«رۋحاني جاڭعىرۋ» باعدارلاماسىنىڭ «قازاق تىلىندەگى 100 جاڭا وقۋلىق» جوباسى نەگىزىندە اۋدارىلعان العاشقى 18 كىتاپتىڭ ەلىمىزدەگى جوعارعى وقۋ ورىندارىنا قاشان جەتكىزىلەتىنى انىقتالدى, دەپ حابارلايدى قازاقپارات.
كىتاپتاردىڭ ۋنيۆەرسيتەتتەر مەن ينستيتۋتتارعا جەتكىزىلۋ مەرزىمىن قر تۇڭعىش پرەزيدەنتى - ەلباسى قورىنىڭ جانىنداعى اەسي-ءدىڭ وقۋلىقتاردى ساراپتاۋعا ارنالعان كەزدەسۋىندە ۇلتتىق اۋدارما بيۋروسىنىڭ جوبا باسشىسى الىبەك قيسىباي ايتتى.
«رۋحاني جاڭعىرۋ» باعدارلاماسىندا ايتىلىپ كەتكەندەي, قازاقستاندا قازىرگى زاماندا ينجەنەرلەر مەن دارىگەرلەر عانا ەمەس, بولاشاقتى تەرەڭ تۇسىنەتىن بىلىكتى گۋمانيتارلىق سالانىڭ ماماندارى دا اسا قاجەت. سانا مودەرنيزاتسياسى گۋمانيتارلىق بىلىمگە تىكەلەي بايلانىستى. وسى ورايدا تاريح پەن ساياساتتانۋ, الەۋمەتتانۋ مەن فيلوسوفيا, پسيحولوگيا, انتروپولوگيا, مادەنيەتتانۋ, فيلولوگيا جانە پەداگوگيكا عىلىمدارى بويىنشا ستۋدەنتتەرگە زامانعا لايىق, ءبىلىم بەرۋ ءۇشىن جاعداي جاساۋ مىندەتى تۇر. وسى مىندەتتى ىسكە اسىرۋعا مۇمكىندىك بەرەتىن نەگىزگى تەتىك رەتىندە - «جاڭا گۋمانيتارلىق ءبىلىم - قازاق تىلىندەگى 100 جاڭا وقۋلىق» جوباسى قولعا الىندى», - دەيدى الىبەك قيسىباي.
ول ءوز سوزىندە كوپكە بەلگىلى بولىپ وتىرعانداي, اتالعان جوبا بويىنشا العاشقى 18 كىتاپ تانىستىرىلعانىن, پرەزيدەنت, ۇكىمەت مۇشەلەرى جانە اكادەميالىق ورتا بۇل وقۋلىقتاردىڭ ساپاسىن جوعارى باعالاعانىن اتاپ ءوتتى.
«اۋدارىلعان كىتاپتاردى تاڭداۋ ءۇشىن ەلىمىزدەگى بارلىق وقۋ ورنىدارىنان ۇسىنىستار جينالىپ, ءبىزدىڭ قورعا بارلىعى 800-دەن استام وقۋلىقتىڭ ءتىزىمى كەلىپ ءتۇستى. جيناقتالعان تىزىمدەردىڭ نەگىزىندە بىرنەشە رەت باسىلعان, سوڭعى باسىلىم كەيىنگى ءۇش جىلدا شىققان, مازمۇندىق تۇرعىدان بەيتاراپ بولۋى قاجەت دەگەن تالاپتارعا سۇيەنە وتىرىپ, 2017 جىلى 18 وقۋلىق تاڭدالدى. سونىمەن قاتار, بۇل وقۋلىقتار دۇنيە جۇزىندەگى توپ-100 ۋنيۆەرسيتەتتىڭ, مىسالى گارۆارد, ستەنفورد, وكسفورد, كولۋمبيا ۋنيۆەرسيتەتتەرى سەكىلدى وقۋ باعدارلاماسىندا بولۋى قاجەت بولدى», - دەيدى ول.
ىرىكتەلگەن وقۋلىقتاردى اۋدارۋ جۇمىسىنا قازاقستاننىڭ الدىڭعى قاتارلى وقۋ ورىندارى مەن 200-گە تارتا مامان قاتىستى. الىبەك قيسىبايدىڭ سوزىنە سەنسەك, اۋدارماعا تەك اۋدارماشىلار عانا ەمەس, وسى سالانىڭ بىلىكتى عالىمدارى, اكادەميكتەرى مەن پروفەسسورلارى اتسالىسقان.
«جوسپارعا ساي, بۇل وقۋلىقتار مامىر ايىنىڭ سوڭىنا دەيىن جوو-لارعا جەتكىزىلەدى. 2018-2019 وقۋ جىلىنان باستاپ اۋدارىلعان وقۋلىقتار جوعارعى ءبىلىم بەرۋ جۇيەسىنە ەنەدى. سونداي-اق, وسى وقۋلىقتارمەن قازاقستاننىڭ بارلىق جوو-لارىنداعى ستۋدەنتتەر وقىتىلا باستايدى», - دەدى الىبەك قيسىباي.
ايتا كەتۋ كەرەك, ەلباسىنىڭ «رۋحاني جاڭعىرۋ» باعدارلاماسى اياسىنداعى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا قازاق تىلىنە 18 كىتاپ اۋدارىلعان بولاتىن.