سولتۇستىك قازاقستان اكىمى «سەرپىن» تۇلەكتەرىمەن كەزدەستى

كەزدەسۋگە جۇمىس بەرۋشىلەر جانە وقۋ ورىندارىنىڭ باسشىلارى قاتىستى. كۇن تارتىبىندە سەرپىندىك تۇلەكتەردى جۇمىسقا ورنالاستىرۋ ماسەلەسى تالقىلاندى. وندا ءوڭىر باسشىسى مەنتورلىق جوبانىڭ جۇزەگە اساتىنىن, ءوزى سەرپىندىك تۇلەككە «مەنتور» بولاتىنىن جاريا ەتتى. ول بويىنشا جاس مامانعا اقىل-كەڭەس بەرىلىپ, تاجىريبەمەن بولىسەدى. جۇمىسقا ورنالاسۋ جەكە باقىلاۋعا الىنادى. قۇمار ىرگەباي ۇلى  مەملەكەتتىك ورگانداردىڭ باسشىلارىن, كاسىپكەرلەردى جانە كاسىپورىنداردىڭ ديرەكتورلارىن «سەرپىننىڭ» تۇلەكتەرىنە  «مەنتور» بولۋعا شاقىردى.

قازىر اتالمىش باعدارلامانىڭ ستۋدەنتتەرى مەن تۇلەكتەرى وڭىرىمىزدە ءوز وتباسىلارىن قۇرا باستادى. سولاردىڭ ءبىرى – مۇرسالبەك وڭعاربەك. ول بيىل وقۋىن ءتامامداپ, جۇبايى ەكەۋى ءۋاليحانوۆ اۋدانىنا كوشىپ بارماق.

«سەرپىننىڭ» ستۋدەنتتەرى وبلىستا شاڭىراق كوتەرىپ, بالا بولسا,  تەگىن ءۇي سالىپ بەرەتىن بولامىز. باسپانا جوعارى الەۋەتتى اۋىلداردا بوي كوتەرەدى. دوستارىڭا, اعايىن-تۋىسقاندارىڭا وسى جاڭالىقتى جەتكىزىڭىزدەر»,  ق. اقساقالوۆ. 

وڭىردە «سەرپىن» باعدارلاماسى بويىنشا 5 وبلىستان كەلگەن 1114 ستۋدەنت ءبىلىم الۋدا.ونىڭ 862-ءى ماناش قوزىباەۆ اتىنداعى سقمۋ-دە وقيدى. 252 ستۋدەنت 5 كوللەدجدە ءبىلىم الۋدا.  بيىل 319 تۇلەك وقۋلارىن ءتامامدايدى. قازىر 125 ادام جۇمىسقا ورنالاستى, 43 تۇلەك وقۋلارىن ودان ءارى جالعاستىرماق.

سولتۇستىك وڭىرگە كەلگەن ءار سەرپىندىككە 84 مىڭ تەڭگە كولەمىندە سۋبسيديا تولەنەدى. پاتەر جالداۋ ءۇشىن قالادا 48 مىڭ تەڭگە, ال اۋىلدا 36 مىڭ تەڭگە كولەمىندە كومەكاقى  بەرىلەدى.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى