بۇل كۇندەرى اتىراۋلىق قىلقالام شەبەرى كاميلا جاپالوۆا الەمنىڭ 200 ەلىنەن 3 مىڭعا تارتا قىلقالام شەبەرى جۇمىستارىن جارنامالاپ جاتقان «Artexspo New York-2018» كورمەسىندە ءجۇر. ايتقانداي, نيۋ-يوركتەگى ايتۋلى كورمە بيىل ءوزىنىڭ 40 جىلدىعىن اتاپ وتۋدە. قوس وقيعاعا قاتار كۋا بولىپ جۇرگەن سۋرەتشى كاسپي تەڭىزىنەن ەسكەن لەپتى تىنىق مۇحيتتىڭ ار جاعىنا جەتكىزدى.
– بۇل كورمەنىڭ ماقساتى – وسى زامانداعى الەمدەگى ەڭ تالانتتى سۋرەتشىلەردى توعىستىرۋ. ولاردىڭ شىعارماشىلىعىن بەزبەندەۋ ارقىلى ونەر تۋىندىلارىنا جول اشۋ. كورمەنىڭ العاشقى كۇنىنە اتاقتى ونەرتانۋشىلار, مۋزەيلەر مەن گالەرەيالاردىڭ باسشىلارى, قالتالى كوللەكتسيونەرلەر, ونەر دەلدالدارى قاتىسىپ, سۋرەتشىلەردىڭ دەڭگەيىنە باعا بەرىپ, ۇناعان تۋىندىلاردى ساتىپ الادى.
جولى بولعان قىلقالام شەبەرلەرى قىمبات تاپسىرىستار الىپ, ءتيىمدى كەلىسىمشارتتارعا وتىرادى. «Artexspo New York» كورمەسىنىڭ ەكىنشى كۇنى بۇكىل ءسان-سالتاناتىمەن, ۇلكەن كونتسەرتپەن اشىلىپ, 5 كۇنگە جالعاسادى. وسى ارالىقتا سۋرەتشىلەردىڭ بولاشاعىنا جول اشاتىن وتە ۇلكەن مۇمكىندىكتەر تۋادى. كورمەدەن الىپ جۇرگەن اسەرىمدى بىرنەشە سويلەمگە سىيعىزا المايمىن. الەمنىڭ ءار شالعايىنان ىرىكتەلىپ شاقىرىلعان, 3 مىڭعا تارتا سۋرەتشى قاتىسىپ جاتقان كورمەنىڭ زالدارى وتە ۇلكەن, اۋقىمى كەڭ ءارى اسەم, دەيدى قازاقستان سۋرەتشىلەر وداعىنىڭ مۇشەسى, اتىراۋ وبلىسىنىڭ مادەنيەت قايراتكەرى كاميلا جاپالوۆا.
نيۋ-يوركتە قازاقى ناقىشتارعا سالتانات قۇرعىزعان قازاق قىزى كورمەدەگى ءاربىر جۇمىستى كەلەشەكتىڭ قۇندى جادىگەرى دەپ ەسەپتەيدى. جانە كاميلا بۇل وقيعانىڭ قيالىنا شابىت قوسىپ, جارىققا قايتالانباس تۋىندىلار اكەلەتىنىنە سەنىمدى.
– كورمەدەگى ەرتەگىدەي عاجايىپ الەمگە, نيۋ-يوركتىڭ حاۋس تىرشىلىگىنە, قالانىڭ كوز تويماس تۇنگى كورىنىستەرىنە ساپار شەگە وتىرىپ, ومىرلىك شىعارماشىلىق ازىق جينادىم. شەتەلدىك ارىپتەستەرىممەن بولىسكەن اسەرلەر تاجىريبەمدى بايىتتى. شىعارماشىلىق قورجىنعا جيناعان بايلىقتى ءوز شاكىرتتەرىممەن ءبولىسۋدى بورىش سانايمىن. كەز كەلگەن سۋرەتشىگە بۇيىرا بەرمەيتىن الەمدىك كورمەنىڭ ءبىر بولشەگى بولعانىم ءۇشىن ءوزىمدى وتە باقىتتى سەزىنىپ ءجۇرمىن, – دەپتى جەرلەسىمىز اقش-تان جولداعان حاتىندا.
ايناش ەسالي,
«ەگەمەن قازاقستان»
الماتى