مەن عانا ەمەس, بارشا قازاقستاندىق ەلباسى تۋرالى تۋرا وسىلاي ايتارىنا شاك كەلتىرمەيمىن. ال, ۇكىمەت باسشىسى كارىم ءماسىموۆتىڭ تۇڭعىش پرەزيدەنتىمىزگە زاڭدى نەگىزدە «حالىق قاھارمانى» اتاعىن بەرۋ بويىنشا ءتيىستى زاڭدارعا تولىقتىرۋ ەنگىزۋ تۋرالى ۇسىنىسىن ۇكىمەت مۇشەلەرى ءبىراۋىزدان ماقۇلداعان زاڭ جوباسىن پارلامەنت سەناتى دەپۋتاتتارىنىڭ قولداۋى حالىقتىڭ ويىنان شىقتى. ەل تاۋەلسىزدىگىنىڭ 20 جىلدىعى قارساڭىندا تۇڭعىش پرەزيدەنتىمىز نۇرسۇلتان نازارباەۆقا «حالىق قاھارمانى» اتاعىنىڭ بەرىلۋى ايرىقشا ماڭىزدى تاريحي وقيعا بولدى. بۇل ەلىن سۇيەر ەرىن بارشا قازاقستاندىقتاردىڭ دا قۇرمەتتەيتىنىنىڭ, قادىرلەيتىنىنىڭ ايقىن كورىنىسى. ەلباسىنىڭ «حالىق قاھارمانى» اتاعىن الۋى بىلە بىلسەك حالىقتىڭ ابىرويى, ەلدىگىمىزدىڭ بەدەل-بيىگى. نۇرسۇلتان ءابىش ۇلى – بۇل اتاققا الدەقاشان لايىقتى ادام. ونىڭ تاۋەلسىزدىكتىڭ تۇعىرلى بولۋى جولىنداعى تاريحي تاعىلىمدى ىستەرى مەن ىزدەنىستەرى قازاقستاندى الەمگە تانىتتى, وسى ارقىلى ءوزىن دە الەمدىك ساياساتتىڭ التىن دىڭگەگى بولىپ جۇرگەندەرگە ادەمى مويىنداتتى. ونىڭ وسى جىلدارداعى بولاتتاي بەرىك ۇستانىمى ۇلان-عايىر جۇمىستىڭ اتقارىلۋىنا ۇيىتقى بولدى.
كەڭەستىك سولاقاي ساياساتتىڭ قۇرساۋىنان بوساپ, ەلىمىز ەگەمەندىك العاندا اق تۇيەنىڭ قارىنى جارىلعانداي اقجارىلقاپ كۇي كەشكەنىمىز كۇنى كەشە بولاتىن. حالقىنىڭ قالاۋىمەن مەملەكەت تىزگىنىن ۇستاعان نۇرسۇلتان ءابىش ۇلى سول ەلەڭ-الاڭ شاقتا دا ساياساتتاعى جانە ەكونوميكالىق دامۋداعى ۇستانعان باعىتتارىن ايقىن اڭعارتقان-دى. تاريحي قىسقا كەزەڭدە عاسىردا اتقارىلاتىن شارۋالاردىڭ باسى قايىرىلعانىن كوزىمىز كورىپ, كوڭىلىمىز سەزىپ وتىر. اۋەلى ەكونوميكانى دۇرىس جولعا قويۋدى قولعا العان ەلى ءۇشىن تۋعان ەردىڭ ساياساتتا دا الەمدى مويىنداتاتىنداي قادامدار جاساعانىن ايتۋ ءلازىم. وتكەن جيىرما جىلدا تاۋەلسىز مەملەكەتتىڭ نەگىزى قالانعانى, دەموكراتيالىق قوعام قالىپتاسقانى, حالىقارالىق بەدەلدى قاۋىمداستىقتارعا ءمۇشە بولعانى ەلباسى ەسىمىمەن تىعىز بايلانىستى. تاۋەلسىز جاس مەملەكەتىمىز نارىقتىق قاتىناستارعا توسەلىپ, دامۋدىڭ قازاقستاندىق ايشىقتى جولىن تاڭداۋىندا دا نۇرسۇلتان ءابىش ۇلىنىڭ وزىندىك قولتاڭباسى جاتقانى ءسوزسىز. ەلوردانى ارقاداعى استاناعا كوشىرىپ, وزگە مەملەكەتتەردىڭ تۇسىنە دە كىرمەيتىن ىرگەلى دە ءىرى ءىس تىندىرعانىن تورتكۇل دۇنيە تۇگەل ءبىلىپ وتىر. بۇل ەلباسىنىڭ ەرلىگى دە, ىسكەرلىگى دە بولاتىن.
ازعانتاي ۋاقىتتا اسقاق عيماراتتارى بوي تۇزەگەن استانادا الەمدىك دەڭگەيدەگى ۇلكەن جيىندار وتكىزىپ, ولاردا ەكونوميكالىق دامۋدىڭ, بەيبىتشىلىك پەن تۇراقتىلىقتىڭ تۇعىرىن بەكىتەتىن شەشىمدەرگە قول جەتكىزۋى بۇل كىسىنىڭ حالقىنىڭ باعىنا تۋعان ۇلى تۇلعا ەكەنىنىڭ ايقىن دالەلى. تاۋەلسىز ەلىمىزدەگى حالىقتىڭ بىرلىگى مەن ىنتىماعىن ساقتاۋداعى ەرەن ەڭبەگىنىڭ ءوزى نەگە تۇرادى. ءار الۋان ءدىن وكىلدەرىنىڭ باسىن استانادا الدەنەشە رەت قوسۋى, سەمەي پوليگونىنداعى سىناقتاردى توقتاتىپ, قازاقستاندى يادرولىق قارۋسىز ەلگە اينالدىرۋى, سوڭعى جىلداردا ءتۇرلى باعىتتارداعى وداقتار قۇرۋعا باستاماشى بولۋى نۇرسۇلتان نازارباەۆتىڭ قاجىر-قايراتىنىڭ, ەلىنىڭ ەرتەڭى ءۇشىن قىزمەت ەتۋدەگى جانقيارلىعىنىڭ ايقىن ايعاعى بولسا كەرەك. قالاي دەگەندە دە ەلباسىنىڭ وسىنشالىقتى ەڭبەگىنىڭ باعاسىن حالىق الدەقاشان بەرىپ قويعان. الايدا, بۇگىنگىدەي مەرەكەلى ساتتە ەلىنىڭ ەرتەڭى ءۇشىن تۇلعانىڭ تۋعان حالقىنان لايىقتى باعاسىن الۋى ورىندى بولدى. ءبىرتۋار ۇلىنا وسىنداي قۇرمەت كورسەتۋى ارقىلى قازاقستان حالقىنىڭ دا شوقتىعى بيىكتەپ, بەرەكە مەن بىرلىگى مىعىم ەل ەكەنىن تاعى ءبىر پاش ەتتى. مۇنى مەن ۇلتىن سۇيەر ۇلىنا دەگەن حالقىنىڭ قالتقىسىز سۇيىسپەنشىلىگى دەپ ويلايمىن, بولار ەلدىڭ بالاسى بولا بىلگەنىمىزدىڭ ءبىر ۇلگىسى دەپ باعالايمىن.
جۇمابەك كۋكانوۆ, «ءاليا جولدارى» جشس باس ديرەكتورى,
«نۇر وتان» حدپ ورتالىق تەكسەرۋ كوميسسياسىنىڭ مۇشەسى.
اقتوبە وبلىسى.