...ۇلگى ەتەدى
ماقسات – سالاماتتى ءومىر سالتىن ناسيحاتتاۋ
شەتپەدەگى ورتالىق كوشەلەردە سالاماتتى ءومىر سالتىن ناسيحاتتاۋ ماقساتىندا دەنساۋلىق اكتسياسى وتكىزىلدى. شارا بۇقارالىق سپورتتى دامىتىپ, ەل ۇكىمەتىنىڭ 2016 -2019 جىلدارعا ارنالعان «دەنساۋلىق» مەملەكەتتىك باعدارلاماسىنىڭ ءىس شارالار جوسپارىن ورىنداۋ اياسىندا جانە سالاماتتى ءومىر سالتىن قالىپتاستىرۋ ورتالىعىنىڭ تۇجىرىمداماسىنا سايكەس وتكىزىلگەن بولاتىن.
جاستار الدىمەن ورتالىق بازار مەن ساۋدا ورىندارىنا بارىپ تەمەكى شەگىپ تۇرعان تۇرعىندارمەن سويلەسىپ, ونىڭ ادام اعزاسىنا تيگىزەر زيانى تۋرالى تۇسىنىك جۇمىستارىن جۇرگىزدى. ودان ءارى بەلسەندى جاستار تۇرعىندارعا تەمەكىنىڭ زارداپتارى جايىندا ارنايى باسپادان شىعارىلعان كىتاپشالار مەن ۇنپاراقشالار تاراتىپ, تۇرعىنداردىڭ كوكەيكەستى ساۋالدارىنا جاۋاپ بەردى.
«وسىنداي دەنساۋلىققا پايداسى مول يگى ىستەر تۇرعىندار اراسىندا ءجيى ءوتىپ تۇرسا جاقسى بولار ەدى. سوڭعى ۋاقىتتا قىز-كەلىنشەكتەر اراسىندا وسى تەمەكى تارتاتىندار سانى كوبەيۋدە. سوندىقتان دا اۋرۋ بالالاردىڭ سانى ارتىپ كەلەدى. بۇل ورتاق الەمدىك پروبلەماعا اينالىپ وتىر», – دەيدى اۋداندىق ەمحانانىڭ ناركولوگ دارىگەرى ساۋلەت تولەمىسوۆا.
اللابەرگەن قونارباەۆ
ماڭعىستاۋ وبلىسى,
ماڭعىستاۋ اۋدانى
...ءۇن قوسادى
مەكتەپ تاريحىن ناقتىلايتىن دەرەك
گازەتىمىزدىڭ پاۆلودار وبلىسىنداعى مەنشىكتى ءتىلشىسى فاريدا بىقايدىڭ «مىرجاقىپ دۋلاتوۆتىڭ ەسىمى بەرىلەدى» اتتى شاعىن ماقالاسىنا وراي («ەگەمەن قازاقستان» گازەتى, 2 ءساۋىر, 2018 جىل) رەداكتسيامىزعا حات كەلىپ ءتۇستى. ماقالادا ۋسپەن اۋدانىنىڭ جەلەزين اۋىلىنداعى №3 قازاق ورتا مەكتەبىنە 2011 جىلى وبلىستىق ونوماستيكالىق كوميسسيانىڭ م.دۋلاتوۆتىڭ ەسىمىن بەرۋ جونىندەگى ۇسىنىسىنا بيىل وبلىستىق ءماسليحاتتىڭ كەزەكتى سەسسياسىندا وبلىستىق تىلدەردى دامىتۋ باسقارماسى وبلىس اكىمدىگى مەن وبلىستىق ءماسليحاتتىڭ بىرلەسكەن قاۋلىسى مەن شەشىمىن ۇسىنعانى, جوبادا مەكتەپكە م.دۋلاتوۆتىڭ ەسىمى بەرىلەتىنى, قۇجاتتاردىڭ رەسپۋبليكالىق ونوماستيكاعا جىبەرىلگەنى قامتىلعان بولاتىن.
