ءماجىلىس سپيكەرى نۇرلان نىعماتۋليننىڭ توراعالىق ەتۋىمەن پالاتانىڭ جالپى وتىرىسى ءوتتى. وندا الەۋمەتتىك قامسىزداندىرۋعا قاتىستى زاڭ جوباسى ەكىنشى وقىلىمدا ماقۇلداندى.
ءماجىلىس توراعاسى ماقۇلدانعان جاڭا زاڭ جوباسىنىڭ قازاقستاندىقتار ءۇشىن ماڭىزدىلىعىنا توقتالا وتىرىپ, قۇجات ەلباسىنىڭ ەكىنشى الەۋمەتتىك باستاماسىن جۇزەگە اسىرۋعا سەپتىگىن تيگىزەتىنىن, تومەن جالاقى الاتىن جۇمىسشىلاردىڭ سالىق جۇكتەمەسىن 10 ەسەگە ازايتۋعا باعىتتالعانىن اتاپ ءوتتى.
«بۇگىن ءبىز الەۋمەتتىك ماڭىزى زور تاعى ءبىر زاڭ جوباسىن ماقۇلدادىق. ەڭ باستىسى – بۇل قۇجات تىكەلەي ەلباسىمىزدىڭ بەس باستاماسىندا ايتىلعان ەكىنشى باستامانى جۇزەگە اسىرۋعا باعىتتالىپ وتىر. وسى وزگەرىستەر جالاقىسى تومەن ازاماتتارىمىزدىڭ تابىسىن كوبەيتۋگە زور ىقپال ەتەتىنى ءسوزسىز», دەدى ن.نىعماتۋلين.
قۇجاتتا قاراستىرىلعان تۇزەتۋلەر سالىق كودەكسى مەن سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى زاڭعا ەنگىزىلمەك. اتاپ ايتقاندا, ەڭبەكاقىسى ايىنا ايلىق ەسەپتىك كورسەتكىشتىڭ 25 ەسەلەنگەن مولشەرىنەن اسپايتىن جۇمىسكەرلەرگە سالىناتىن سالىق مولشەرلەمەسى ازايادى. بۇل نورما 2019 جىلعى 1 قاڭتاردان باستاپ قولدانىسقا ەنگىزىلەدى. وسى باستامانىڭ ناتيجەسىندە, ەلدەگى جۇمىسشىلاردىڭ كەمىندە ۇشتەن ەكىسىنىڭ, ياعني ەكى ميلليوننان استام ادامنىڭ جالاقىسى كوبەيەدى. ونىڭ ۇستىنە, جۇمىس بەرۋشىلەرگە اۋىرتپالىق سالىنبايدى.
زاڭ جوباسى اياسىندا بالا كەزىنەن ءبىرىنشى توپتاعى مۇگەدەكتى كۇتىپ-باعۋدى جۇزەگە اسىراتىن ادامعا اي سايىن مەملەكەتتىك جاردەماقى تولەۋدى ەنگىزۋ قاراستىرىلعان.
سونداي-اق دەپۋتاتتار اتاۋلى الەۋمەتتىك كومەكتى تاعايىنداۋ جانە تولەۋ كەزەڭىن ناقتىلاۋ, الەۋمەتتىك كەلىسىمشارتتى ۇزارتۋ جانە ونىڭ ەرەجەلەرىن وزگەرتۋ تالاپتارىن جانە شارتتى اقشالاي كومەكتى الۋشىلار ساناتتارىن ناقتىلاۋ بولىگىنە تۇزەتۋ ەنگىزدى.
زاڭ جوباسى بويىنشا بالالاردى وڭالتۋدى ەرتە قولعا الۋدىڭ ماڭىزدىلىعىن ەسكەرە وتىرىپ, اۋدان ورتالىقتارىندا مۇمكىندىكتەرى شەكتەۋلى بالالاردى پسيحولوگيالىق, مەديتسينالىق جانە پەداگوگيكالىق تۇزەۋ ارقىلى قولداۋ كابينەتتەرىن اشۋ جوسپارلانعان.
وسى رەتتە باسقا ادامنىڭ كومەگىنە مۇقتاج ءبىرىنشى توپتاعى مۇگەدەكتى, ەكىنشى توپتاعى جالعىزىلىكتى مۇگەدەكتى جانە جاسىنا بايلانىستى زەينەتكەردى, سونداي-اق سەكسەن جاسقا تولعان قارت ادامدى كۇتىپ-باعۋ كەزەڭدەرىن زەينەتاقى جۇيەسىنە قاتىسۋ وتىلىنە قوسۋ بويىنشا قوسىمشا تۇزەتۋلەر ەنگىزدى.
بۇدان بولەك, وتىرىستا دەپۋتاتتار تاۋەكەلدىك (ۆەنچۋرلىك) قارجىلاندىرۋ تۋرالى زاڭ جوباسىن ءبىرىنشى وقىلىمدا ماقۇلدادى. زاڭ جوباسى تۋرالى ينۆەستيتسيالار جانە دامۋ ءمينيسترى جەڭىس قاسىمبەك بايانداما جاسادى.
ءمينيستردىڭ ايتۋىنشا, زاڭ جوباسىنىڭ ماقساتى – ۆەنچۋرلىق قارجىلاندىرۋدى دامىتۋ ءۇشىن قۇقىقتىق بازا قۇرۋ جانە يننوۆاتسيالىق قىزمەتتى مەملەكەتتىك قولداۋ جۇيەسىن دامىتۋ. سونىمەن قاتار ۆەنچۋرلىق قىزمەتتى قولداۋداعى مەملەكەتتىڭ ءرولى كۇشەيتىلەدى. ينۆەستورلاردىڭ, باسقارۋشى كومپانيالاردىڭ, ۆەنچۋرلىق قورلاردىڭ وزدەرىنىڭ وكىلەتتىكتەرىن جانە مىندەتتەرىن جۇزەگە اسىرۋداعى قارىم-قاتىناستارىن رەتتەۋ ءۇشىن جاڭا شارتتىق قۇرالدار ەنگىزىلەدى.
سونداي-اق تۇزەتۋلەر يندۋستريالىق-يننوۆاتسيالىق قىزمەتتى قولداۋ شارالارىن تولىقتىرىپ, ۆەنچۋرلىق قورلارعا مەملەكەتتىك قارجىلاندىرۋدىڭ جاڭا تەتىگىنە اينالماق.
يندۋستريالىق-يننوۆاتسيالىق ينفراقۇرىلىمنىڭ ەلەمەنتى رەتىندە ۆەنچۋرلىق قوردىڭ انىقتاماسى, دامۋ ينستيتۋتتارى جانە باسقا دا ۇلتتىق كومپانيالار ارقىلى ۆەنچۋرلىق قورلار تاراپىنان تەڭ قارجىلاندىرۋ مۇمكىندىگى, تيىمدىلىكتى باعالاۋعا نەگىزدەلگەن تاسىلدەردى ەنگىزۋ ماسەلەلەرى دە قاراستىرىلعان.
«زاڭ جوباسىن قابىلداۋ ارقىلى جەكە ۆەنچۋرلىق كاپيتال نارىعىن ىنتالاندىرۋ, تسيفرلى جانە باسقا دا يننوۆاتسيالىق شەشىمدەردى ازىرلەۋشىلەردىڭ ءوز ەكوجۇيەلەرىن دامىتۋ, ناقتى سەكتوردىڭ يننوۆاتسيالىق بەلسەندىلىگىن ارتتىرۋ, شەتەلدىك ينۆەستيتسيالاردى تارتۋ, جاڭا جۇمىس ورىندارىن اشۋ, ينتەللەكتۋالدى رەسۋرستار اعىنىن كوبەيتۋ سياقتى جۇمىستاردى اتقارامىز», دەدى ۆەدومستۆو باسشىسى.
جالپى وتىرىستا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىعا ءتۇستى. اتالعان ماسەلە بويىنشا ادىلەت ءمينيسترى مارات بەكەتاەۆ بايانداما جاسادى.
