قازاقستان – ورتاق ءۇيىمىز!

«ەل ىشىندەگى بەرەكە-بىرلىك ءبارىمىزدىڭ ورتاق بايلىعىمىز», – دەيدى ءار ۇلت وكىلدەرى

  اقتوبە وبلىسى دوستىق ءۇيى 2009 جىلدىڭ 10 قىركۇيەگىندە پرەزيدەنت ن.نازارباەۆتىڭ قا­تى­سۋى­مەن سالتاناتتى تۇردە اشىلدى. ەلباسى دوستىق ءۇيىنىڭ تۇساۋىن كەستى. 17 ەتنومادەني بىرلەستىك قونىس تەپكەن عي­ما­رات ءوزىنىڭ ايشىقتى كەلبەتىمەن كوز تار­تادى. جال­پى كولەمى 4150 شارشى مەتر اۋماقتى الىپ جاتقان ءۇش قاباتتى عيماراتتا ەتنومادەني ءبىر­لەس­تىك­تەر­دىڭ ءوز ءتىلى مەن ءدىلىن, ءتول مادە­نيەتىن دا­مىتۋى­نا تولىق مۇمكىندىك جاسالعان. ءبىرىنشى قاباتتا بىرلەستىك باسشىلارىنىڭ كابينەتتەرى, جوعارعى قابات­تاردا ۇلكەن كونتسەرت زالى, 300 ورىن­دىق سالتانات زالى, حورەوگرافيا زالى, ءماجى­لىس وتكىزەتىن كونفەرەنتس-زال, مۋزەي, كومپيۋتەر سى­نى­بى جانە دايىندىق وتكىزەتىن بولمەلەرى ورنالاسقان. ەلباسى جۇرگىزىپ وتىرعان ساياساتتىڭ ءبىر ءتىنى ۇلتارالىق تاتۋلىق ەكەنى ءمالىم. سونىڭ ارقا­سىندا كوپ ۇلتتى قازاقستاندا «ىدىس-اياق سىل­دىرى» ەستىلگەن ەمەس. بارلىق ۇلت ءبىر ءۇيدىڭ با­لا­سىنداي تاتۋ-ءتاتتى ءومىر سۇرۋدە. اق­تو­بە­دەگى دوستىق ءۇيى سونىڭ ايعاعى بولىپ تابىلادى. سوڭعى جىلدارى اقتوبە وبلىسىنا جاقىن جانە الىس شەتەلدەن كوشىپ كەلىپ جاتقاندار بارشىلىق. العاشىندا دوستىق ۇيىندە 16 ەتنومادەني بىرلەستىك ورنالاسادى دەلىنسە, كەيىن تاعى 2 چەح جانە داعىستان ەتنومادەني بىرلەستىكتەرى دە «وتاۋ تىگىپ», قاسيەتتى ۇيانى جى­لىتا ءتۇستى. ءبىز ورتالىق جەتەكشىلەرىنىڭ بىرقاتارىنىڭ لەبىزىن ۇسىنعاندى ءجون كوردىك.

دوستىق ءۇيى – ىنتىماق ۇلگىسى

عالىمجان نۇرىشەۆ, اقتوبە مەملەكەتتىك پەداگوگيكالىق ينستيتۋتىنىڭ رەكتورى, حالىقارالىق «قازاق ءتىلى» قوعامى وبلىستىق ۇيىمىنىڭ توراعاسى.

ءبىر وتباسىنداي تاتۋ-ءتاتتى ءومىر ءسۇرىپ جات­قان قازاقستاندىقتارعا وزگە ەل قىزىعا دا, قىز­عانا دا قارايدى. «بىرلىك بار جەردە تىرلىك بار» دەگەن قاعيداعا سۇيەنگەن ەلىمىزدە ءار ۇلتتىڭ ءوز تاريحى مەن مادەنيەتىن ناسي­حات­تاۋعا مۇمكىندىك بەرىلىپ, جاعداي جاسالعان. وسىعان دالەل – دوس­تىق ءۇيى. حالىقتار اراسىنداعى دوستىقتى ناسيحاتتاپ, ۇلتتار اراسىنداعى قارىم-قاتىناستى نىعايتۋعا كوڭىل ءبولىپ, سارابدال ساياسات ۇستا­نىپ وتىر­عان ەلباسىنا العىس ايتامىز. * * *

پاۆەل ماگلەلي, بولگار ەتنومادەني بىرلەستىگىنىڭ جەتەكشىسى.

