ورال قالاسىندا مادەنيەت جانە ونەر سالاسى ۇيىمدارى مەن قىزمەتكەرلەرىنىڭ «رۋحاني قازىنا» اتتى وبلىستىق فەستيۆالى ءوتتى. فەستيۆالدە مۋزەي, كىتاپحانا جانە مادەنيەت ءۇيى قىزمەتكەرلەرى ماراپاتتالىپ, ۇزدىكتەر استانا قالاسىندا وتەتىن رەسپۋبليكالىق بايقاۋعا جولداما الدى.
باتىس قازاقستان وبلىستىق حالىق شىعارماشىلىعى ورتالىعى ۇيىمداستىرعان بۇل فەستيۆالدىڭ ماقساتى – مادەني ويىن-ساۋىق سالاسىندا تاجىريبە الماسۋ, ۇزدىك ىستەردى ناسيحاتتاۋ, ونەر ادامدارى مەن ۇجىمدار اراسىندا ءوزارا شىعارماشىلىق بايلانىس ورناتۋ. اۋىل, اۋدان, قالا, وبلىس دەڭگەيىندە ءۇش كەزەڭ ارقىلى وتكىزىلگەن بايقاۋدا جەڭىمپازدار 16 اتالىم بويىنشا ماراپاتتالىپ, رەسپۋبليكالىق سىندا وبلىس نامىسىن قورعايتىن بولدى.
– بۇل وتە ماڭىزدى شارا. ەلباسىمىزدىڭ «رۋحاني جاڭعىرۋ» باعدارلاماسى قولعا الىنعانىنا ءبىر جىل ۋاقىت ءوتتى. بۇل كەزەڭدە از جۇمىس اتقارىلعان جوق. مۇنى بۇگىن ءبىز ءار اۋداننىڭ اتقارعان جۇمىستارى بەينەلەنگەن كورمەدەن دە كورىپ وتىرمىز. وتكەن جىلى سىرىم اۋدانىندا الاش مۋزەيىن كۇردەلى جوندەۋدەن وتكىزدىك. ايگىلى كۇيشىلەر قۇرمانعازى مەن ديناعا ەسكەرتكىش ورناتتىق. كۇي اتاسى قۇرمانعازىنىڭ بيىلعى مەرەيتويى يۋنەسكو دەڭگەيىندە اتالىپ وتەدى. استانا قالاسىندا مانشۇك مامەتوۆاعا ەسكەرتكىش ورناتامىز, سونىمەن بىرگە ورال قالاسىندا يساتاي مەن ماحامبەت ەسكەرتكىشىن دە بيىل ورناتامىز دەپ شەشىم الدىق. تاريحى تەرەڭ, تالاي داڭقتى تۇلعالار دۇنيەگە كەلگەن ءوڭىرىمىزدىڭ ارعى-بەرگى تاريحى تۇگەل قامتىلاتىن كوپتومدىق جيناق شىعارامىز. مىنە, بۇل جۇمىستىڭ ءبارى ءبىزدىڭ اۋىزبىرشىلىگىمىزدىڭ ارقاسىندا, ىنتىماعىمىزدىڭ ناتيجەسىندە جۇزەگە اسىپ جاتىر. بولاشاقتا دا ويعا العان جۇمىستارىمىزدى بىرلەسە اتقارۋعا شاقىرامىن. «رۋحاني جاڭعىرۋ» باعدارلاماسى اياسىندا ايانباي ەڭبەك ەتەيىك! – دەدى ءوز سوزىندە باتىس قازاقستان وبلىسىنىڭ اكىمى التاي كولگىنوۆ.
وسى شاراعا «قاسيەتتى قازاقستان» عىلىمي-زەرتتەۋ ورتالىعى باسشىسىنىڭ ورىنباسارى باتىرحان جۇماباەۆ ارنايى كەلگەن ەدى. استانالىق مەيمان ءوز سوزىندە قازىلار القاسىمەن بىرگە بۇگىنگى بايقاۋدىڭ ناتيجەسىن شىعارىپ, ۇزدىكتەردى انىقتاعان كەزدە باتىس قازاقستان وبلىسىنداعى مۋزەي قىزمەتكەرلەرىنىڭ عىلىمي ىزدەنىسى, كاسىبيلىگى وتە جوعارى بولعاندىعىن ايتىپ ءوتتى.
