اقىن, جازۋشى, ءىى دۇنيەجۇزلىك سوعىستىڭ ارداگەرى ل.يۋ.گيرش ەسىمى وقىرماندار ورتاسىنا جاقسى تانىس. ون جەتى جاسىندا قولىنا قارۋ الىپ, 1941 جىلى ەرىكتىلەر قاتارىندا ءوزى تۋىپ-وسكەن ۋكراينا جەرىنەن مايدانعا اتتانعان, بۇگىندە زاپاستاعى پولكوۆنيك, قازاقستان حالقى اسسامبلەياسىنىڭ مۇشەسى, لەونيد يۋزەفوۆيچ گيرش دوستىق ۇيىندە جينالعان قالىڭ كوپشىلىككە «ستيحي و ۆوينە ي ميرە» ولەڭدەر جيناعىن تانىستىردى.
ل.گيرشتىڭ بەيبىت حالىقتارعا الاپات قاسىرەت اكەلگەن سۇراپىل سوعىستىڭ زاردابى تۋرالى تولعاعان تۋىندىلارى «ناەدينە س پامياتيۋ», «سكۆوز پلاميا ۆوينى», «وگنەننىي ستالينگراد», «بليزكو ك سەردتسۋ», ت.ب. جيناقتارى ارقىلى بەلگىلى.
جينالعان كوپشىلىكتى مايدانگەردىڭ جاڭا تۋىندىسىمەن تانىستىرعان الماتى قالاسى اكىمىنىڭ ورىنباسارى ارمان قىرىقباەۆ ل.گيرشتىڭ ەرەن ەرلىگىمەن قاتار بەيبىت كەزەڭدەگى قوعامدىق ەڭبەكتەرىنە توقتالدى. جاستارعا پاتريوتتىق رۋح بەرەتىن جيناقتى الداعى ۋاقىتتا ناسيحاتتاۋ ماقساتىنداعى اكىمشىلىك جوسپارلارىنان حاباردار ەتتى. مايدانگەردىڭ شىعارماشىلىعى تۋرالى قحا توراعاسىنىڭ ورىنباسارى, قر پرەزيدەنتى اكىمشىلىگى حاتشىلىق مەڭگەرۋشىسى ل.پروكوپەنكو, جازۋشى, قوعام قايراتكەرى و.سۇلەيمەنوۆ, كىتاپتىڭ رەداكتورى ە.فرولوۆسكايا, «پروستور» جۋرنالىنىڭ باس رەداكتورى ل.ك.شاشكوۆا, م.اۋەزوۆ اتىنداعى ادەبيەت جانە ونەر ينستيتۋتىنىڭ ءبولىم مەڭگەرۋشىسى س.ۆ.انانەۆا, ت.ب. قوعام قايراتكەرلەرى پىكىرلەرىن ءبىلدىرىپ, «ارىستان» ليتسەيىنىڭ وقۋشىلارى ولەڭدەرىن وقىدى.
كىتاپقا ەنگەن ولەڭدەرى بۇگىندە 94 جاستى ەڭسەرگەن قارت مايدانگەردىڭ كەشەگى سوعىس دالاسىندا كورگەن, كوكىرەگىنەن وشىرە المايتىن قاسىرەتتى كۇندەردىڭ ەستەلىگىندەي. سۇراپىل سوعىس دالاسىندا جوعالتقان جاستىق شاعى, وتباسىنىڭ قاسىرەتتى جىلدارى, مايدانگەر جولداستارىنىڭ, اسىعا جەتكەن جەڭىس كۇنىنىڭ قۋانىشى, ءبارى-ءبارى دە مايدانگەر داپتەرىندە جىپتەي تىزىلگەن.
سوعىس دالاسىندا قانشاما قيىن-قىستاۋ كۇندەردى باستان كەشىرگەنىمەن مايدانگەر-جازۋشى ولەڭ جازۋعا دەگەن قۇشتارلىعىن جوعالتقان جوق. ستالينگراد, بەرلين, پراگانى ازات ەتۋگە قاتىستى. قارۋلى كۇشتەردە قىرىق ءۇش جىل قىزمەت ەتىپ, كوپتەگەن ماراپاتتارعا يە بولدى. 1959 جىلدان باستاپ الماتى جانە الماتى وبلىسى ازاماتتىق قورعانىسىندا شتاب باستىعى, «كازاحستانسكايا پراۆدا» گازەتىنىڭ حالىقارالىق مايدان كلۋبىنىڭ پرەزيدەنتى بولىپ قىزمەت ەتتى. سوعىستان كەيىنگى جىلداردا جاس ادەبيەتشىنىڭ موريس سيماشكومەن تانىستىعى ادەبيەت الەمىنە دەگەن قىزىعۋشىلىعىن ارتتىرا ءتۇستى. م.سيماشكو گريشتىڭ ەڭ جاقىن تالىمگەر جولداسىنا اينالدى. ال كەيىنگى جىلداردا و.سۇلەيمەنوۆ, ب.قاناپيانوۆ, گ.تولماچەۆ, د.سنەگين جانە ت.ب. قالامگەرلەرمەن جولداستىعى مايدان تاقىرىبىن ارى قاراي جەتىلدىرۋگە ىقپال ەتتى.
ل.گيرشتىڭ «ستيحي و ۆوينە ي ميرە» جيناعىندا سول سۇراپىل جىلداردىڭ ەستەلىگىمەن قاتار جاڭا جازىلعان تۋىندىلارى دا ەنگەن.
بۇگىندە قوعامدىق جۇمىستاردىڭ بەلسەندىسى ل.گيرش ءوزىنىڭ پاتريوتتىق ولەڭدەرىن ستۋدەنتتەر مەن مەكتەپ وقۋشىلارىنا وقىپ بەرۋگە ءار كەز دايىن ەكەندىگىن ءبىلدىرىپ, سوعىس قاسىرەتى ادامزاتتىڭ جادىنان ەشقاشان وشپەك ەمەس, دەدى.
ەلۆيرا سەرىكقىزى,
«ەگەمەن قازاقستان»