ءبىزدىڭ بىرلەستىگىمىز 1996 جىلى قۇ­رىل­دى. وبلىستا مىڭنان استام بولگار تۇرادى. نەگىزىنەن العا اۋدانىنىڭ بولگاركا سەلوسىندا شوعىرلانعان. قال­عان­­دارى ايتەكە بي, مارتوك اۋدانى, اقتوبە قالاسىندا تۇرادى. دوس­تىق ۇيىندە بارلىق ۇلتتىڭ وكىل­دەرى باس قوسىپ, ارالاسادى. لينگافون كابينەتىندە ءوز تىلدەرىمىزدى, مەملەكەتتىك ءتىلدى ۇيرەنەمىز. كومپيۋتەر سى­نىبى دا بار. مۇندا ءبىز­دىڭ بالا­لارىمىز ۇيىرمەلەرگە قاتى­سا­دى. ءبىز وسىنداي بىرلىگى جاراسقان قازاق ەلىندە تۇراتىنىمىزدى ماقتان ەتەمىز. * * *

داازي وماروۆ, داعىستان ەتنومادەني بىرلەستىگىنىڭ جەتەكشىسى.

 بىزدىڭ بىرلەستىكتىڭ اشىلعانىنا جارتى جىل عانا بولدى. قۇجات بويىنشا بىرلەستىك كۇرامىندا 30-دان استام مۇشە بار. ارينە, وبلىستا داعىستاندار كوپ. سوندىقتان ەندى قاتارىمىزدىڭ كوبەيە تۇسەتىنى انىق. ءوزىم 1973 جىلدان باستاپ قازاقستاندا تۇرامىن. ارينە, تاريحي وتانىمىز داعىس­تان­مەن دە بايلانىسىپ تۇرامىز, ول جاقتا تۋىس­تارىمىز بار. بىرلىك پەن كەلىسىم بار جەردە حالىق تا تاتۋ بولماق. قازاقستان – وتانىمىز, ءبىز وتانىمىزدى كوركەيتۋگە كۇش جۇمسايمىز.

تاتۋلىق ءتىنى

شىعىس قازاقستان وبلىسىندا دوس­تىق ءۇيى 1992 جىلى قۇرىلعان. بۇل قازاقستان جەرىندە بوي كوتەرگەن العاش­قى دوستىق ءۇيى بولاتىن. كەيىن شىعىسقازاقستاندىقتاردىڭ ءتا­جى­ريبەسى ەسكەرىلىپ, قازاقستان پرەزيدەنتى اكىمشىلىگىنىڭ ۇسىنىسىمەن ەلى­مىزدىڭ وزگە وبلىستارىندا دا دوستىق ۇيلەرى بوي كوتەرە باستادى. قازىرگى تاڭدا شىعىس قازاقستان وب­لىسىندا وبلىستىق جانە وبلىس قالا­لارى مەن ايماقتارىندا 7 دوستىق ءۇيى, 82 ەتنومادەني بىرلەستىك جۇمىس ىستەيدى. وسكەمەن قالاسىندا – 22, سەمەيدە – 14, ريددەردە – 11, كۋرچاتوۆتا – 3, اباي اۋدانىندا – 1, بەسقاراعاي اۋدا­نىندا – 1, بورودۋليحا اۋدانىندا – 6, گلۋبوكوە اۋدانىندا – 4, جارما اۋدا­نىندا – 3, زايسان اۋدانىندا – 2, زىريان اۋدا­نىن­دا – 6, شەمونايحا اۋ­دانىندا 9 ەتنو­مادەني بىرلەستىك جۇ­مىس ىستەيدى. سول جاعالاۋداعى ەتنوگرافيالىق كەشەندە, 37 گا اۋماقتى الىپ جاتقان الاڭ­دا ەتنومادەني بىرلەستىكتەردىڭ 16 ءداستۇرلى ءۇيى بوي كوتەردى. 2010 جىلدىڭ 6 قىركۇيەگىندە ەلىمىزدە تەڭدەسى جوق وزگەشە ەتنواۋىلدىڭ ءبىرىنشى مارتەبەلى قوناعى قازاقستان پرەزيدەنتى نۇرسۇل­تان نازارباەۆ بولدى. ءارتۇرلى ەتنوس وكىلدەرى مەملەكەت باسشىسىن وزدەرىنىڭ بار ءسان-سالتاناتىمەن, ءان-بيلەرىمەن, اس­قان قوشەمەتتەرىمەن قارسى الدى. ەتنومادەني بىرلەستىكتەرىنىڭ وكىلدەرى قا­زاق­ستاندا تاتۋلىق پەن بەيبىتشىلىك ءتىنى ورنىعىپ, وسىندا مەكەن ەتەتىن بارلىق ەتنوستاردىڭ كوپ عاسىرلىق سالت-ءداس­تۇرلەرى مەن مادەنيەتىنىڭ ساق­تالۋى مەن جاندانۋىنا ولشەۋسىز ۇلەس قوسقانى ءۇشىن پرەزيدەنتكە شەكسىز ال­عىستارىن جەتكىزدى.

