ۆولەيبول ويىنىنىڭ قاراعاندىلىق اۋەسقويلارى مەن جانكۇيەرلەرىن جىلدىڭ وسى مەزگىلىندە ەرەكشە ەلەڭدەتىپ, قىزىقتاۋعا تارتاتىن ءبىر جارىس بار. باستاپقىدا قالالىق, ودان وبلىستىق, كەلە ايماقتىق, ال بۇل جولى حالىقارالىققا ۇلاسقان سايىس 8-ءشى رەت ءوتتى.
ولكە دامۋىنا ايتۋلى ۇلەس قوسقان قايراتكەر امانبەك ءتۇسىپحان ۇلى ءابدىحانوۆتى ەسكە الۋ قۇرمەتىنە ۆولەيبولدان ەرلەر اراسىنداعى تۋرنيرگە الدى قىرعىزستاننان كەلگەن, استانادان, پاۆلوداردان, تەمىرتاۋدان, بالقاشتان جانە باسقا قالالاردان جينالعان 14 كوماندا قاتىستى. شارۋاشىلىق ديرەكتورى, جاڭاارقا, اباي اۋداندارىنىڭ اكىمى كەزىندە سپورتقا دا قامقورلىق جاساۋعا, اۋىل جاستارىنىڭ ۆولەيبولعا دەگەن ىقىلاسىن سەرپىلتۋگە, قۇشتارلىعىن كۇشەيتۋگە دەن قويعان ازامات اتىنداعى جارىس مارتەبەسى جىلدان-جىلعا ءوسىپ وتىر.
مۇنىڭ الدىندا جەر-جەردە وتكەن ىرىكتەۋ ويىندارىندا وزىپ شىققاندار 4 توپقا ءبولىنىپ, باسەكەگە ءتۇستى. قاي-قايسى دا وڭاي شاعىلا قويمايتىن جاڭعاق ەمەستىگىن كورسەتىپ, تارتىستى قىزدىردى. دەگەنمەن شىن شەبەرلىك مويىنداتپاي تۇرا ما! جەڭىس تۇعىرىنا كوتەرىلۋ ءۇشىن شەشۋشى كەزدەسۋدە استانا قالاسىنىڭ قۇراما قومانداسى پاۆلودارلىق قارسىلاستارىن تىزە بۇكتىردى. جەڭىمپازعا ارنايى كۋبوك تاپسىرىلىپ, باس جۇلدەگە تىگىلگەن سىيلىق تابىس ەتىلدى. ۇزەڭگىلەس باسەكەلەستەر دە, ۇزدىك دەپ تانىلعان ويىنشىلار دا سىي-سياپاتتان قۇر الاقان قالمادى.
– ۇردىسكە اينالعان بۇل تۋرنير اۋىل, قالا جاستارىن دوپ ويىنىنىڭ وسىناۋ ءبىر تاماشا تۇرىمەن شۇعىلدانۋعا تارتىپ كەلەدى. ونى ۇيىمداستىرۋدىڭ العاشقى جىلدارىندا بىرەن-ساران عانا كوماندا قامتىلسا, قازىر كوپشىلىگى ودان قالىس قالماۋعا تىرىسادى. سوندىقتان اۋەسقوي ۆولەيبول ليگاسىن قۇرىپ, كۇزدەن قىسقا دەيىن ۆولەيبول بويىنشا ماۋسىمدىق ويىندار وتكىزىلىپ تۇراتىن بولدى, – دەدى قاراعاندى قالاسى ۆولەيبول فەدەراتسياسىنىڭ جەتەكشىسى كەنجەعۇل ءتۇسىپحانوۆ.
سونداي-اق جارىس بارىسىندا ءمالىم ەتىلگەندەي اتالعان تۋرنير كەلەسى جىلى وبلىستىق دەنە تاربيەسى جانە سپورت باسقارماسىنىڭ تىكەلەي قولداۋىمەن رەسمي تۇردە رەسپۋبليكالىق ماڭىزى بار دەڭگەيدە وتكىزىلەتىن بولدى. دەمەك, بوكس پەن كۇرەستەن داڭقى اسقان قاراعاندىنىڭ ۆولەيبول ارقىلى دا اتاعى جاڭعىرۋىنا اسەرى زور بولماق. «ونەگەنىڭ ءورىسى كەڭ» دەگەن وسى. ۇلكەن ۆولەيبولعا جول سالعان ءۇردىس ىقپالى بۇل.
ايقىن نەسىپباي
قاراعاندى