وسى ءجايت بويىنشا حات جولداعان زەينەتكەر ۇستاز, قامقورشىلار كەڭەسىنىڭ ءتورايىمى ن.الدىباەۆا مەكتەپكە م.دۋلاتوۆتىڭ ەسىمىن بەرۋ ماسەلەسىن 2009 جىلى 11 جەلتوقساندا اتا-انالار كوميتەتىنىڭ توراعاسى مارات حاسان ۇلى باگجيكوۆ كوتەرگەنىن, وسىعان وراي قۇزىرلى مەكەمەلەرگە ءوتىنىش حاتتار جازىلعانىن, بارلىق جۇمىس اتالعان ازاماتتىڭ باسشىلىعىمەن جۇرگىزىلگەنىن ايتا كەلە, م.باگجيكوۆتىڭ «تۋعان ولكە» گازەتىنىڭ №46 سانىندا (14 قاراشا, 2009 جىل) جەلەزين اۋىلىندا تۇڭعىش قازاق مەكتەبى ىسكە قوسىلاردا 100-دەن استام اۋىلداستارىنىڭ قولىنىڭ قويىلۋىمەن اۋدان اكىمىنە وتىنىشپەن كىرگەنى جانە الاش قايراتكەرىنىڭ ءومىرى جايلى جازعان «الاشتىڭ ارداقتى ازاماتى» اتتى ماقالاسىن جولداپتى.
ماتەريالداعى مەكتەپ تاريحىنا قاتىستى دەرەكتەردى تولىقتىرۋعا ءۇن قوسقان حات يەسىنە رەداكتسيا تاراپىنان ريزاشىلىعىمىزدى بىلدىرەمىز.
«ەگەمەن-اقپارات»
...ماقتان تۇتادى
ارداگەر اتىنا كوشە بەرىلدى
قىزىلوردا وبلىسى, شيەلى اۋدانىنىڭ كوكشوقى شاعىن اۋدانىندا ۇلى وتان سوعىسى جانە ەڭبەك ارداگەرى بايتىلەس ءجۇسىپوۆتىڭ اتىنا كوشە بەرىلدى. اۋدان اكىمى ۇلى وتان سوعىسىنىڭ ارداگەرى بايتىلەس ءجۇسىپوۆتىڭ ەل قورعاۋداعى ازاماتتىق پارىزى مەن بەيبىت ومىردە ەلەۋلى ەڭبەك ەتكەندىگىن العا تارتتى. وتان قورعاۋ بارىسىندا بىرنەشە قالالاردى ازات ەتۋگە قاتىسىپ, وردەن, مەدالدارمەن ماراپاتتالعان بايتىلەس اقساقال ەلگە كەلگەن سوڭ دا جاماعاتىنا ۇلگى كورسەتكەن كىسى. ۇنەمى ونەگە بيىگىنەن كورىنگەن اۋلەت ۇرپاقتارى بۇل كۇندەرى ءتۇرلى سالادا ەل دامۋىنا وزىندىك ۇلەس قوسىپ كەلەدى. ولاردى شيەلىلىكتەر ونەگە تۇتادى. ەرلىك پەن ەلدىكتى دارىپتەۋ بۇگىنگى وسكەلەڭ ۇرپاقتىڭ الدىندا تۇرعان مىندەتى بولسا, اۋدان اكىمدىگىنىڭ ۇيىمداستىرۋىمەن وتكىزىلگەن شارا سونىڭ دالەلى. كوشەنىڭ اشىلۋ سالتاناتىندا بايتىلەس اقساقالدىڭ كوزىن كورگەن وكشەلەستەرى ەستەلىكتەر ايتسا, اعايىندارى جاقسىنىڭ ارتىندا ءىز قالارىن ماقتان تۇتتى.
نۇرماحان ەلتاي
قىزىلوردا وبلىسى,
شيەلى اۋدانى
...رەنىشىن بىلدىرەدى
تويدان جۇدەپ قايتتىم...
«توي دەسە قۋ باس دومالايدى» دەمەكشi, ءبىر دەمالىستا تانىسىمنىڭ بالاسىنىڭ ۇيلەنۋ تويىنا باردىم. بiر قىزىعى, توي بەتاشارسىز, جار-جارسىز ءوتتi. كەلiننiڭ بەت-اۋزى تۇمشالانعان, كۇيەۋ جiگiتتiڭ بەتi ساقال-مۇرتتان كورiنبەيدi. ۇيپا-تۇيپا, كيiمi ولپى-سولپى, تۋرا بiر ۇيقىدان تۇرا سالىپ, جۇگiرiپ كەلگەندەي اسەر قالدىردى...
