مۇعالىم مەن اتا-انا اراسىنداعى تىعىز بايلانىس وقۋشىنىڭ ءتارتىبى مەن ۇلگەرىمىن ۇدايى قاداعالاپ وتىرۋعا مۇمكىندىك بەرەدى. بۇل ءوز كەزەگىندە ءبىلىم ساپاسى مەن اتا-انالاردىڭ پەرزەنتى الدىنداعى جاۋاپكەرشىلىگىنىڭ ارتۋىنا دا سەپتىگىن تيگىزەتىنى انىق. ەلىمىزدىڭ بارلىق مەكتەپتەرىندە وتكەن جالپىۇلتتىق اتا-انالار جينالىسىندا الماتىداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە بولىپ ۇستاز بەن اتا-انا اراسىنداعى ىنتىماقتاستىقتىڭ ۇزدىك ۇلگىسىنە كۋا بولدىق.
ەلىمىزدەگى ەڭ ىرگەلى مەكتەپتەردىڭ كوش باسىندا تۇرعان ءبىلىم شاڭىراعىندا جالپىۇلتتىق اتا-انالار جينالىسى ەركىن فورماتتا ءوتتى. مۇعالىمدەر مەن اتا-انالار اراسىندا اشىق پىكىر الماسۋ الاڭى قالىپتاسىپ, مەكتەپتىڭ پسيحولوگ ماماندارى اتا-انالار ءۇشىن ارنايى ازىرلەگەن كوڭىلدى ترەنينگتىك باعدارلاماسىن ۇسىندى. شاكىرتتەردىڭ جەتىستىكتەرى سارالانىپ, بيىلعى وقۋ جىلىندا اتقارىلعان جۇمىستاردىڭ ەسەبى تىڭدالدى. «رۋحاني جاڭعىرۋ» باعدارلاماسىنىڭ ءمان-ماڭىزىن كورسەتەتىن ارنايى بەينەروليكتەر كوپشىلىككە كورسەتىلىپ, باعدارلامانىڭ نەگىزگى باعىتتارىنا قاتىستى باياندامالار وقىلدى. اشىلعانىنا نەبارى ءتورت جىل بولعان نازارباەۆ زياتكەرلىك مەكتەبىنىڭ شاكىرتتەرى حالىقارالىق دەڭگەيدەگى وليمپيادالار مەن جاس ونەرتاپقىشتارعا ارنالعان الەمدىك دودالاردا جوعارى ناتيجەدەن كورىنىپ ءجۇر. بۇل وتباسى مەن مەكتەپ اراسىنداعى ۇيلەسىمدى بايلانىستىڭ جەمىسى دەيدى ۇستازدار.
– حالىقارالىق وتباسى كۇنىندە ۇيىمداستىرىلىپ وتىرعان جالپىۇلتتىق اتا-انالار جينالىسىنىڭ اۋقىمى كەڭ. «رۋحاني جاڭعىرۋ» باعدارلاماسىن تاربيە نەگىزىندە ىسكە اسىرۋ, قورعانشىلىق كەڭەستىڭ قىزمەتىمەن تانىستىرۋ, وتباسى قۇندىلىقتارىن ناسيحاتتاۋ جانە وتباسى مەن مەكتەپتىڭ ءوزارا بايلانىسىن نىعايتۋ سىندى جۇمىستار كۇن تارتىبىندە تالقىلاندى. مەكتەپ جۇمىسىندا اتا-انالاردىڭ بەلسەندىلىگى وتە جوعارى. وقۋشىلار تاراپىنان ۇيىمداستىرىلعان ءتۇرلى ءىس-شارالارعا, قايىرىمدىلىق اكتسيالارىنا ول كىسىلەر ۇنەمى بەلسەنە اتسالىسادى. بالاسىنىڭ ەشتەڭەگە الاڭداماي جان-جاقتى جەتىلۋىنە جول اشىپ وتىرعان اتا-انالار قاۋىمىنىڭ قولداۋى بىزگە ۇلكەن كومەك, – دەيدى مەكتەپ ديرەكتورىنىڭ تاربيە ءىسى جونىندەگى ورىنباسارى ايگۇل يسمايلوۆا.