باۋىرلاستىق باستاۋى

قوستاناي وبلىستىق دوستىق ءۇيى 2006 جىل­دىڭ 7 قىركۇيەگىندە اشىلدى. بۇل كۇنى قوستا­ناي­لىق ەتنومادەني ورتالىقتار وكىلدەرىن قونىس تويلارىمەن قۇتتىقتاۋ ءۇشىن ەلباسى ن. نازارباەۆ دوستىق ۇيىنە ارنايى اتباسىن تىرەدى. پرەزيدەنت ەتنومادەني بىرلەستىكتەر جەتەكشىلەرىمەن كەزدەسىپ, قوستاناي وبلىسىندا دوستىق ءۇيىنىڭ نەگىزى قالانۋىنا كۇش سالعان وبلىس اكىمى جۇمىسىنا جوعارى باعا بەردى. امبەباپ ارحيتەكتۋرالىق عيماراتتىڭ جال­پى اۋماعى 1024 شارشى مەتردى الىپ جاتىر. دوستىق ءۇيى ءوزىنىڭ شاڭىراعىنىڭ استىنا 16 ەتنومادەني بىرلەستىكتى شوعىرلاندىرىپ وتىر. ەتنومادەني بىرلەستىكتەر – قوعامدىق ۇيىم­دار. سوندىقتان, ءاربىر ەتنومادەني بىرلەستىك بار­لىق قاجەتتى قۇرال-جابدىقتارمەن جابدىق­تالعان ارنايى كابينەتتەرمەن قامتاماسىز ەتىلگەن. دوستىق ءۇيى 9 جەكسەنبىلىك مەكتەپتىڭ جۇمىس ىستەۋىنە دە جان-جاقتى جاعداي جاساپ وتىر. بۇل مەكتەپتەردە 300-گە تارتا ادام ءدارىس الادى. ولار وزدەرىنىڭ انا تىلدەرىمەن قوسا, مەملەكەتتىك ءتىلدى دە مەڭگەرۋدە. ەتنومادەني بىرلەستىكتەردىڭ قۇزىرىندا 116 ورىندىق ءماجىلىس زالى مەن ايشىقتى كورمە زالى بار. ماسەلەن, كورمە زالىندا وبلىستىڭ قالالارى مەن اۋداندارىنان كەلگەن جاس قىلقالام يەلەرى مەن فوتوگرافتاردىڭ كورمەلەرى ۇيىمداستىرىلادى. وبلىستىق دوستىق ءۇيىنىڭ نەگىزگى قىزمەتى قازاقستان حالقى اسسامبلەياسى ستراتەگياسىن جۇزەگە اسىرۋعا, ءتۇرلى مەملەكەتتىك باعدار­لامالاردى ورىنداۋعا باعىتتالعان. ولاردىڭ ەڭ نەگىزگىلەرى – مادەني-رۋحاني كەڭىستىكتى قازاق­ستاندىق پاتريوتيزم رۋحى, قازاق ۇلتىنىڭ مادەنيەتى مەن مەملەكەتتىك ءتىلى نەگىزىندە بايىتۋ, وبلىستاعى ءتۇرلى ەتنوستاردىڭ سالت-داستۇرلەرىن, مادەنيەتىن, ءتىلىن ساقتاپ, دا­مىتۋعا بىرلەسە كۇش سالۋ. ءبىز تومەندە ءتۇرلى ەتنوس وكىلدەرىنىڭ وبلىس­تا­عى دوستىق ءۇيى تۋراسىنداعى پىكىرلەرىن ۇسى­نىپ وتىرمىز.

يۋري يۆلەۆ, قوستاناي وبلىستىق ورىس قوعامىنىڭ توراعاسى.

قوستاناي وبلىستىق دوس­تىق ءۇيى قازاقستان حالقى اس­سام­بلەياسىمەن بىرلەسىپ, قا­زاق­ستان حالقى اسسامبلەياسى ستراتەگيا­سىندا كوزدەلگەن ماق­سات-مىندەت­تەردى جۇزەگە اسىرۋعا كۇش سالىپ كەلەدى. دوستىق ءۇيى 16 ۇلت­تىق-مادەني ورتا­لىق­تى بىرىكتىرەدى. ونىڭ باستى مەملەكەتتىك ميسسياسى بار. ول – ۇلتارا­لىق كەلىسىمدى ودان ءارى دامىتۋ, ءتۇرلى ەتنوس وكىلدەرىنىڭ ءما­دە­نيەتىنە دەگەن قۇر­مەتتى قالىپ­تاس­­تىرۋ, ەل­دەگى بەي­بىت­شىلىك پەن دوس­تىق­تى ساقتاۋ.

رومۋالدا گيتسەۆيچ , قوستاناي وبلىستىق «نادەيا»  پولياك ەتنومادەني بىرلەستىگىنىڭ توراعاسى.

 دوستىق ءۇيى وبلىستاعى ەتنومادەني بىرلەستىكتەر وكىلدەرى ءۇشىن شىن مانىسىندەگى تۋعان ۇيگە اينالدى. بۇل جەردە ءبىز ءوزىمىزدىڭ كوكەيىمىزدە جۇرگەن بارلىق مادەني ءىس-شارالارىمىز بەن جوسپارلارىمىزدى جۇزەگە اسىرا الامىز. دوستىق ۇيىندە جەكسەنبىلىك مەكتەپ بار. مۇندا بارلىق قىزمەتكەرلەرگە ادىستەمەلىك جانە تاجىريبەلىك تۇرعىدا ۇلكەن كومەك كورسەتىلەدى. بولاشاقتا مۇنداي يگى ىستەر ءوز جالعاسىن تابادى دەگەن سەنىمدەمىن.