سونىمەن, باتىس قازاقستان وبلىسىنداعى ەڭ ۇزدىك اۋداندىق مۋزەي – سىرىم اۋدانىنداعى سىرىم دات ۇلى مۋزەيى (مەڭگەرۋشىسى ا.ويشىباەۆا), ەڭ ۇزدىك وبلىستىق مۋزەي – «بوكەي ورداسى» تاريحي مۋزەي-كەشەنى بولىپ تانىلدى. «ۇزدىك اۋداندىق مۋزەي قىزمەتكەرى» اتاعىنا – ءبورلى اۋداندىق ولكەتانۋ مۋزەيىنىڭ مەڭگەرۋشىسى التىنبوبەك سۇيىندىكوۆ, «ۇزدىك وبلىستىق مۋزەي قىزمەتكەرى» اتاعىنا جاڭگىر حان اتىنداعى تاريحي ولكەتانۋ مۋزەيىنىڭ مەڭگەرۋشىسى نۇرجان تولەپوۆ يە بولدى.
كىتاپحانا جۇيەسى دە وسى فەستيۆال اياسىندا ەڭبەك ۇزدىكتەرىن ساراپقا سالعان ەدى. بايقاۋ قورىتىندىسىندا ءبورلى اۋىلدىق كىتاپحاناسى – «ۇزدىك اۋىل كىتاپحاناسى» اتالىمىنا, سىرىم اۋداندىق ورتالىق كىتاپحاناسى – «ۇزدىك اۋداندىق كىتاپحانا», ج.مولداعاليەۆ اتىنداعى وبلىستىق امبەباپ عىلىمي-كوپشىلىك كىتاپحانا «ۇزدىك وبلىستىق كىتاپحانا» اتاعىنا لايىق دەپ تانىلدى. جەكەلەگەن كىتاپحانا قىزمەتكەرلەرى اراسىندا لاۋرا بەردىعاليەۆا (قازتالوۆ اۋدانى, قاراوبا اۋىلدىق كىتاپحاناسى), ايناگۇل باتىرحانوۆا (بوكەي ورداسى اۋداندىق كىتاپحاناسى) جانە سەرگەي بىكوۆ (ح.ەسەنجانوۆ اتىنداعى وبلىستىق بالالار مەن جاسوسپىرىمدەر كىتاپحاناسى) جەڭىمپاز اتاندى.
مادەنيەت ۇيلەرى اراسىندا وتكەن سايىستا زەلەنوۆ اۋدانىنداعى يانۆارتسەۆ اۋىلدىق كلۋبى – «ۇزدىك اۋىلدىق كلۋب», قازتالوۆ اۋدانى جالپاقتال اۋىلدىق مادەنيەت ءۇيى – «ۇزدىك اۋىلدىق مادەنيەت ءۇيى», ءبورلى اۋداندىق مادەنيەت ءۇيى – «ۇزدىك اۋداندىق مادەنيەت ءۇيى», ورال قالالىق جاستار مادەنيەت ءۇيى – «ۇزدىك قالالىق مادەنيەت ءۇيى» اتاندى. تەرەكتى اۋدانى اقسوعىم اۋىلدىق كلۋب مەڭگەرۋشىسى الماش ارىستانوۆا – «ۇزدىك اۋىلدىق كلۋب قىزمەتكەرى», قازتالوۆ اۋدانى اقپاتەر اۋىلدىق مادەنيەت ءۇيىنىڭ ديرەكتورى مارات حاسانوۆ – «ۇزدىك اۋىلدىق مادەنيەت ءۇيى قىزمەتكەرى», شىڭعىرلاۋ اۋداندىق مادەنيەت ءۇيىنىڭ ديرەكتورى گۇلجامال جۇماعازيەۆا – «ۇزدىك اۋداندىق مادەنيەت ءۇيى قىزمەتكەرى» دەگەن ديپلومدار مەن ارنايى سىيلىققا يە بولدى. بۇل اتالعان جەڭىمپازداردىڭ ءبارى دە رەسپۋبليكالىق بايقاۋعا جولداما الىپ, باق سىنايتىن بولدى.
ەل ىشىندە ونەر مەن مادەنيەتتى ناسيحاتتاپ, حالىقتىڭ ماعىنالى دا ءماندى دەمالىسىن ۇيىمداستىرىپ جۇرگەن, بىلايعى ۋاقىتتا كوپ ەلەنە بەرمەيتىن قاراپايىم مادەنيەت قىزمەتكەرلەرىنىڭ ابىرويى اسقاقتاعان كۇن بولدى. فەستيۆالگە قاتىسۋشىلار شارا سوڭىندا ەستەلىك سۋرەتكە ءتۇسىپ, ء ار اۋداننىڭ مادەنيەت پەن ونەر سالاسىنداعى ۇزدىك جەتىستىكتەرى بەينەلەنگەن كورمەنى تاماشالادى.
قازبەك قۇتتىمۇرات ۇلى, «ەگەمەن قازاقستان»
باتىس قازاقستان وبلىسى
سۋرەتتى تۇسىرگەن ايباتىر نۇراش