قازاقتىڭ تويى دەگەنiمiز – دومبىرامەن كۇيi كۇمبiرلەگەن, بيi بيلەنگەن, شاشۋى شاشىلعان, ءان-جىرى شىرقالعان, اقساقالدىڭ باتاسى ايتىلعان قۋانىشتى ءسان-سالتانات ەمەس پە؟! نەسiن ايتاسىز, جاستاردىڭ ومiرiندە بiر رەت بولاتىن ۇيلەنۋ تويىندا ءسان-سالتاناتسىز, تويدىڭ باسىنان اياعىنا دەيiن «ۇستازداردىڭ» ۋاعىزىن تىڭداپ قايتتىق. تويدىڭ اراق-شاراپسىز وتكەنiنە ەش قارسىلىعىم جوق. ول جاعى دۇرىس ەندi. بiراق بەتاشارسىز, جار-جارسىز قازاقتىڭ تويى بولۋشى ما ەدi?..
قاينار تالIپ ۇلى
اقتوبە وبلىسى
...العىس ايتادى
شيپاگەر شاپاعاتى
مەن بازارباي اللامبەرگەنوۆ وسىدان ءبىراز بۇرىن دەنساۋلىقتان قينالىپ استاناداعى رەسپۋبليكالىق دياگنوستيكالىق ورتالىققا بارىپ قارالىپ ەدىم, ونداعى قورىتىندى بويىنشا جۇرەك قانتامىرىم بىتەلىپ قالعان دەلىنىپ قورىتىندى شىعارىلىپ, بىردەن كارديولوگيالىق ورتالىققا وپەراتسياعا جولداما بەردى. سونداعى كۇيزەلىسىمدى ءالى كۇنگە ۇمىتا المايمىن.
سودان وپەراتسياعا دەيىن نە دە بولسا دەپ اقتوبەدە تۇراتىن حالىق ەمشىسى جانارىس ەڭسەپوۆتىڭ الدىنان ءوتۋدى ءجون كوردىم.
حالىق ەمشىسىنىڭ دۇعا-ەمى كوپ جۇرتتى اۋرۋىنان ايىقتىرعانىن ەستۋىم بار بولاتىن. نە كەرەك, ەمشى اۋرۋىمدى تىڭداپ بارىپ, ءوزىنىڭ ەم-دومىن جاساپ: «ەندى انا دياگنوستيكالىق ورتالىققا بارىپ قايتا تەكسەرۋدەن ءوتىپ كورىڭىز» دەپ دۇعا-باتاسىن بەرىپ شىعارىپ سالدى.
ءسويتىپ ءۇمىتىمدى ۇزبەي ەمشىنىڭ ايتۋى بويىنشا ورتالىقتان قايتا تەكسەرۋدەن ءوتىپ ەدىم – تالەيىم بار ەكەن, وتكەندەگى قورىتىندى ءىزىم-قايىم بولىپ, مىنە بۇگىنگە دەيىن ءدىن امان ءجۇرمىن... ءدىن امان دەمەكشى, ەمشىگە قايتا جولىم ءتۇسىپ, ىشىمدەگى زاقىمدانعان جەرلەرىم دە جازىلىپ, تىنىس الۋداعى كىدىرىس اتاۋلىدان دا قۇلانتازا جازىلىپ كەتتىم. شيپاگەر جانارىس جاقسىلىق ۇلىنىڭ شيپاسى بۇتكىل وتباسىمىزعا دارىپ, قوزعالۋدان قالعان ايەلىمنىڭ اياقتارىنا جان ءبىتىپ, ەڭ اياعى كەلىنىمنىڭ نارەستە كوتەرۋىنە دە سەبى بولىپ – اللا جار بولدى ەمەس پە. ول كىسى تۋرالى اقىن ءشومىشباي ساريەۆ جازعان «قىدىر اتا جانارىس جاقسىلىق ۇلى» اتتى كىتاپتى وقىپ ءتاۋباما كەلدىم. ايتارىم – ءبىر مەن ەمەس, ءدۇيىم جۇرتقا ەمى دارىپ, باتاسىن الىپ جۇرگەن حالىق ەمشىسىنىڭ راحىمى ءبىر اللادان قايتسىن.
بازارباي اللامبەرگەنوۆ,
ورىنبەك شاريپوۆ,
ەڭبەك ارداگەرلەرى
استانا