بەيبىتشىلىك – باستى بايلىعىمىز

قازاقستان پرەزيدەنتى نۇرسۇلتان نازار­باەۆتىڭ بيىلعى «بولاشاقتىڭ ىرگەسىن بىرگە قالايمىز» اتتى قازاقستان حالقىنا ارناعان جولداۋىندا بىرلىك پەن تىرلىككە ۇندەگەن وسيەتى وتە كوپ. «ىرىس – ىنتىماققا جولىعا­دى, داۋلەت – بىرلىكپەن تولىعادى». «كوپتىلدى جانە كوپكونفەسسيالى قوعامداعى بەيبىتشىلىك پەن كەلىسىم بۇل سىزدەر مەن ءبىزدىڭ ەڭبەگىمىز, قۇرمەتتى قازاقستاندىقتار». «الدىمىزدا اتقارىلار قىرۋار ىستەر بار. بۇل جولدا ءبىزدىڭ باستى قۇندىلىعىمىز – بەرەكەلى بىرلىگىمىز. مەن اۋىزبىرشىلىكتەن اينىمايتىن اقجۇرەك جۇرتىمنىڭ قۋاتتى ۇلتقا, شۋاقتى ۇلىسقا اينالارىنا كامىل سەنەمىن. حالقىمىزدا «باق بەرەردە ەلگە ىرىس قونادى, ۇستانعان جولى دۇرىس بولادى» دەگەن دانالىق ءسوز بار», – دەپ اعىنان جارىلادى ەلباسىمىز. ايتسا ايتقانداي, 130 ۇلت پەن ۇلىس مەكەندەيتىن كەڭ-بايتاق ەلىمىزدە شىنايى تاتۋلىق پەن دوستىق ورنىققان. وسى ورايدا قازاقستان حالقى اسسامبلەياسىنىڭ اتقارىپ وتىرعان جۇمىسى ۇشان-تەڭىز ەكەنىن دە تىلگە تيەك ەتكەنىمىز ءجون. ۇلىسىمىزدىڭ ۇيىتقىسى سانالا­تىن وڭتۇستىك ءوڭىرىنىڭ جۇرتشىلىعى دا ءبىر اتا-انانىڭ بالاسىنداي تاتۋ-ءتاتتى عۇ­مىر كەشۋدە. ءبىر-بىرىمەن قىز الى­سىپ, قىز بەرىسىپ, قۇدا-قۇداندالى بو­لىپ ءجۇر­گەن جاعدايى دا بار. قايماعى بۇ­زىل­ماعان حالقىمىزدىڭ ادەت-عۇرپى مەن سالت-ءداستۇرىن سىيلاپ, قۇرمەتتەپ جۇرگەن بارشا ۇلت پەن ۇلىستىڭ وكىل­دەرىنە العىستان باسقا ايتارىمىز جوق. وركەنيەتتى 50 ەلدىڭ قاتارىنا ەنۋ­دى باستى ماقسات-مۇرات تۇتقان ەگەمەن ەلى­مىزدىڭ ءۇشىنشى قالاسى سانالا­تىن شى­رايلى شىمكەنت شاھارىندا دا باستى بايلىعىمىز – بەيبىتشىلىك پەن كەلىسىمگە باسا كوڭىل ءبولىنىپ كەلەدى. داۋىلپاز اقىن ساكەن سەيفۋل­ليننىڭ ەسىمىن يەلەنگەن دوستىق ءۇيى وڭتۇستىك قازاقستان وبلىسىن مەكەندەيتىن بارلىق ۇلتتار مەن ۇلىستاردىڭ باسىن بىرىكتىرەتىن رۋحاني كيەلى وردا ىسپەتتەس. قا­زىرگى تاڭدا 20 وبلىستىق ەتنومادەني ورتا­لىق جانە ولاردىڭ 48 فيليالى جۇمىس ىستەيدى. ولاردىڭ ءبىرازى­نىڭ باس­شىلىعى وسىندا ورنا­لاس­قان. حالىق دوس­تىعىن نىعايتۋدى باستى ماقسات ەتكەن بۇل ورتا­لىقتار­دىڭ جۇمىس جوس­پارلارى اۋقىمدى. ءما­دە­ني-كوپ­شىلىك ءىس-شارا­لار مەن ۇلت­تىق مەرەكەلەردى