ورتالىق كوممۋنيكاتسيالار قىزمەتىندە «بالالاردىڭ مۇددەسى ءۇشىن مەملەكەتتىك ساياسات» تاقىرىبىندا ءباسپاسوز كونفەرەنتسيا ءوتتى. شاراعا قاتىسقان ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى نۇربەك ورشۋبەكوۆ حالىقارالىق بالالاردىڭ قۇقىقتارىن قورعاۋ كۇنى قارساڭىندا مينيسترلىك تاراپىنان «نۇرلى بولاشاق» اكتسياسى جاريالانعانىن تىلگە تيەك ەتتى.
«قازاقستاندا 18 جاسقا دەيىنگى بالا سانى 5,5 ملن.نان استام, ونىڭ ىشىندە مەكتەپكە دەيىنگى جاستاعى – 2 ملن.نان استام, مەكتەپ وقۋشىلارى - 3 ملن.نان استام, 18 جاسقا دەيىنگى وقۋشى جانە ستۋدەنت جاستار – 300 مىڭنان استام. حالىقارالىق بالالاردىڭ قۇقىقتارىن قورعاۋ كۇنى قارساڭىندا مينيسترلىك تاراپىنان «نۇرلى بولاشاق» اكتسياسى جاريالاندى. 1 ماۋسىم مەرەكەسى اياسىندا ەلىمىزدىڭ بارلىق نەگىزگى الاڭدارىندا فەستيۆالدەر, تەاترلاندىرىلعان قويىلىمدار, كونتسەرتتىك باعدارلامالار, سپورتتىق جارىستار, اسفالتقا سۋرەتتەر سالۋ كونكۋرسى, جالپى 600-دەن استام ءىس-شارالار وتەدى دەپ جوسپارلانعان», دەدى بالالاردىڭ قۇقىقتارىن قورعاۋ كوميتەتىنىڭ توراعاسى.
سونىمەن قاتار ول بۇل كۇنى رەسپۋبليكانىڭ بارلىق وڭىرلەرىندە بالالار مەن جاسوسپىرىمدەردىڭ مۋزىكالىق وركەسترلەر مەن انسامبلدەر شەرۋى وتەتىنىن, استانا قالاسىندا «جۇلدىزاي» ەرەكشە قاجەتتىلىكتەرى بار بالالار شىعارماشىلىعىنىڭ رەسپۋبليكالىق فەستيۆالىنىڭ گالا-كونتسەرتى بولاتىنىن, مەرەكە كۇندەرى «بالالار باستاۋى» بالالاردىڭ الەۋمەتتىك جوبالارى, «قازاقستان – مەيىرىمدىلىك مەكەنى» اكتسيا كونكۋرستارىنىڭ قورىتىندىلارى شىعارىلاتىن جەتكىزدى.
«1 ماۋسىمنان باستاپ 1,5 ملن. بالا دەمالاتىن 12,5 مىڭنان استام مەكتەپ جانىنداعى لاگەر جۇمىسىن باستايدى. جالپى بالالاردىڭ جازعى دەمالىسىن ۇيىمداستىرۋ ءۇشىن اعىمداعى جىلعى جەرگىلىكتى بيۋدجەت قاراجات ەسەبىنەن 4 ملرد.-قا جۋىق تەڭگە ءبولىندى. بالالارعا قاتىستى بولعان وقيعالاردىڭ نەگىزگى سەبەپتەرى: اتا-انالار باقىلاۋلارىنىڭ جەتكىلىكسىزدىگى, جانە قاۋىپسىزدىك شارالارىن ساقتاماۋى بولىپ تابىلادى. بالالاردىڭ قاۋىپسىزدىگىن قامتاماسىز ەتۋ ماسەلەسى بارلىق جاۋاپتى مەملەكەتتىك ورگانداردىڭ باقىلاۋىندا. مينيسترلىك تاراپىنان 2017-2019 جىلدارعا ارنالعان بالالاردى جۇزۋگە ۇيرەتۋدى ۇيىمداستىرۋ جونىندەگى ۆەدومستۆوارالىق ءىس-شارالار جوسپار ازىرلەندى. جوسپار جالپى ءبىلىم بەرەتىن مەكتەپتەردىڭ وڭىردەگى قولدانىستاعى باسسەيندەرگە بەكىتۋ كەستەسىن بويىنشا ءىس-شارالاردى, پەداگوگتار مەن اتا-انالار اراسىندا ءتۇسىندىرۋ جۇمىستارى جانە بالالاردى جۇزۋگە ۇيرەتۋمەن قامتىلعان بالالار سانى تۋرالى مالىمەتتەر مونيتورينگى جۇمىستارىن قامتيدى. وسى مۇمكىندىكتى پايدالانىپ, بالالار مەن ەرەسەكتەرگە ارنالعان 111 ورتالىعىنىڭ سەنىم تەلەفونى تاۋلىك بويى جۇمىس جاسايتىندىعىن ايتقىم كەلەدى», دەپ اتاپ ءوتتى ول.
قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنىڭ اقپاراتتاندىرۋ جانە حالىقتى وقىتۋ ءبولىمىنىڭ باستىعى رۋسلان يمانقۇلوۆ بۇگىنگى كۇنى بالالاردىڭ قاۋىپسىزدىك ماسەلەسى وزەكتى بولىپ وتىرعانىن جەتكىزدى.
«تج كوميتەتى ءبىلىم بەرۋ, دەنساۋلىق ساقتاۋ مينيسترلىكتەرىمەن جانە جەرگىلىكتى اتقارۋشى ورگاندارمەن بىرىگىپ سۋداعى جانە ءورت كەزىندەگى بالالاردىڭ قاۋىپسىزدىگى بويىنشا ءىس-شارالار كەشەنىن وتكىزۋدە. سونىمەن قاتار اعىمداعى جىلدىڭ باسىنان بەرى 40 پروفيلاكتيكالىق بريفينگ وتكىزىلدى. حالىق اراسىندا 73 مىڭنان استام ۇگىتتەۋ ماتەريالدارى تاراتىلدى. قوعامدىق ءتارتىپتى ساقتاۋدى جانە قالالىق جاعاجايلاردا سۋدا زارداپ شەككەن ادامدارعا العاشقى مەديتسينالىق كومەك كورسەتۋدى قامتاماسىز ەتۋ ءۇشىن 44 قوعامدىق قاۋىپسىزدىك بەكەتى جانە 15 مەديتسينالىق پۋنكت قۇرىلدى, 328 كورنەكى ستەند ورناتىلدى. 300 قۇتقارۋ بەكەتى قوسىمشا ۇيىمداستىرىلاتىن بولادى. سۋ ايدىندارىنا جاقىن ورنالاسقان بالالار لاگەرلەرىندە قۇتقارۋشىلار جاعاجايلاردىڭ ءتۇبىن تازارتىپ, ارنايى اقپاراتتىق ستەندتەر ورناتىلۋدا. ءورت قاۋىپسىزدىگىن ساقتاۋ وزەكتى ماسەلەلەردىڭ ءبىرى بولىپ تابىلادى. ساندىق دەرەكتەردى كەلتىرە كەتەيىك: جىل باسىنان بەرى ءبىزدىڭ بولىمشەلەر ءورت قاۋىپسىزدىگى بويىنشا 289 ينتەراكتيۆتى ساباق وتكىزدى, ولارعا 176 969 وقۋشى قاتىستى. ەلىمىزدىڭ 21 مىڭنان استام وقۋشىسى «جاس قۇتقارۋشى» اتتى ۇيىرمەگە قاتىسادى. ءبىز بۇۇ «يۋنيسەف» حالىقارالىق بالالار قورى, قىزىل جارتى اي سياقتى حالىقارالىق قورلارمەن بەلسەندى جۇمىس جۇرگىزەمىز», دەدى ول.
راۋان قايدار, «ەگەمەن قازاقستان»