وزگەلەردىڭ ەسەبىنەن جەرگىلىكتى بيۋدجەتتىڭ قورجىنىن تولتىرۋدى كوزدەگەن پەتروپاۆلدىق شەنەۋنىكتەردىڭ ارەكەتى تۇرعىنداردى اڭ-تاڭ قالدىرىپ وتىر.
«ەستىمەگەن ەلدە كوپ» دەگەن راس-اۋ! ءبىر بولمەلى پاتەردى ساتۋعا كونكۋرس جاريالاعان پەتروپاۆل قالاسى اكىمدىگىنىڭ قىزمەتكەرلەرى وعان اكەلەرىنىڭ قۇنىن سۇراپ, ايدى اسپاننان بىراق شىعاردى. نارىقتاعى باعاسى ءارى كەتسە 5 ميلليون تەڭگەنى قۇرايتىن باسپانانى 33 ميلليون تەڭگەگە پۇلداعانىن ەستىگەن جۇرتشىلىق سەنەر-سەنبەسىن بىلمەي دال.
حابارلاندىرۋدى اكىمدىكتەگىلەر مەملەكەتتىك ساتىپ الۋ جارنامالارىن ورنالاستىراتىن سايتتا جاريالاپ, اينالانى ۋ-شۋعا بولەپ جىبەردى. ءبىر بولمەلى پاتەردىڭ قۇنى 33 ميلليون تەڭگەدەن اسپاۋى ءتيىس دەگەن تالاپتىڭ قايدان الىنعانى بەلگىسىز. ولاردىڭ تۇسىندىرۋىنشە نارىقتاعىدان باقانداي التى ەسە قىمبات باسپانانى قىزمەتتىك ورىن رەتىندە پايدالانباقشى كورىنەدى ەكەن. كىمدەر ءۇشىن ەكەنى اشىپ ايتىلمايدى. ءبىر عانا بەلگىلىسى–قازىنا قارجىسىنىڭ بەي-بەرەكەتسىز جۇمسالاتىنى عانا.
قالا اكىمىنىڭ وىنباسارى ءسانيا يسمايلوۆا مۇنداي حابارلاندىرۋدىڭ سايتتا ورنالاسقانىن جوققا شىعارمادى. ونىڭ ايتۋىنشا پاتەر كۇردەلى جوندەۋدەن ءوتۋى جانە جيحازدارمەن تولىق جابدىقتالۋى, اۋماعى 80 شارشى مەتردەن كەم بولماۋى بولۋى ءتيىس.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى