جەلى وتكىر, كۇن ساۋلەسى مول تۇسەتىن ماڭعىستاۋ – جەل مەن كۇن ەنەرگياسىن وندىرۋگە قولايلى ءوڭىر.
استانا قالاسىندا «بولاشاق ەنەرگياسى» ۇرانىمەن وتكەن ەكسپو-2017 حالىقارالىق مامانداندىرىلعان كورمەسى ماڭعىستاۋدا ينۆەستيتسيا تارتۋ, تەحنولوگيالىق جاڭارۋ جانە قولدا بار مۇمكىندىكتەردى پايدالانۋعا سەرپىن بەردى. تۇراقتى قۋات كوزدەرىن جۇرتشىلىق نازارىنا ۇسىنۋ ماقساتىنداعى باستاما ماڭعىستاۋدىڭ تابيعي مۇمكىندىگىمەن ساي كەلىپ, وڭىردە «جاسىل ەكونوميكا» باعدارلاماسى بويىنشا بىرنەشە جوبانى جۇزەگە اسىرۋ جوسپارلاندى. تۇپقاراعان اۋدانىنىڭ اقشۇقىر اۋىلىنان قۋاتتىلىعى 5مۆت جەل ەلەكتر ستانساسىن جانە قۋاتتىلىعى 42مۆت جەل ەلەكتر ستانساسىن سالۋ, قاراقيا اۋدانىنداعى تاۋلىگىنە 50 000 تەكشە مەتر سۋ تازالايتىن تۇزسىزداندىرۋ زاۋىتى قۇرىلىسى, «ماەك-قازاتومپروم» جشس اۋماعىنان سىيىمدىلىعى 250 مۆت قۇراما تسيكلداعى زاۋىت سالۋ سىندى ماڭىزدى جوبالار سارالاندى. سولاردىڭ ءبىرى ماڭعىستاۋ اۋدانىنىڭ ورتالىعى شەتپە اۋىلىنان جانە مۇنايلى اۋدانىنىڭ باتىر اۋىلىنان كۇن ەلەكتر ستانساسىن سالۋ بولاتىن. مامىرداعى دوستىق, بىرلىك مەرەكەسى اياسىندا باتىر اۋىلىنداعى جوبانىڭ تۇساۋى كەسىلدى. كۇن ساۋلەسىنەن 2 مۆت ەلەكتر قۋاتىن الاتىن ستانسانىڭ جالپى اۋدانى – 36,05 گا بولسا, جوبا قۇنى – 1,2 ملرد تەڭگە. «بيزنەستىڭ جول كارتاسى-2020» بيزنەستى قولداۋ جانە دامىتۋ باعدارلاماسى ارقىلى قارجىلاندىرىلعان جوبا وتاندىق وندىرىستەگى كۇن باتارەيالارىندا جۇمىس ىستەيتىن تۇڭعىش ەلەكتر ستانساسى بولۋىمەن دە ماڭىزدى. ەلەكتر ستانساسىن پايدالانۋ ءۇشىن ورناتىلعان 8580 كۇن پانەلدەرى قازاقستاندا جانە وتاندىق كرەمنيدەن وندىرىلگەن, ياعني وتاندىق ءونىم. جاڭا قوندىرعى ارقىلى 300-گە جۋىق ءۇي تازا ەلەكترمەن قامتاماسىز ەتىلەتىن بولادى.
مەرەكە اياسىندا ماڭعىستاۋدا تاعى ءبىر ماڭىزدى جوبانىڭ ىرگەتاسى قالانىپ, قۇرىلىس جۇمىستارىنا باستاما بەرىلدى. بۇل – قۇرىق اۋىلىنداعى تەڭىز سۋىن تۇشىتاتىن زاۋىت قۇرىلىسى. قۇنى 39 ملرد تەڭگە دەپ ەسەپتەلگەن جانە تاۋلىگىنە 50 000 تەكشە مەتر سۋ وڭدەۋ قۋاتتىلىعىمەن جۇمىس جاسايدى دەپ مەجەلەنگەن زاۋىت جەكە ينۆەستورلاردىڭ قاراجاتىمەن سالىنادى. 2020 جىلى قۇرىلىس جۇمىستارى اياقتالىپ, ىسكە قوسىلادى دەپ جوسپارلانعان زاۋىت قۇرىلىسىنا 300 ادام جۇمىسقا تارتىلسا, پايدالانۋعا بەرىلگەن سوڭ 150 ادام جۇمىسپەن قامتىلادى.
– قۇرىق اۋىلىندا تەڭىز سۋىن تۇشىتۋ زاۋىتىنىڭ جوبالاۋ-ىزدەستىرۋ جانە قۇرىلىس جۇمىسى باستالۋى وبلىس ءۇشىن ماڭىزدى وقيعا. بۇل ارقىلى ءبىز اقتاۋ, جاڭاوزەن, جەتىباي, مۇنايشى, قۇرىق, شەتپە ەلدى مەكەندەرىن اۋىز سۋمەن قامتاماسىز ەتۋ جانە اۋىل شارۋاشىلىعى سالاسىن دامىتۋ ماسەلەسىن تولىقتاي شەشۋگە قول جەتكىزەتىن بولامىز, – دەدى ايماق باسشىسى ەرالى توعجانوۆ.
گۇلايىم شىنتەمىرقىزى, «ەگەمەن قازقستان»
ماڭعىستاۋ وبلىسى