كۇن سايىنعى جۇمىس ساپارى كەزىندە باۋىرجان بايبەك الماتىنىڭ كولىك جانە جۇرگىنشى ينفراقۇرىلىمى قۇرىلىسىنىڭ بارىسىن تەكسەردى. مەگاپوليس باسشىسى بىرنەشە ساعات ىشىندە اباي, بايتۇرسىنوۆ, اسقاروۆ, گاگارين كوشەلەرىن ارالاپ شىعىپ, ولاردى ودان ءارى كورىكتەندىرۋ بويىنشا بىرقاتار تاپسىرمالار بەردى, دەپ حابارلايدى قالالىق اكىمدىكتىڭ ءباسپاسوز قىزمەتى.
«مامىردىڭ سوڭىنا دەيىن گاگارين داڭعىلىن ءال-فارابيدەن تيميريازەۆ كوشەسىنە دەيىنگى جولداردى قايتا جاساۋ اياقتالادى. ۇزىندىعى ءۇش شاقىرىمنان اساتىن جاڭارعان جولمەن قاتار جاياۋ جۇرگىنشىلەر تروتۋارلارى اباتتاندىرىلىپ, ارىق جەلىلەرى سالىنادى. پايدالانىلمايتىن كونسترۋكتسيالار مەن زاڭسىز قۇرىلىستار بۇزىلىپ, سونان سوڭ كوشەلەردى كوگالداندىرۋ جوسپارلانعان. جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن كولىك تۇراقتارى, داڭعىل جيەگىندەگى تروتۋارلار قالپىنا كەلتىرىلۋدە. تۇرعىنداردىڭ تالابىن ەسكەرە وتىرىپ, گاگارين مەن قوجابەكوۆ كوشەلەرىنىڭ قيىلىسىنا باعدارشام ورناتۋ مۇمكىندىگى قاراستىرىلۋدا. «Baykonyr» بيزنەس-ورتالىعى الدىنداعى جۇرگىنشى ايماعى كەڭەيىپ, كولىك تۇراعى جىڭىشكەرەدى»-دەلىنگەن اكىمدىكتىڭ حابارلاماسىندا.
سونداي-اق, الماتى اكىمى بايتۇرسىنوۆ كوشەسىن ارالاعان كەزدە زاڭسىز سالىنعان ءدامحانانىڭ جازعى تەرراسىن الىپ تاستاپ, جۇرگىنشى ۋچاسكەسىن قالپىنا كەلتىرۋدى تاپسىردى.
ەسكە سالساق, بيىلعى جازدا الماتىدا 150 كوشە جوندەلەدى, 30 كم تروتۋارلار جاسالادى, 600 اۋلا كورىكتەندىرىلەدى. بارلىق جەر استى وتپەلى جولدار كۇردەلى جوندەلەدى, جاڭا فونتاندار سالىنادى. بۇرىن قايتا جاسالعان پانفيلوۆ, جىبەك جولى, گوگول, قابانباي باتىر, بايسەيىتوۆا, تولەباەۆ كوشەلەرى مەن «استانا» الاڭىنان وزگە مەگاپوليستىڭ بىرقاتار نەگىزگى داڭعىلدارى تۇگەلدەي جاڭارادى.