قازىرگى قازاق پوەزياسىنىڭ كورنەكتى وكىلى, ارداكۇرەڭ اقىن عالىم جايلىباي ەسىمى جىرسۇيەر قاۋىمعا جاقسى تانىس. سونىمەن بىرگە تۇركى دۇنيەسىنە دە, الىس-جاقىن شەتەلدەردىڭ دە ءبىرسىپىراسىنا تانىمال دەپ ايتا الامىز. ول – ەلشىل اقىن, سىرشىل اقىن, سىرباز اقىن. الپىستىڭ اسقار بەلەسىنە جەتكەن شايىردى تۋعان ەل-جۇرتى ارداقتاپ, قۇرمەت كورسەتىپ وتكىزگەن «اقىن عالىم جايلىباي قاراعاندىعا شاقىرادى» اتتى حالىقارالىق پوەزيا مەرەكەسى قازاق جىرىنىڭ مەرەيىن اسقاقتاتتى دەسەك, ارتىق ايتقاندىق ەمەس.
تۋعان حالقىنىڭ, زامانداستارىنىڭ جان سارايىن اشىپ, جۇرەك ءلۇپىلىن, ىزگى قاسيەتتەرىن, ۇكىلى ۇمىتتەرىن, ءمولدىر سەزىمدەرىن, مۇڭ-شەرى مەن قۋانىش-شاتتىعىن ەگىلتىپ-توگىلتىپ جىرلاي الساڭ عانا ناعىز اقىنسىڭ. وسى تۇرعىدان كەلگەندە عالىم اقىننىڭ ازاماتتىق بولمىسى شىنايى, پەرزەنتتىك پارىزى كىرپىك قاقپايدى. كەزىندە اكادەميك سەرىك قيراباەۆ, تۇمانباي مولداعاليەۆ, فاريزا وڭعارسىنوۆا سياقتى ادەبيەت ابىزدارىنان جوعارى باعاسىن العان ونىڭ ليرو-پالساپالىق پوەزياسى ايرىقشا ارداق تۇتۋعا لايىق, ۇلتتىڭ رۋحاني قازىناسىنا قوسىلعان ولجا ەكەندىگى ءسوزسىز. ارقا ءتوسىن اردا ەمگەن ع.جايلىبايدىڭ سىرشىل ولەڭدەرى اعىلشىن, ورىس, ۋكراين, تۇرىك, قىرعىز, تاتار, وزبەك, باشقۇرت, تاعى باسقا حالىقتاردىڭ تىلدەرىنە اۋدارىلعان. وننان استام جىر جيناعى شىقتى. العاش وقىرمانعا «ەگەمەن قازاقستان» گازەتىنىڭ بەتتەرىنەن جول تارتقان «اق سيسا», «قارا ورامال», «تاماكوشكەن» پوەمالارى داستانشىلدىق ءداستۇرىن دامىتقان ءارى جاڭاشىلدىعىمەن قۇندى. وسىلاردىڭ ىشىندە 14 تىلگە اۋدارىلعان «قارا ورامال» پوەماسى وتكەن جىلى شۆەتسيانىڭ ستوكگولم قالاسىندا ەۋرازيالىق شىعارماشىلىق گيلدياسى جانە Herdforshire Press باسپاسى ۇيىمداستىرعان ءVى ەۋرازيالىق اشىق بايقاۋىندا پوەزيا نوميناتسياسى بويىنشا قارا ءۇزىپ, جۇلدەگەر اتانۋى اقىننىڭ ءوزىنىڭ عانا ەمەس, جالپى ادەبيەتىمىزدىڭ قۇت-قۋانىشى بولعان-دى.
سونىمەن قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى, حالىقارالىق «الاش» ادەبي سىيلىعىنىڭ لاۋرەاتى, رەسەي جازۋشىلار وداعىنىڭ س. ەسەنين التىن مەدالىنىڭ يەگەرى عالىم جايلىبايدىڭ جىر مەرەكەسى قازاقتىڭ اقيىق اقىنى قاسىم امانجولوۆتىڭ ەسكەرتكىشىنە گۇل شوقتارىن قويىپ, رۋحىنا تاعزىم ەتۋمەن باستالدى. ەلىمىزدىڭ ءار تارابىنان كەلگەن ساڭلاق اقىندار وسى ارادا جۇرەكجاردى لەبىزدەرى مەن جىر شۋماقتارىنان شاشۋ شاشتى.
ودان ءارى حالىقارالىق جىر مەرەكەسى ك.ستانيسلاۆسكي اتىنداعى ورىس دراما تەاترىنىڭ عيماراتىندا جالعاستى. مۇندا جيىلعان جۇرت س.قوجامقۇلوۆ اتىنداعى جەزقازعان مۋزىكالى-دراما تەاترى ع.جايلىبايدىڭ «قارا ورامال» پوەماسى بويىنشا دايىنداعان قويىلىمىن تاماشالادى.
«رۋحاني جاڭعىرۋ» مۇراتىمەن ساباقتاسقان مەرەيتوي يەسىنىڭ «اققۋلاردىڭ جىر جازدىم قاناتىنا» اتتى شىعارماشىلىق كەشى كەنشىلەردىڭ مادەنيەت سارايىندا ءوتتى.
قاراعاندى وبلىسىنىڭ اكىمى ەرلان قوشانوۆ قازداۋىستى قازىبەك بي, بۇقار جىراۋداي ۇلىلار شىققان توپىراقتىڭ ونەرگە كەن, تالانتقا باي ەكەندىگىن ايتا كەلە, عالىم اقىننىڭ كەشەگى سۇڭقار ساكەندەر مەن داۋىلپاز قاسىمداردىڭ لايىقتى جالعاسى ەكەندىگىن اتاپ كورسەتتى. قاسيەتتى قاراعاندى ەلى داۋسىز دارىندارىن ارداقتايدى دەي كەلە, ەرلان جاقان ۇلى ۇكىمەت باسشىسى باقىتجان ساعىنتاەۆتىڭ مەرەيتوي يەسىنە جولداعان قۇتتىقتاۋىن وقىپ بەرىپ, اقىنعا الدا ۇلكەن شىعارماشىلىق تابىستار تىلەدى. قازاقتىڭ ۇلكەن قايراتكەر اقىنى, مەملەكەتتىك سىيلىقتىڭ لاۋرەاتى نۇرلان ورازالين قالامداس, سىيلاس ءىنىسى عالىم جايلىبايدىڭ شىعارماشىلىعى, ازاماتتىڭ بولمىس-كەلبەتى جايلى كەڭىنەن, كوسىلە تولعاپ, ونىڭ قازاق جىرىنىڭ بۇگىنگى ۇلكەن تۇلعاسىنا اينالعاندىعىن قاداپ ايتتى. وسى تويعا انكارادان ات تەرلەتىپ جەتكەن «تۇركسوي» ۇيىمىنىڭ باس حاتشىسى دۇيسەن قاسەيىنوۆ ع.جايلىبايدىڭ تۇركى دۇنيەسىنە ءسىڭىرىپ جۇرگەن ەرەن ەڭبەگىنە باسا توقتالدى.
ال «ەگەمەن قازاقستان» گازەتىنىڭ باسشىسى دارحان قىدىرالى اقىنعا دەگەن ءوزىنىڭ ىزگى تىلەگى مەن وتانىمىزدىڭ باس گازەتىنىڭ سالەمىن جەتكىزدى. سونداي-اق جازۋشى قاۋىمنىڭ تىلەكتەستىگىن قازاقستان جازۋشىلار وداعى باسقارما توراعاسىنىڭ ورىنباسارى باقىت بەدەلحان ۇلى جەتكىزسە, مەرەيتوي يەسىنە مادەنيەت جانە سپورت ءمينيسترى ا.مۇحامەدي ۇلىنىڭ قۇتتىقتاۋىن وسى مينيسترلىكتىڭ وكىلى تابىستادى.
الماتىدان, استانادان جانە باسقا وڭىرلەردەن كەلگەن اقىن اعالارى مەن زامانداستاردىڭ يگى لەبىزدەرى, جىر شاشۋلارى مەرەيتوي مەرەكەسىن شىرايلاندىرا ءتۇستى. تۇركيادان, وزبەكستاننان, تاتارستان مەن باشقۇرتستاننان كەلگەن مەيماندار تۋىس حالىقتار اراسىنداعى ادەبي-مادەني بايلانىستار جايلى ريزاشىلىقپەن ايتىپ, عالىم جايلىبايدىڭ ءوز تىلدەرىندە جاڭا شىققان جىر جيناقتارىن جارقىراتا سۇيىنشىلەدى. عالىم اقىننىڭ عالامى وسىلاي قۋاندىردى.
قورعانبەك امانجول, «ەگەمەن قازاقستان»