كونستيتۋتسيالىق زاڭ جوباسىندا ءماسليحاتتاردىڭ دەپۋتاتتارىن سايلاۋدىڭ پروپورتسيونالدى جۇيەسىن ەنگىزۋ قاراستىرىلعان. اۋداندىق ماڭىزى بار قالانىڭ, اۋىلدىڭ, اۋىلدىق وكرۋگ اكىمدەرىنىڭ تىكەلەي سايلاۋىن ەنگىزۋ ۇسىنىلادى. وكرۋگتىك سايلاۋ كوميسسيالارى تاراتىلادى. سونىمەن قاتار زاڭ جوباسىنىڭ جاڭالىقتاردىڭ ءبىرى سايلاۋشىلار ءتىزىمىن تسيفرلاندىرۋ بولىپ تابىلادى.
ء«ماسليحات دەپۋتاتتارىن سايلاۋ پروتسەسىن جەتىلدىرۋگە بايلانىستى اۋداندىق سايلاۋ كوميسسيالارىن جويۋ ۇسىنىلادى. ولاردىڭ قىزمەتتەرى مەن وكىلەتتىكتەرى اۋماقتىق سايلاۋ كوميسسيالارىنا بەرىلەدى. ولاردىڭ ەكى مۇشەسى وزدەرىنىڭ وكىلەتتىكتەرىن تۇراقتى كاسىبي نەگىزدە جۇزەگە اسىرادى», دەدى مينيستر.
ۆەدومستۆو باسشىسى اۋىلدىق دەڭگەيدەگى اكىمدەردى سايلاۋ قالاي جۇرگىزىلەتىنىن ءتۇسىندىردى. اكىمدى جەرگىلىكتى تۇرعىندار جاسىرىن داۋىس بەرۋ ارقىلى ءتورت جىل مەرزىمگە سايلايدى. بۇدان بولەك, جەكە تۇلعالار تۋرالى مەملەكەتتىك دەرەكتەر بازاسىن ينتەگراتسيالاۋ ارقىلى سايلاۋشىلاردىڭ تىزىمدەرىن قۇراستىرۋ ءتارتىبىن قايتا قاراۋ ۇسىنىلادى.
سونىمەن قاتار كونستيتۋتسيالىق زاڭعا وزگەرتۋلەر مەن تولىقتىرۋلار ەنگىزۋ بيۋدجەت كودەكسىنە, اكىمشىلىك قۇقىق بۇزۋشىلىق تۋرالى كودەكسكە, جەرگىلىكتى ءوزىن-ءوزى باسقارۋ جانە ءوزىن-ءوزى باسقارۋ تۋرالى زاڭدارعا, ساياسي پارتيالارعا جانە مەملەكەتتىك قىزمەتكە قاتىستى وزگەرىستەر مەن تولىقتىرۋلار ەنگىزۋدى كوزدەيدى.
سونىمەن اتالعان زاڭ جوباسى دەپۋتاتتار تاراپىنان ماقۇلداندى.
ءماجىلىس, سونداي-اق ءدىني قىزمەت جانە ءدىني بىرلەستىكتەرگە قاتىستى زاڭنامالىق تۇزەتۋلەردى, سونداي-اق «قازاقستان رەسپۋبليكاسىنىڭ قاۋىپسىزدىك كەڭەسى تۋرالى» زاڭ جوبالارىن تۇزەتۋلەرمەن ماقۇلدادى.
بۇگىنگى كۇنى پالاتا ءتيىستى كوميتەتتەردىڭ ۇسىنىسىمەن اگروونەركاسىپتىك كەشەندى رەتتەۋ تۋرالى زاڭنامالىق تۇزەتۋلەردى, سونداي-اق ەسىرتكى, پسيحوتروپتىق زاتتار, سول تەكتەستەر مەن پرەكۋرسورلار اينالىمىن باقىلاۋدى جالعاستىرۋعا قاتىستى جۇمىستى ودان ءارى جۇرگىزەتىن بولدى. بۇدان بولەك, دەپۋتاتتار قازاقستان-قىرعىزستان مەملەكەتتىك شەكاراسىن شەگەندەۋ تۋرالى شارتتى راتيفيكاتسيالاۋ تۋرالى زاڭ جوباسىن جۇمىسقا الدى.
وتىرىس سوڭىندا بىرقاتار دەپۋتاتتار ورتالىق مەملەكەتتىك ورگانداردىڭ باسشىلارىنا ساۋالدار جولدادى.
اباي اسانكەلدى ۇلى,
«ەگەمەن قازاقستان»