استانا قالاسىندا قازاقستان رەسپۋبليكاسىنداعى ادام قۇقىقتارى جونىندەگى ۋاكىل اسقار شاكىروۆتىڭ بۇۇ-نىڭ ەسىرتكى جانە قىلمىس جونىندەگى باسقارماسىنىڭ باسشىسى سيگنە روتبەرگامەن كەزدەسۋى ءوتتى. وندا ەلدەگى ەسىرتكى جانە باسقا دا پسيحواكتيۆتى زاتتاردىڭ تارالۋ ماسەلەلەرى ءسوز بولدى.
بۇل پروبلەما مەديتسينالىق جانە الەۋمەتتىك قاتەرلەرگە, سونىڭ ىشىندە ادامنىڭ يممۋندىق تاپشىلىق ۆيرۋسىنىڭ (ايتۆ) جانە يممۋندىق تاپشىلىق سيندرومىن (جيتس) قوسا العاندا, تارالۋىنا بايلانىستى ءبىرشاما الاڭداۋشىلىق تۋعىزادى.
وسى ماسەلەنى زەرتتەۋمەن اينالىساتىن قوعامدىق ۇيىمداردىڭ مالىمەتتەرى بويىنشا, 2017 جىلى قازاقستاندا ايتۆ-نىڭ 2 500-دەن استام جاڭا ينفەكتسياسى تىركەلدى, ونىڭ 70 پايىزى ينەكتسيالىق ەسىرتكى قولداناتىن تۇلعالارعا قاتىستى.
كەزدەسۋ بارىسىندا الەمدىك ۇزدىك تاجىريبەنى ەسكەرە وتىرىپ, وسى قۇبىلىستارمەن كۇرەسۋدىڭ ءتيىمدى قۇرالدارىن قولدانۋ قاجەتتىلىگى تۋرالى ورتاق پىكىر ايتىلدى. اتالمىش كونتەكستە س.روتبەرگا ەۋروپالىق ەلدەردە, اقش-تا, سونداي-اق تمد مەملەكەتتەرىنىڭ كوپشىلىگىندە بەلسەندى تۇردە قولدانىلاتىن دارىلىك زاتتارمەن قوسالقى تەراپيانىڭ قولدانىلۋىن ءتيىمدى شارالاردىڭ ءبىرى رەتىندە اتاپ ءوتتى.
ومبۋدسمەن ەسىرتكىنىڭ زاڭسىز اينالىمىنا جانە ەسىرتكىگە تاۋەلدىلىكتى بولدىرماۋعا قارسى شارالاردى وتكىزۋدىڭ ماڭىزدىلىعىنا كوڭىل اۋدارىپ, سونىمەن قاتار وڭتايلى حالىقارالىق تاجىريبەنى, ونىڭ ىشىندە قۇقىق قورعاۋ تۇرعىسىنان جان-جاقتى زەردەلەۋ قاجەتتىگىن جەتكىزدى.
«ەگەمەن-اقپارات»