ىبراش ەستاەۆ, «ي.ەستاەۆ» شارۋا قوجالىعىنىڭ جەتەكشىسى:
– ەلباسى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ بيزنەستىڭ دامۋىنا كەپىل بولاتىن تاريحي قۇجات دەر ەدىم. تولىپ جاتقان تەكسەرۋلەر, سالىق تولەۋدىڭ, نەسيە الۋدىڭ كۇردەلىلىگى كاسىپكەرلەردى اياعىنان توزدىراتىن, بيزنەستىڭ تۇساۋىنداي بولاتىن. ەندى, مىنە, سونىڭ بارلىعى ىقشامدالدى, جەڭىلدەتىلدى. سونىمەن قاتار بۇل زاڭ بيزنەستىڭ دامۋىنا كەسە-كولدەنەڭ تۇراتىن سىبايلاس جەمقورلىققا دا تۇساۋ بولادى. مىسالى, بۇرىن جەر الۋ ءۇشىن كونكۋرس حابارلاندىرۋى اۋداندىق, نە قالالىق گازەتكە شىقسا جاراي بەرەتىن. ەندى حابارلاندىرۋلار وبلىستىق گازەتتەرگە شىعادى. دەمەك, كونكۋرسقا كوپ كىسى قاتىسادى, باسەكەلەستىك ارتادى, جەردى الۋدا اشىقتىق, مولدىرلىك بولادى دەگەن ءسوز. بۇل اۋىل شارۋاشىلىعى سالاسىنىڭ دامۋىنا, ادامداردىڭ ءوزىن جۇمىسپەن قامتاماسىز ەتۋىنە جاقسى ىقپال جاسايدى.
ولەگ تسوي, «الليۋر گرۋپپ» كومپانيالار توبىنىڭ پرەزيدەنتى:
– زاڭ دەر ۋاقىتىندا شىعىپ وتىر. بۇل قازاقستاندىق بيزنەستى دامىتۋ ءۇشىن تەرەڭ زەرتتەلگەن, مول ەڭبەكتىڭ ناتيجەسى دەپ بىلەمىن. مۇنىڭ بيزنەستى كوپتەگەن كەدەرگىلەردەن ارىلتارىنا سەنەمىن. مىسالى, ءبىز كومپانيادا كوپتەگەن, ءتىپتى كەيبىر جاعدايلاردا ءوزىن ءوزى قايتالايتىن ەسەپ بەرۋلەردى دايىنداۋ, كوشىرۋ ءۇشىن ارنايى قىزمەت ورنىن, مامان ۇستايتىنبىز. ەگەر وسىنداي قاعازباستىلىقتى كوبەيتەتىن 1600 ەسەپتى ءبىرىنشى دەڭگەيدە 600-گە قىسقارتسا, ءبىزدىڭ دە التىن ۋاقىتىمىز ءمانسىز كەتپەيدى, ماتەريالدىق شىعىن دا, قارجى دا ۇنەمدەلەتىن بولادى.
ولەگ دانيلەنكو, «اگروفيرما ديەۆسكايا» جشس ديرەكتورى:
– پرەزيدەنت جاريا تۇردە قول قويىپ وتىرعان زاڭ ەلىمىزدە جالپى بيزنەستىڭ دامۋىنا ىقپال ەتەدى. اسىرەسە اۋىل شارۋاشىلىعىنداعى كاسىپكەرلىككە مول جول اشارىنا سەنىمىم مول. اۋىلداعى ەڭبەك ادامى زاڭدى بىلە بەرمەيتىنى راس. كەيدە بولماشىعا ايىپپۇل تولەيدى, ول كاسىپتى باستاعانداردىڭ مەسەلىن قايتارىپ تاستايدى, ويتكەنى جۇرگەن-تۇرعاننىڭ, ورتالىققا قاتىناعاننىڭ بارلىعى دا اۋىلداعىلارعا اقشالاي شىعىن ەمەس پە؟ 14 كودەكسكە جانە 109 زاڭعا 1000-عا جۋىق تۇزەتۋلەر ەنگىزۋ بۇل ەلىمىزدەگى بيزنەس احۋالدى جاقسارتۋ ءۇشىن جاسالعان ءىرى رەفورما ەكەنى انىق. شاعىن جانە ورتا بيزنەستىڭ دامۋىنا تاعى دا يگى قادام جاسالىپ وتىر.