بىرگە وتكىزۋ يگى داستۇرگە اي­نال­عان. ءاسى­رەسە, قازاق­ستان حال­قى­نىڭ بىرلىگى كۇنى ەرەكشە تويلانادى. قازاق پەن وزبەكتىڭ «ناۋ­رىز مەيرامى» مەن «حو­سيل بايرامي», ورىستىڭ «ماسلەنيتسا», «مەدوۆىي سپاس», تاتاردىڭ «سابانتۋي», «چاك-چاك بايرامي», ۇي­عىردىڭ «ۋزۋم ءساي­ليسي», گرەك­تىڭ «پاسحا», ەۆ­رەيدىڭ «روش-ا-شا­نا», «پەساح», چە­شەن­­دەر­دىڭ «نەنا موت», پولياك­تاردىڭ «ۆولكانوت», «روجدەستۆو», كورەي­لەردىڭ شىعىس كۇن­تىزبەسى بويىنشا جاڭا جىلى, تاعى باسقا دا ءتۇرلى مەرەكەلەر شىم­كەنتتىكتەرگە شات-شادى­مان قۋا­نىش سىيلاۋدا. سونىمەن قاتار, ەتنوس­تار­دىڭ بىرلەسكەن حالىق­ارالىق «قازاق رومان­سياداسى», «يگراي, گارمون!». «وفارين», «اسكياچيلار» سياقتى ونەر سايىستارى, فەستيۆالدەرى وتكىزىلىپ تۇ­را­دى. ەتنومادەني ور­تا­لىقتاردىڭ ءبارى وبلىس پەن قالا دەڭگەيىندە وتەتىن بارلىق رەسمي ءىس-شارالارعا بەلسەندى قاتىسادى. سونىمەن قا­تار ورتالىق كوركەم­ونەر­پازدارى اسكەري ءبو­لىم­شەلەر, قارتتار, ءمۇ­گە­دەكتەر, بالالار ءۇي­لەرىنە ءجيى بارىپ, قىزعىلىقتى كونتسەرتتەر قويىپ تۇرادى. دوستىق ۇيىندە سان-الۋان ۇيىرمەلەر, جەكسەنبىلىك مەكتەپتەر, كوركەمونەرپازدار ۇجىم­دارى جۇ­مىس ىستەيدى. وندا ءان-بي ۇيرەتىپ قانا قويماس­تان, وزدەرىنىڭ انا تىلىمەن قوسا مەملەكەتتىك ءتىلدى مەڭگەرۋگە دە بارلىق جاعدايلار جاسالعان. بۇگىندە حالىقتار دوستىعى ۇيىندە – 14, سونىڭ ىشىندە 6 جاۋاپتى قىزمەتكەر جۇمىس ىستەيدى. ءبىز وتكىزەتىن يگىلىكتى ءىس-شارالارى­مىز­دىڭ ءبارىن وبلىس اكىمىمەن, وڭتۇستىك قازاق­ستان وبلىستىق قازاقستان حالقى اسسامبلەيا­سى­مەن, وبلىستىق ىشكى ساياسات باسقارماسىمەن كەلىسە وتىرىپ جۇرگىزەمىز. وبلىس باس­شى­سى اس­قار مىرزاحمەتوۆتىڭ تىكەلەي قول­داۋى­مەن «كو­ڭىل­دى تاپقىرلار كلۋبىنىڭ» وب­لىس­تىق, ايماق­تىق, رەسپۋبليكالىق جارىس­تارىن وتكىزىپ ءجۇر­مىز. اسقار يسابەك ۇلى ەندى 2000 شارشى مەتر عيماراتىمىزدىڭ جانىنان قوسىمشا قۇرىلىس سالۋ ءۇشىن قوماقتى قارجى ءبولىپ وتىر. قالا اكىمى ارمان جەتپىسباەۆتىڭ كتك كۋبوگىن ءوت­كىزۋى دە جاقسى داستۇرگە اينالعان. ءبىز دە جۇمىسىمىزدى بارىنشا جاندان­دىرىپ, باستى بايلىعىمىز – حالىقتار دوس­تىعى, بەيبىتشىلىك پەن كەلىسىمدى نىعاي­تۋعا سۇبەلى ۇلەس قوسا بەرەتىن بولامىز.

