ۇستىمىزدەگى جىلدىڭ 5 مامىرى كۇنى ءوتۋى ءتيىس بولعان گولوۆكين مەن الۆارەس اراسىنداعى سۇراپىل بوكس كەشى 15 قىركۇيەك كۇنى ءوتۋى مۇمكىن.
بۇل جايىندا ESPN تەلەارناسىنىڭ جۋرناليستەرى ايتتى. تانىمال جۋرناليست دەن رافاەل: «بۇل كەزدەسۋدىڭ وتەتىنى انىق. تۋرا بىلتىرعىداي T-Mobile Arena كەشەنىندە بولادى», دەدى. ال ودان كەيىن ونىڭ ارىپتەسى برايان كەمپبەلل «كەزدەسۋ مەكسيكانىڭ تاۋەلسىزدىگى كۇنىنە ورايلاستىرىپ, 15 قىركۇيەكتە وتەدى», دەپ قوستاپ ءوتتى.
ايتا كەتەيىك, قوس بوكسشى وتكەن جىلى 15 قىركۇيەكتە كەزدەسىپ, تورەشىلەردىڭ شەشىمىمەن تەڭ تارقاسقان بولاتىن.
مەسسي «التىن بۋتسى» يەگەرى
«بارسەلونانىڭ» شابۋىلشىسى ليونەل مەسسي 2017-2018 جىلعى ماۋسىمنىڭ «التىن بۋتسىسىن» يەلەندى. ارگەنتينالىق ويىنشى بيىل يسپان لا-ليگاسىندا 34 گول سوعىپ, 68 ۇپاي جينادى.
نەگىزگى باسەكەلەسى مىسىرلىق مۇحامەد سالاح 64 ۇپايمەن ەكىنشى ورىندا. «ليۆەرپۋل» شابۋىلشىسى اعىلشىن پرەمەر-ليگاسىندا 32 گول سوقتى.
مەسسي ءوزىنىڭ سپورتتىق عۇمىرىندا «التىن بۋتسىدى» 5-رەت الىپ وتىر. بۇل الەم فۋتبولىنداعى جاڭا رەكورد. ال «رەال» ويىنشىسى كريشتيانۋ رونالدۋ بۇل ماراپاتتى 4-رەت ۇتقان ەدى.
لوپەس 2-ورىندى يەمدەندى
اتاقتى دزونكولان اسۋىندا كورسەتكەن ناتيجەلەرىنەن كەيىن «استانا» كومانداسىنىڭ كاپيتانى ميگەل انحەل لوپەس تاعى دا كوزگە ءتۇستى.
«دجيرو د’يتاليا» ۆەلوجارىسىنىڭ 15-كەزەڭىندە لوپەس جۇلدەلى 2-ورىندى يەمدەندى. «استانا» كاپيتانى فينيشكە جالپى ەسەپتىڭ فاۆوريتتەرىنەن قۇرالعان شاعىن توپپەن بىرگە, قىزعىلت جەيدە يەگەرى سايمون يەيتستەن 41 سەكۋند ۋاقىتتان كەيىن كەلىپ, سپرينتتە جەڭىمپاز اتاندى. سونىمەن قاتار 15-كەزەڭنىڭ ناتيجەسى بويىنشا ميگەل انحەل ۇزدىك جاس شاباندوزدىڭ اق جەيدەسىن ساقتاپ قالدى.