ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا اقتوبە وبلىسىنىڭ اكىمى بەردىبەك ساپارباەۆ «رۋحاني جاڭعىرۋ» باعدارلاماسىنىڭ اقتوبە وبلىسىندا جۇزەگە اسىرىلۋىنىڭ ءبىرىنشى جىلىنداعى قورىتىندىسىن تانىستىردى.
جيىن بارىسىندا ايماق باسشىسى «بولاشاققا باعدار: رۋحاني جاڭعىرۋ» اتتى ەلباسىنىڭ باعدارلامالىق ماقالاسى تۇرعىندار اراسىندا كەڭىنەن ناسيحاتتالعانىن اتاپ ءوتتى.
«اقتوبەدە ءبىر جىل ىشىندە «رۋحاني جاڭعىرۋ» باعدارلاماسىنىڭ ماتەريالدىق بازاسى جاسالدى. وبلىس ەكونوميكاسىنىڭ دامۋى قوعامدىق سانانىڭ جاڭعىرۋىنا, حالىقتىڭ ءال-اۋقاتىنىڭ ارتۋىنا وڭ اسەر ەتتى. نەگىزگى باعىتتار «اتامەكەن», «تاربيە جانە ءبىلىم», «رۋحاني قازىنا» جانە «اقپارات تولقىنى» – 4 كىشى باعدارلامالارى بويىنشا جالپى قۇنى 12,5 ملرد تەڭگەگە 89 ءىرى جوبا ىسكە اسىرىلدى. جىلدىڭ باستى جوباسى «تۋعان جەر» رەسپۋبليكالىق جەرلەستەر فورۋمى دەۋگە بولادى. فورۋمعا 20 مەملەكەتتەن: اقش, گەرمانيا, بىرىككەن اراب امىرلىكتەرى, رەسەي, ۋكراينا, ارمەنيا جانە ازەربايجاننان بارلىعى 300-دەن استام جەرلەستەر قاتىستى. وبلىسىمىزدىڭ ەكونوميكالىق دامۋىنا باعىتتالعان 80 ملرد تەڭگەنى قۇرايتىن 20 مەموراندۋمعا قول قويىلدى. «تۋعان جەر» فورۋمىنا كەلگەن جەرلەس 23 مەديتسينا سالاسىنىڭ اتاقتى دارىگەرلەرى 29-دان اسا كۇردەلى وپەراتسيا جاساپ, 1500 مەديتسينا قىزمەتكەرىن قامتيتىن 14 سەمينار وتكىزدى. فورۋم اياسىندا «تۋعان جەرگە تاعزىم» اكتسياسى جۇزەگە اسىرىلدى. قۇتتى مەكەن – اقتوبەدە جالپى قۇنى 5,7 ملرد تەڭگە تۇراتىن 614 الەۋمەتتىك جوبا جۇزەگە اسىرىلدى. جەرلەستەردىڭ قولداۋىمەن 28 سكۆەر مەن پارك قۇرىلىسى (300 ملن) سالىندى, الەۋمەتتىك نىساندار جوندەلدى, ەلدى مەكەندەردىڭ ينفراقۇرىلىمدارى جاقسارتىلدى. بيىل «تۋعان جەرگە تاعزىم» اكتسياسى ءوز جالعاسىن تابادى. وڭىردە جالپى قۇنى 2 ملرد 750 ملن تەڭگەگە 648 جوبا جۇزەگە اسىرىلادى. ەلىمىزدە تۇڭعىش رەت اقتوبە وبلىسىندا «انالارعا تاعزىم» رۋحاني-تاربيە بەرۋ ورتالىعىنىڭ قۇرىلىسى باستالدى. بۇل جوبا شەتەلدەردە جانە رەسپۋبليكا كولەمىندە تۇرىپ جاتقان جەرلەستەرىمىز – اقتوبەلىكتەردىڭ قولداۋىمەن جۇزەگە اسىرىلۋدا», دەدى ول.
سونىمەن قاتار ايماق باسشىسى بالالاردىڭ شىعارماشىلىق قابىلەتىن دامىتۋدى, فۋنكتسيالىق ساۋاتتىلىعىن ارتتىرۋدى, دارىندىلىعىن انىقتاۋدى, باسقارۋشىلىق قاسيەتىن دامىتۋدى, كاسىپكەرلىككە بەيىمدەۋدى, ماماندىق تاڭداۋىنا جول اشۋدى كوزدەيتىن قۇنى 1,5 ملرد تەڭگە تۇراتىن «شىعارماشىلىق اكادەمياسى» سالىنعانىن تىلگە تيەك ەتتى.