ايدىنعالي سىدىقوۆ, س.سەيفۋللين اتىنداعى دوستىق ءۇيىنىڭ ديرەكتورى.

وڭتۇستىك قازاقستان وبلىسى.

كەلىسىم دىڭگەگى

سولتۇستىك قازاقستان وبلىسىنىڭ جەرگىلىكتى مەملەكەتتىك ورگاندارى, وبلىستىق قازاق­ستان حالقى اسسامبلەياسى مەن ەتنومادەني بىرلەستىكتەر وڭىردەگى ەتنوسارالىق بىرلىك پەن كەلىسىمدى ساقتاۋ مەن نىعايتۋعا ايتارلىقتاي ۇلەس قوسۋدا. وبلىستاعى دوستىق ۇيىندە 22 ەتنومادەني بىرلەستىك پەن «اسسامبلەيا» كورپوراتيۆتىك قورى ورنالاسقان. جالپى اۋماعى 1079,9 شارشى مەتردى الىپ جاتقان دوستىق ۇيىندە 154 ادامعا ارنالعان اكت زالى مەن ءماجىلىس زالى بار. كوپ فۋنكتسيالى بۇل عيماراتتا ەتنوسارالىق جانە كونفەسسياارالىق كەلىسىمدى ساقتاۋ مەن ەل ىشىندەگى تۇراقتىلىقتى نى­عاي­تۋ, قازاقستاندا تۇراتىن بارلىق ازامات­تار­عا ورتاق تاريحي-مادەني قۇندىلىقتار مەن مۇرالاردى, مادەنيەت پەن سالت-ءداستۇردى ساق­تاۋ باعىتىندا اۋقىمدى جۇمىستار ات­قارىلۋدا. دوستىق ۇيىندە كورمەلەر, ءتىل ۇيرەنۋ ءۇيىر­مەلەرى تۇراقتى تۇردە جۇمىس ىستەيدى. ءار­تۇرلى فەستيۆالدەر, بايقاۋلار ۇيىمداستىرىلادى. بۇگىنگى كۇنگە دەيىن وبلىستىڭ كوپتەگەن اۋداندارىندا اۋقىمدى ءىس-شارالار مەن جوبالار جۇزەگە اسىرىلدى. سولاردىڭ قاتارىنا «سولتۇستىك قازاقستان وبلىسىن مەكەندەيتىن ەتنوستاردىڭ داستۇرلەرى مەن سالتتارى» اتتى ەلەكتروندى نۇسقاسى بار كىتاپتى جاتقىزۋعا بولادى. وبلىس اۋداندارىنداعى ەتنومادەني بىرلەستىكتەردى قولداۋ باعىتىندا دا ءبىراز جۇ­مىستاردىڭ باسى قايىرىلعان. ولار وڭىرلەر­دەگى كۇردەلى الەۋمەتتىك ماسەلەلەردى وڭتاي­لان­دىرۋدى, جاستارمەن جۇمىستى جاندا­ن­دىرۋدى, مەملەكەتتىك ءتىلدى دامىتۋدى, سالت-داستۇرلەردى ساقتاۋدى كوزدەيدى. «ەتنواۋىل-يمانتاۋ» جوباسى جۇزەگە اسىرىلىپ, ول قو­عام مەن مەملەكەتتىك ورگانداردىڭ نازارىنا ۇسىنىلدى. قۇنى 100 ملن. تەڭگەنى قۇرايتىن بۇل جوبا اعارتۋشىلىق-يمميدجدىك جانە تا­نىمدىق تۋريستىك باعىتتى دامىتۋدى باس­شى­لىققا العان. بۇگىندە «قامبار-اتا», «ۇستا» سەكىلدى بىرقاتار جوبالاردى جۇزەگە اسىرۋ جولعا قويىلعان. «نامىس» فيلوسوفيالىق-ادىستەمەلىك كلۋبى مەن «جاس ۇرپاق» جاستار قاناتى دا وبلىستاعى ەتنومادەني بىرلەستىكتەر جۇمىستارىن جانداندىرۋعا ىقپال ەتۋدە. بيىلعى جىلدىڭ ماۋسىم ايىندا پەتروپاۆل قالاسىندا اۋىلدىق ەتنومادەني ءبىر­لەس­تىكتەردىڭ وبلىستىق بايقاۋى ءوتتى. «ءبىر ەل – ءبىر تاعدىر» دەگەن اتاۋمەن وتكەن بۇل شارا قازاقستان تاۋەلسىزدىگىنىڭ 20 جىلدىعىنا وراي ۇيىمداستىرىلدى. 6 شىلدە – استانا كۇنى وسى بايقاۋدىڭ جەڭىم­پازدارىن ماراپاتتاۋ, قازاقستان حالقى اسسامبلەياسىنىڭ العىس حاتتارىن تاپسىرۋ ءراسىمى ءوتتى. بايقاۋدىڭ قورىتىندىسىندا تي­ميريازەۆ, اقجار جانە ايىرتاۋ اۋدان­دارىنىڭ ەتنومادەني بىرلەستىكتەرى جەڭىسكە جەتتى. شارا جەڭىمپازدارىنا تاعايىندالعان 200 مىڭ تەڭگە كورپوراتيۆتىك قور قاراجاتىنان ءبولىندى. بۇگىندە وبلىستا ەتنوستاردى جۇمىلدىرۋ مەن ولاردىڭ اراسىنداعى كەلىسىمدى نىعايتۋ باعىتىندا بىرقاتار جوبا-باستامالار قولعا الىنۋدا. بيىلعى جىلدىڭ ماۋسىم ايىندا وبلىستىق «سالت-ءداستۇر» فەستيۆالىنىڭ ءبىرىنشى كەزەڭىنىڭ وتكىزىلۋى – وسىنىڭ ايعاعى. بۇل شارا اياسىندا جەرگىلىكتى جەرلەردەگى ەتنو­مادەني بىرلەستىكتەرگە وبلىستىق قازاقستان حالقى اسسامبلەياسى مەن «اسسامبلەيا» كورپوراتيۆتىك قورى تاراپىنان تاجىريبەلىك جانە ادىستەمەلىك قولداۋ-كومەك كورسەتىلدى. __________________________

ايقارما بەتتىڭ ماتەريالدارىن ۇيىمداستىرعان ءلايلا ەدىلقىزى.