كەشە ورتالىق سايلاۋ كوميسسياسىنىڭ وتىرىسى ءوتىپ, وندا ورتالىق سايلاۋ كوميسسياسى 1999 جىلى قابىلدانعان «سايلاۋ ۋچاسكەلەرىندەگى, پۋنكتتەرىندەگى داۋىس بەرۋگە ارنالعان ۇيلەردى جابدىقتاۋ تۋرالى» قاۋلىعا ءۇي-جايلاردى داۋىس بەرۋ كۇنىنە دايىنداۋ ءتارتىبىن نەعۇرلىم انىق رەتتەۋ ماقساتىندا تولىقتىرۋلار مەن وزگەرىستەر ەنگىزدى.
بۇل ماسەلە جونىندە ورتالىق سايلاۋ كوميسسياسىنىڭ حاتشىسى باقىت مەلدەشوۆ حابارلاما جاسادى. كوميسسيا حاتشىسىنىڭ حاباردار ەتۋىنشە, ەنگىزىلگەن تۇزەتۋلەر داۋىس بەرۋ جانە داۋىستاردى ساناۋ ۇدەرىسىن نەعۇرلىم ايقىنىراق ەتۋدى, سايلاۋشىلار, بايقاۋشىلار, سايلاۋ كوميسسيالارىنىڭ مۇشەلەرى مەن بۇقارالىق اقپارات قۇرالدارىنىڭ وكىلدەرى ءۇشىن قاجەتتى جاعدايلاردى قامتاماسىز ەتۋدى كوزدەيدى.
وتىرىستا, سونداي-اق ورتالىق سايلاۋ كوميسسياسى جالپىۇلتتىق سوتسيال-دەموكراتيالىق پارتياسىنىڭ ورتالىق سايلاۋ كوميسسياسى ۋچاسكەلىك سايلاۋ كوميسسيالارى قۇرامىنا پارتيالاردىڭ كەڭەسشى داۋىس قۇقىعى بار وكىلدەرىن جىبەرۋى ءۇشىن بەلگىلەگەن مەرزىمدەرىنە قاتىستى ءوتىنىشىن دە قارادى. كوميسسيا توراعاسىنىڭ ورىنباسارى ۆلاديمير فووستىڭ ايتۋىنشا, ورتالىق سايلاۋ كوميسسياسى پارتيانىڭ ءوتىنىشىنە قاتىستى حاتتامالىق شەشىم قابىلدادى. قابىلدانعان شەشىمگە سايكەس ۋچاسكەلىك سايلاۋ كوميسسيالارى قۇرامىنا پارتيالاردىڭ كەڭەسشى داۋىس قۇقىعى بار وكىلدەرىن جىبەرۋى مەرزىمى 2012 جىلعى 15 جەلتوقسانعا دەيىن ۇزارتىلادى. ورتالىق سايلاۋ كوميسسياسى اۋماقتىق سايلاۋ كوميسسيالارىنا ساياسي پارتيالاردىڭ كەڭەسشى داۋىس قۇقىعى بار وكىلدەرىنىڭ سايلاۋ تۋرالى زاڭ تالاپتارىنا سايكەستىگىن تەكسەرۋدى جەدەل تۇردە, ياعني 5 كۇن ىشىندە وتكىزۋدى ۇسىندى.
وتىرىستان كەيىن وتكەن باق وكىلدەرىمەن بريفينگتە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ سايلاۋ ناۋقانىنىڭ بارىسى تۋرالى حاباردار ەتتى. كوميسسيا توراعاسىنىڭ اتاپ وتكەنىندەي, 30 قاراشادا ورتالىق سايلاۋ كوميسسياسىنا «نۇر وتان» حدپ پارتيالىق ءتىزىمىن ۇسىندى. قازىرگى ۋاقىتتا تىزىمگە ەنگىزىلگەن كانديداتتاردى, ولاردىڭ كونستيتۋتسيا مەن سايلاۋ تۋرالى كونستيتۋتسيالىق زاڭ تالاپتارىنا سايكەستىگىنە تەكسەرۋ ءراسىمى جۇرگىزىلىپ جاتىر. باسقا ساياسي پارتيالار ورتسايلاۋكومعا ءوز تىزىمدەرىن ءالى ۇسىنعان جوق. ورتسايلاۋكوم بەكىتكەن كۇنتىزبەلىك جوسپارعا سايكەس پارتيالىق تىزىمدەر بويىنشا سايلاناتىن پارلامەنت ءماجىلىسى دەپۋتاتتارىنىڭ سايلاۋىندا كانديداتاتتار ۇسىنۋ 5 جەلتوقساندا اياقتالادى.
ال ءماسليحاتتار دەپۋتاتتارىنىڭ سايلاۋىنا قازىرگى كەزدە 489 كانديدات ۇسىنىلعان. ولاردىڭ 63-ءى وبلىستىق ماسليحاتتارعا, 371-ءى اۋداندىق ماسليحاتتارعا جانە 55-ءى قالالىق ماسليحاتتارعا كانديدات رەتىندە ۇسىنىلىپ وتىر. ماسليحاتتارعا كانديداتتار ۇسىنۋ قوستاناي, شىعىس قازاقستان, ماڭعىستاۋ جانە اقمولا
وبلىستارىندا بەلسەندى ءجۇرىپ جاتىر. سايلاۋ كوميسسيالارى ءمۇشەلەرىن وقىتۋ جونىندەگى جۇمىستار دا جالعاسۋدا. قازىرگى ۋاقىتتا ۋچاسكەلىك سايلاۋ كوميسسيالارى مۇشەلەرىن مەيلىنشە قامتۋ ماقساتىندا اۋدان دەڭگەيىندە بىرلەسكەن سەمينارلار ەلىمىزدىڭ بارلىق وڭىرلەرىندە وتكىزىلۋ ۇستىندە.
كوميسسيا توراعاسى بريفينگ بارىسىندا 2011 جىلعى 16 قاراشا مەن 1 جەلتوقسان اراسىنداعى كەزەڭدە ورتالىق سايلاۋ كوميسسياسىنا تۇسكەن وتىنىشتەرگە دە توقتالىپ ءوتتى. قۋاندىق تۇرعانقۇلوۆتىڭ ايتۋىنشا, اتالعان كەزەڭ ىشىندە ورتالىق سايلاۋ كوميسسياسىنا 12 ءوتىنىش تۇسكەن. ولاردىڭ 8-ءى ساياسي پارتيالاردان, 1-ەۋى ءماسليحاتتان, تاعى 3-ەۋى بۇقارالىق اقپارات قۇرالدارى مەن ۇكىمەتتىك ەمەس ۇيىمداردان ءتۇسكەن وتىنىشتەر. كەلىپ تۇسكەن 11 ءوتىنىش سايلاۋ زاڭنامالارىنىڭ ەرەجەلەرىن ءتۇسىندىرۋگە قاتىستى. ولار بويىنشا قاجەتتى تۇسىنىكتەمەلەر ۋاقىتىندا جولدانعان. ال تاعى ءبىر ءوتىنىش جالپىۇلتتىق سوتسيال-دەموكراتيالىق پارتياسىنان تۇسكەن ەكەن. ءتوراعانىڭ حاباردار ەتۋىنشە, ول ورتالىق سايلاۋ كوميسسياسىنىڭ وتىرىسىندا قارالاتىن بولادى.
ءاليسۇلتان قۇلانباي.