«بۇگىنگى كۇنى شىعارماشىلىق اكادەمياسى 7 باعىتتا 45 ۇيىرمە اشىپ, 5000-نان استام ءجاسوسپىرىمدى تاربيەلەۋدە. بيزنەستىڭ الەۋمەتتىك جاۋاپكەرشىلىگى اياسىندا قۇنى 1,5 ملرد تەڭگە تۇراتىن 720 ورىندىق «جەكپە-جەك» سپورت سارايى سالىندى. بۇگىنگى كۇنى مۇندا حالىقارالىق جانە رەسپۋبليكالىق دارەجەدەگى سپورتتىق جارىستار وتكىزىلۋدە. اقتوبەدە العاش رەت قۇنى 480 ملن تەڭگە تۇراتىن حوككەي ءمودۋلىنىڭ قۇرىلىسى سالىندى. سپورت كەشەنىندە 800-گە جۋىق بالا مانەرلەپ سىرعاناۋمەن, شورت-ترەكپەن, حوككەيمەن تەگىن اينالىسۋعا مۇمكىندىك الدى. ء«سابي» قايىرىمدىلىق قورىنىڭ قارجىسىنا قۇنى 1,4 ملرد تەڭگە تۇراتىن «مەيىرىم» الەۋمەتتىك بەيىمدەۋ جاستار ورتالىعى سالىندى, 111 تاربيەلەنۋشى تۇرىپ جاتىر. جەتىم, اتا-اناسىنىڭ قاراۋىنسىز قالعان بالالارعا ەرەكشە قامقورلىق جاسالدى. بۇگىنگى كۇنى 945 بالاعا جەرگىلىكتى كاسىپكەرلەر تاراپىنان قامقورشىلار بەكىتىلىپ, ولاردىڭ تۇرعىن ءۇي قۇرىلىس جيناق بانكىندەگى ەسەپ شوتتارى 210 ملن تەڭگەگە تولىقتىرىلدى. سونىمەن قاتار سلوۆاك ينۆەستورلارىمەن بىرلەسىپ, 3,8 ملرد تەڭگەنى قۇرايتىن 2500 ورىندىق «مۇزايدىنى» سپورت كەشەنى سالىنىپ جاتىر. حالىقارالىق دارەجەگە ساي كەلەتىن قۇنى 1,5 ملرد تەڭگەگە تەننيس ورتالىعى, كولەمى 8,5 مىڭ شارشى مەتر بولاتىن «جەڭىل اتلەتيكا مانەجى» حالىق يگىلىگىنە ۇسىنىلادى. جەرلەستەردىڭ قولداۋىمەن قالا جانە اۋدانداردا قۇنى 348 ملن تەڭگەگە 53 سپورت, ۆوركاۋت, شاعىن فۋتبول الاڭدارى جانە حوككەي كورتتارى سالىندى. سونىمەن قاتار «مەن – اقتوبەلىكپىن!» وڭىرلىك جاستار جوباسى ىسكە اسىرىلادى. جوبا اياسىندا 8 باعىت بويىنشا جۇمىس جۇرگىزىلەدى. قىتاي حالىق رەسپۋبليكاسى, رەسەي فەدەراتسياسىنىڭ ماسكەۋ, ورىنبور, قازان قالالارىندا, ەلىمىزدىڭ استانا, الماتى, ورال, قاراعاندى, ت.ب. قالالارىندا وقيتىن اقتوبەلىك جاستارمەن كەزدەسۋ وتەدى. جاستارعا اقتوبەدە ەڭبەك ەتۋگە, وبلىسىمىزدىڭ دامۋىنا ۇلەس قوسۋلارىنا جاعداي جاسالادى», دەدى ب.ساپارباەۆ.
ءباسپاسوز ءماسليحاتى بارىسىندا وبلىس اكىمى مەملەكەت باسشىسىنىڭ 5 الەۋمەتتىك باستاماسىنا دا توقتالىپ, وسى ورايدا اتقارىلىپ جاتقان ماسەلەلەردى تىلگە تيەك ەتتى.
«پارلامەنتتىڭ بىرلەسكەن وتىرىسىندا ەلباسى حالىققا 5 جاڭا الەۋمەتتىك باستاماسىن جاريالادى. ءبىرىنشى باستاما: ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ». اعىمداعى جىلى ءبىز 870 مىڭ شارشى مەتر نەمەسە كەم دەگەندە 8 مىڭ پاتەر سالۋدى اۋقىمدى مىندەت رەتىندە قويدىق. الايدا, ەلباسى ايتقانداي, بۇل ءالى جەتكىلىكسىز. «7 – 20 – 25» باستامالىق باعدارلاماسى وسى ماسەلەنى شەشۋگە وڭ اسەر ەتەدى. اعىمداعى جىلدىڭ سوڭىنا دەيىن ءوڭىر ەكونوميكاسىنىڭ ءوسىمىن كەم دەگەندە 5 پايىزعا ءوسىرۋ جۇمىستارى جالعاساتىن بولادى», دەدى اقتوبە وبلىسىنىڭ اكىمى.
راۋان قايدار, «ەگەمەن قازاقستان»