اتالمىش ءبىلىم ورداسىنان بيىلعى جىلى 222 تۇلەك قانات قاققالى وتىر. ولاردىڭ باسىم بولىگى ەلىمىزدىڭ جانە شەتەلدىڭ جەتەكشى ۋنيۆەرسيتەتتەرىنەن شاقىرتۋ الىپ تا ۇلگەرگەن. 11-سىنىپ وقۋشىسى ايدانا ايتجانوۆانىڭ اناسى جۇماگۇل تاجىبەكوۆا: «قىزىم بيىل ءتورتىنشى جىل نازارباەۆ زياتكەرلىك مەكتەبىندە ءبىلىم الىپ جاتىر. مەكتەپتىڭ ءبىلىم ساپاسى وتە جوعارى. بۇل جەردە بالالار وزدەرىن ۇيدەگىدەي ەركىن سەزىنەدى. قورعانشىلىق كەڭەسىنىڭ مۇشەسى رەتىندە ايتار بولسام, قانداي دا ءبىر تۇسىنىسپەۋشىلىك ورىن الىپ جاتسا اتا-انالار مەن مەكتەپ اكىمشىلىگى بىرلەسە وتىرىپ شەشەدى. ماسەلەن وتكەن جىلى اۋىر دەرتكە شالدىققان ءبىر وقۋشىمىزدىڭ وتاسىنا بۇكىل ۇجىم مەن اتا-انالار بولىپ قول ۇشىن سوزدىق» دەيدى.
جينالىس بارىسىندا مەكتەپتىڭ قامقورشىلىق كەڭەسىنىڭ جۇمىسى تۋرالى دا كەڭىنەن ايتىلدى. دامىعان مەملەكەتتەردىڭ تاجىريبەسىنە ۇڭىلسەك قامقورشىلىق كەڭەسى كوپتەگەن ەلدەردە ۇلكەن ماڭىزعا يە. ءار ءبىلىم مەكەمەلەرىندەگى قامقورشىلىق كەڭەس مۇشەلەرىنە جۇكتەلگەن نەگىزگى مىندەت ءبىلىم بەرۋ ۇيىمىنا بيۋدجەتتىك ۇسىنىس جاساپ ءبىلىم ساپاسىنا باعا بەرۋمەن عانا شەكتەلمەي, وقۋشىلاردىڭ ساباقتان تىس ۋاقىتتارداعى جان-جاقتى دامىپ جەتىلۋىنە, ءتۇرلى ۇيىرمەلەرگە قاتىسىپ ۋاقىتىن ءتيىمدى پايدالانۋىنا قولداۋ جاساۋ. جاس زياتكەرلەر مەكتەبىندە بۇل باعىتتاعى جۇمىستار دا جۇيەلى جولعا قويىلعان.
«مەكتەبىمىزدە وقۋشىلاردىڭ تانىم كوكجيەگىن جەتىلدىرۋگە باعىتتالعان 35 ۇيىرمە ساباقتارى جۇمىس جاسايدى. ونىڭ ىشىندە 12 پاندىك ۇيىرمە, 8-سپورتتىق, 13-شىعارماشىلىق جانە ەكى بىردەي تەحنيكالىق ۇيىرمە بار. ناتيجەلەر ساپاسى وتە جوعارى. قانداي جوبالاردا بولماسىن اتا-انالاردىڭ ۇسىنىس تىلەكتەرى مىندەتتى تۇردە نازارعا الىنادى» - دەيدى پەداگوگ-ۇيىمداستىرۋشى زاۋرە توقتامىسوۆا.
جىل قورىتىندىسىنا سايكەس فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ەلىمىز بويىنشا جاراتىلىستانۋ باعىتىندا ءبىلىم بەرەتىن ەلۋ مەكتەپتىڭ ىشىندە ءبىرىنشى, گۋمانيتارلىق باعىتتاعى ءجۇز مەكتەپتىڭ ىشىندە ءۇشىنشى ورىننان كورىنگەن. ۇستازدار قاۋىمى بۇل جەتىستىكتەردىڭ ار جاعىندا مەكتەپتىڭ عانا ەمەس اتا-انالاردىڭ دا ۇلكەن ۇلەسى جاتقانىن ايتادى. جيىن سوڭىندا الداعى وقۋ جىلىنان باستاپ ايىنا ءبىر رەت مۇعالىمدەر مەن اتا-انالار اراسىندا سپورتتىق جارىس ۇيىمداستىرۋ, كۋراتور ساعاتتارىن وتكىزۋ سىندى ۇسىنىستار ايتىلدى.
ارمان وكتيابر,
«ەگەمەن قازاقستان»
الماتى