ەل تاعدىرى جولىندا ءتۇن ۇيقىسىن ءتورت بولگەن تۇڭعىش پرەزيدەنتىمىز نۇرسۇلتان نازارباەۆتى ەلىمىزدىڭ جوعارى مەملەكەتتىك ناگراداسى – «حالىق قاھارمانى» اتاعىنا ۇسىنۋدى زاڭ تۇرعىسىندا قاراعان سەناتتىڭ پلەنارلىق وتىرىسىنىڭ شەشىمى بارشا قازاقستاندىقتاردى ءبىر سەرپىلتىپ تاستاعانى انىق. وسى قۋانىشقا بايلانىستى كازتسيك, كومسومول ەلدى مەكەن جۇرتشىلىعى ءبىر-بىرىنەن «ءسۇيىنشى!» سۇراسىپ, مارە-سارە بولدى. بۇل – قاراپايىم حالىقتىڭ ەلباسىنىڭ ەڭبەگىنە ءادىل باعا بەرگەنى, ساياساتىن تولىقتاي قولداعانى.
تاۋەلسىزدىك مەرەيى اتاپ وتىلەتىن قاسيەتتى كۇن دە جاقىنداپ كەلەدى. وسى ساتتە وتكەن جىلدارداعى اتقارىلعان ىستەر, شىققان بەلەستەر كوز الدىمىزدان تىزبەكتەلە وتۋدە. قاي جاعىنان قاراساق تا ەلدىڭ الەۋمەتتىك, تۇرمىستىق جاعدايى جاقساردى. ءورىسىمىز مالعا تولدى. ءوندىرىس ورىندارى كوپتەپ اشىلدى. ەلىمىزدە ءجۇرىپ جاتقان ساياسي, الەۋمەتتىك-ەكونوميكالىق, قۇقىقتىق رەفورمالاردىڭ جايى كوڭىل قۋانتارلىق.
مىنە, وسىنىڭ ءبارى – كوشباسشىمىزدىڭ الەمدى شارلاپ, دامىل تاپپاي بىردە اندا, بىردە مۇندا ساپارلاردا جۇرگەنىنىڭ, قازاقستاندى الىس-جاقىنعا تانىتۋىنىڭ ناتيجەسى. تۋعان وتانىمىزداعى جاڭالىقتاردى قالت جىبەرمەي, تەلەديداردان كورىپ, گازەتتەردەن وقي وتىرىپ, ەلباسىنىڭ قاجىرلىلىعى مەن سارا ساياساتىنا, كورەگەندىگىنە, كەمەڭگەرلىگىنە ءتانتى بولامىن. ەلى مەن جەرىن ءسۇيۋدىڭ, حالقىنا قىزمەت ەتۋدىڭ ۇلگىسى وسىنداي-اق بولار. ەرەن ەڭبەگىمەن ەلىن تانىتۋداعى تاريحي رولىنە جوعارى باعا بەرىلگەنىنە شىن قۋانامىن.
ەلباسىنىڭ جولداۋلارى مەن وبلىس, اۋدان اكىمدەرىنىڭ وسىعان بايلانىستى تاپسىرمالارىن ورىنداۋ ماقساتىندا وكرۋگ اكىمى رەتىندە ۇيىمداستىرۋشىلىق جۇمىستى جانداندىرىپ, حالىقتىڭ جاعدايىن جاقسارتۋ, ەلدى مەكەندەردى ساۋلەتتەندىرۋ جولىنداعى كوپتەگەن جۇمىستاردى تياناقتى جۇرگىزىپ كەلەمىز.
كوشباسشىمىزدىڭ تەك ءوز ەلىمىزدە عانا ەمەس, حالىقارالىق دەڭگەيدە اتقارعان جۇمىستارى مەن باستاماشىلىعىنا دا جوعارى باعا بەرىلىپ ءجۇر. بۇل – پرەزيدەنتتىڭ ءسوزى مەن ءىسى توعىسقانىنىڭ دالەلى. بويىنداعى اللا بەرگەن كەمەڭگەرلىك, كورەگەندىك قاسيەتتەر «مىڭ ءولىپ, مىڭ تىرىلگەن» قازاق حالقىن قايتا تۇلەتۋدە ۇلكەن ءرول اتقارعانى تاعى انىق.
پارلامەنت سەناتى قابىلداعان شەشىم – ناعىز حالىقتىق شەشىم. ەلباسى «التىن جۇلدىز» جانە «وتان» وردەنى قوسا تاپسىرىلىپ, «حالىق كاھارمانى» اتانىپ جاتسا, بۇل تاۋەلسىزدىگىمىزگە, جالپى قازاق حالقىنا جاسالعان قۇرمەت بولماق. بۇل جەكە مەنىڭ عانا ەمەس, ىلە اۋدانىنداعى كازتسيك اۋىلدىق وكرۋگى تۇرعىندارىنىڭ پىكىرى.
قاسيەتتى جۇما كۇنىن قاريالار وسىلاي قارسى الىپ, اقجارما تىلەكتەرىن ورتاعا سالدى. «كوپ پىكىرى – كول» دەگەن. مەرەيلى ساتتەرىمىز كوپ بولسىن, كوكبايراعىمىز بيىكتەردە جەلبىرەسىن.
بەكبولات بەرەكەتوۆ, اۋىل اكىمى.
الماتى وبلىسى,
ىلە اۋدانى.