسالوۆا جاستاردى بوس ۋاقىتتارىندا ەڭبەكقورلىققا باۋلۋ ارقىلى تاربيەلەۋ قاجەتتىگىن ايتىپ, سول سەبەپتى الدىمىزداعى ءۇش اي دەمالىستى بوسقا وتكىزبەي, "جاسىل ەل" باعدارماسىنا ساي 15 پەن 29 جاس ارالىعىنداعى جەتكىنشەكتەردى ەڭبەك ەتۋگە, تابىس تابۋعا شاقىردى.

"سالاۋاتتى ءومىر سالتىن ناسيحاتتاۋ", "باقىتتى بالالىق شاقتى قورعاۋ" يميدجدىك جوسپارىمەن كەلگەن ماماندار ايگەرىم ساعىزباەۆا جانە 1, 2, 3 جاڭاوزەن مەملەكەتتىك ەمحاناسىنىڭ تەراپەۆتى مۇحامەدەس جامانقۇلوۆا  تەمەكى شەككەن ادامنىڭ وزدەرىنە عانا ەمەس, وزدەرىمەن جۇرگەن دوستارىنا كەلەر زياندارىن مىسالمەن, بەينەسۋرەتتەرمەن, تەمەكى شەگەتىن ادامنىڭ وكپەسى مەن تەمەكى شەكپەيتىن ادامنىڭ وكپەسىندەگى ايىرماشىلىقتاردى كورسەتتى. الكوگولدىك ونىمدەردى پايدالانۋدىڭ زياندىلىعىن اۋىزشا ايتىپ قويماي, تاجىريبەلەر ارقىلى, ياعني جۇمىرتقانىڭ اقۋىزى مەن ادام دەنەسىندەگى اقۋىزدىڭ 90 پايىزعا ۇقساستىعىن ايتىپ, بوكالعا  اقۋىزدى سالىپ, ۇستىنە ءسپيرتتى قۇيىپ, تۇندىرىپ, ۋاقىت وتكەن سوڭ ونىڭ ءيىسى مەن ءتۇرىنىڭ بۇزىلعاندىعىن وقۋشىلارعا كورسەتۋ ارقىلى, الكوگول ونىمدەرىنىڭ ادام اعزاسىنا وسىلاي اسەر ەتەتىندىگىن دالەلدەپ كورسەتتى. سونىمەن قاتار, ارنايى كوزىلدىرىك كيگىزىپ, ماس كۇيىندە ءجۇرىپ كەلە جاتقان ادامنىڭ ءجۇرىس-تۇرىسىن سىرتتان قانداي بولاتىندىعىن باقىلاتىپ, وزدەرىنە سەزىندىرىپ, كورسەتتى. سونداي-اق, فاسفۋت سەكىلدى تاعامداردى, "كوكا كولا», «پەپسي» ت.ب سۋسىنداردى پايدالانۋدىڭ زياندىعى,  كۇندەلىكتى دۇرىس تاماقتانباۋدىڭ كەسىرىنەن ادام اعزاسىنىڭ سەمىزدىككە دۋشار بولۋىمەن قوسا, كوپتەگەن اۋرۋ تۇرلەرىن تۋدىرىپ جاتقاندىعىن ايتتى.  

جاڭاوزەن قىىب يۋۆينالدى پوليتسيا توبىنىڭ اعا ينسپەكتورى پوليتسيا كاپيتانى بيعالي ەلەمەسوۆ   تەمەكى, الكوگولدىك, ەسىرتكى قۇرالدارىنا تەك مەديتسينالىق تۇرعىدان ەمەس, زاڭ تاراپىنان دا تىيىم سالىنعانىن, ولار بويىنشا قولدانىلاتىن اكىمشىلىك جانە قىلمىستىق جاۋاپكەرشىلىك جايلى توقتالدى. سەبەبى, ناشاقورلىق دەپ اتالاتىن ىندەتتىڭ تامىرىنا بالتا شابۋ –

جاستار مەن جاسوسپىرىمدەر اراسىنداعى قىلمىسقا قارسى ۇگىت-ناسيحات جۇمىستارىن جۇرگىزۋ بولىپ تابىلادى. سونىمەن قاتار, جاستار مەن وقۋشىلار اراسىندا سالاۋاتتى ءومىر سالتىن قالىپتاستىرۋ, ناشاقورلىقتىڭ الدىن الۋ, زياندى دا جات قىلىقتارعا قوعامدا ورىن جوق ەكەندىگىن جەتكىزدى. سودان سوڭ, ارنايى №19 ورتا مەكتەپ اكىمشىلىگىمەن دايىندالعان بەينە روليكتى وقۋشىلارعا  ۇسىندى.

ءسوز سوڭىندا "ەسىرتكىگە جول جوق" تاقىرىبىن العان "پوليتسەيلەردىڭ جاس كومەكشىلەرى" بوياۋلارمەن سالعان سۋرەتتەرىنىڭ ماعىناسى مەن ماقساتىن ايتىپ بەردى.

 گۇلايىم شىنتەمىرقىزى,

 «ەگەمەن قازاقستان»

ماڭعىستاۋ وبلىسى