«UMC» كورپوراتيۆتىك قورىنىڭ ونكولوگيا جانە ترانسپلانتولوگيا ۇلتتىق عىلىمي ورتالىعىنىڭ ينتەرۆەنتسيالىق رەنتگەنحيرۋرگيا بولىمشەسىنىڭ مەڭگەرۋشىسى ۆيكتور زەمليانسكي رەسەيگە بارىپ, قولقا انەۆريزماسىن قالپىنا كەلتىرۋدىڭ كىشى ءينۆازيۆتى ادىستەرىن قولدانا وتىرىپ, وتالار جاساپ قايتتى. بۇل وتالار ءبىرىنشى سانكت-پەتەربۋرگ مەملەكەتتىك مەديتسينالىق ۋنيۆەرسيتەتىنىڭ جانە قازان فەدەرالدىق ۋنيۆەرسيتەتىنىڭ كلينيكالارىندا جاسالدى.
رەنتگەنحيرۋرگتەردىڭ بىرلەسكەن جۇمىسىنىڭ ناتيجەسىندە قولقانىڭ ىشپەردەلىك ءبولىمىنىڭ انەۆريزماسى دياگنوزى قويىلعان 6 پاتسيەنتكە وتا ءساتتى جاسالدى. بۇل انەۆريزمانىڭ جارىلىپ كەتۋىنىڭ الدىن الىپ, ناۋقاستارعا قالىپتى ءومىر سالتىنا ورالۋعا مۇمكىندىك بەردى.
دوكتور ۆ.زەمليانسكيدىڭ ايتۋىنشا, قولقا انەۆريزماسى – قاۋىپتى دەرت. ول قانداي دا ءبىر پاتولوگيانىڭ سالدارىنان قولقا قابىرعالارىنىڭ سوزىلىپ نەمەسە جىڭىشكەرىپ كەتۋىنەن پايدا بولادى. قولقا انەۆريزماسى – ولىمگە اكەپ سوعۋى مۇمكىن بارىنشا قاتەرلى اۋرۋدىڭ ءبىرى. وعان شالدىققان ناۋقاس كوپ ۋاقىت ءوزىنىڭ اۋرۋ ەكەنىن دە سەزبەيدى. قولقا – ادام اعزاسىنداعى ەڭ ءىرى تامىر. وندا پايدا بولعان ۇلكەن انەۆريزما جارىلىپ كەتكەن جاعدايدا ناۋقاس ساناۋلى مينۋتتاردىڭ ىشىندە قايتىس بوپ كەتەدى نەمەسە قاتتى قان اعۋى سالدارىنان اۋىر جاعدايعا دۋشار بولادى.
«UMC» كورپوراتيۆتىك قورىنىڭ ونكولوگيا جانە ترانسپلانتولوگيا ۇلتتىق عىلىمي ورتالىعىندا قولقانىڭ ءتۇرلى بولىمدەرىن كىشى ءينۆازيۆتى جولمەن ەندوتروتەزدەۋ وتالارىن جاساۋدا ۇلكەن تاجىريبە جيناقتالدى. ۆ.زەمليانسكي تامىرىشىلىك زاماناۋي قۇرال – «ستەند-گرافتتى» پايدالانىپ, قولقاعا 300-دەن استام كىشى ءينۆازيۆتى وپەراتسيا جاساعان.
ايتا كەتەتىن جايت, ونكولوگيا جانە ترانسپلانتولوگيا ۇلتتىق عىلىمي ورتالىعىندا اتالعان جوعارى مامانداندىرىلعان ەمدەۋ ءادىسى ەلىمىزدىڭ بارلىق ازاماتتارى ءۇشىن قولجەتىمدى. بۇل مەملەكەت بيۋدجەتى ەسەبىنەن تەگىن جاسالادى, سونىمەن قاتار اقىلى مەديتسينالىق قىزمەت كورسەتۋ اياسىندا دا كورسەتىلەدى.
«ەگەمەن-اقپارات»