101-مارتە وتكەن «دجيرو د’يتاليا» كوپكۇندىگى 21-كەزەڭمەن تاريحي قالا ريمدە ءوز مارەسىنە جەتتى. «استانا» كومانداسى ءۇشىن بۇل دودا قيىن وتكەنىمەن, تابىستى اياقتالدى.
قازاقستاندىق كوماندانىڭ بارلىق مۇشەلەرىنىڭ اتسالىسۋىمەن ميگەل انحەل لوپەس سپورتتىق مانسابىندا العاش رەت يتاليالىق گراند-تۋردا جالپى ەسەپتە جۇلدەلى 3-ورىندى يەمدەنىپ, جەڭىس تۇعىرىنا كوتەرىلدى. سونىمەن قاتار 24 جاستاعى لوپەس «دجيرو-2018» ۆەلودوداسىندا ۇزدىك جاس شاباندوز كلاسسيفيكاتسياسى بويىنشا اق جەيدەنى ۇتىپ الدى.
– بۇل ناتيجە «استانا» كومانداسى ءۇشىن دە, مەن ءۇشىن دە ۇلكەن جەتىستىك. سوڭعى جىلدارى دا, وسى جارىس بارىسىندا دا قولداۋ كورسەتكەن كومانداما العىسىمدى ايتقىم كەلەدى. كومانداداعى ارىپتەستەرىمە, كوماندا قىزمەتكەرلەرىنە, سپورتتىق ديرەكتورلارعا, باس مەنەدجەرىمىز الەكساندر ۆينوكۋروۆكە العىسىم شەكسىز! «دجيرودا» ءۇش اپتا بويى تەر توكتىك. جولىمىز بولماعان ساتتەر دە بولدى. سونىمەن قاتار ۇزدىك جاس شاباندوز جەيدەسىن يەمدەنگەنىمە دە قۋانىشتىمىن. «دجيرودا» كوزدەگەنىم اق جەيدە بولاتىن. ەكىنشى ماقساتىم توپ-5-تىك قاتارىنا ەنۋ بولسا, جەڭىس تۇعىرىنا كوتەرىلىپ, جوسپارىمدى ارتىعىمەن ورىنداعانىما ءدان ريزامىن. «دجيرو د’يتاليا» جارىسىندا مەنىڭ جانكۇيەرلەرىم تەك كولۋمبيادا عانا ەمەس, قازاقستاندا دا كوپ ەكەنىن كوردىم – دەدى ميگەل انحەل لوپەس.
«تۋر دە فرانس» پەن «يسپانيا ۆۋەلتاسىنىڭ» جەڭىمپازى بريتاندىق كريس فرۋم «دجيرو د’يتاليا-2018» ۆەلوجارىسىنىڭ قورىتىندىسى بويىنشا جەڭىسكە جەتتى. ال بىلتىرعى يتاليالىق گراند-تۋردىڭ جەڭىمپازى گوللانديالىق توم ديۋمولەن 2-ورىندى يەلەندى.
– بيىلعى وتكەن «دجيرودا» «استانا» تاعى ءبىر مارتە ءوز كۇشىن كورسەتتى. گراند-تۋردىڭ فينالدىق پوديۋمىنا ميگەل انحەل لوپەس سياقتى جاس شاباندوزدىڭ كوتەرىلۋى – بۇل ۇلكەن جەتىستىك. بارلىق كوماندا مەن ميگەل انحەل لوپەستىڭ جەتكەن جەتىستىگىنە كوڭىلىم تولادى. وسى دودادا ءۇش تاماشا جارىس اپتاسىن وتكىزدىك. قورىتىندى ناتيجەمىز – لوپەستىڭ جۇلدەگەرلەر تۇعىرىنا كوتەرىلۋى مەن اق جەيدەنى يەمدەنگەنى, سونىمەن قاتار بيلباونىڭ جالپى ەسەپتە 6-ناتيجەگە قول جەتكىزگەنى ءبىزدى قۋانتادى. ماۋسىمدى جاقسى قارقىنمەن باستادىق. الداعى ۋاقىتتا دا سول قارقىنمەن جالعاستىرامىز, – دەدى باس مەنەدجەر الەكساندر ۆينوكۋروۆ.
«استانا» كومانداسىنىڭ تاعى ءبىر شاباندوزى پەلو بيلباونىڭ دا تاماشا جەتىستىگىن اتاپ وتپەسەك بولماس. ول ءوزىنىڭ سپورتتىق مانسابىندا «دجيرو د’يتاليا» ۆەلوجارىسىنىڭ باس كلاسسيفيكاتسياسى بويىنشا العاش رەت 6-ورىندى يەمدەندى.
«دجيرونىڭ» فينالدىق 21-كەزەڭى ءريمنىڭ ورتالىق كوشەلەرىندە ءوتتى. پەلوتون ءار اينالىمى 11,5 شاقىرىم بولاتىن 10 اينالىمدى ءجۇرىپ ءوتتى. جاپپاي سپرينتپەن اياقتالعان كەزەڭدە يرلانديالىق شاباندوز سەم بەننەتت جەڭىسكە جەتتى.
ەرمۇحامەد ماۋلەن, «ەگەمەن قازاقستان»