اقجان كارىم – ءتۋابىتتى سال اۋرۋىنا شالدىقسا دا ءومىر سىناعىنان سۇرىنبەي ءوتىپ, العا قويعان ماقساتىنا جەتۋ ءۇشىن ايانباي ەڭبەك ەتىپ جۇرگەن جىگەرلى جاستاردىڭ ءبىرى. ول ءشامiل شاقشاقباەۆ اتىنداعى مۇمكىندىگى شەكتەۋلى جاندارعا ارنالعان ينتەرنات ۇيiنە ون ءبىر جاسىندا قابىلدانعان. وسىنداعى ۇستازدارى ونىڭ ومىرگە دەگەن كوزقاراسىن تولىقتاي وزگەرتكەن.
دەنساۋلىعىنىڭ كىناراتىنا قاراماستان جاڭاشىلدىققا جانى قۇمار ول بۇگىندە ءوزىن اياق-قولى بالعاداي زامانداستارىنان ەش كەم سەزىنبەيدى. قوعامداعى مۇگەدەكتەردىڭ ماسەلەسىن ءبىر ادامداي بىلەدى. قيىندىقتان شىعۋ جولدارىن ۇسىنىپ, قوعامدىق, الەۋمەتتىك جۇمىستارعا بەلسەندى تۇردە قاتىسىپ جۇرگەن اقجان جەتەكشىلىك ەتەتىن «اردوس-جۇرەك» مۇگەدەكتەر بىرلەستىگىنىڭ اتقارعان جۇمىستارىن تىزبەلەيتىن بولساق, جاڭىلىسىپ قالارىمىز انىق. 2015 جىلى «اشىق الەم» دەپ اتالاتىن جوبامەن الەۋمەتتىك يدەيالار مەن جوبالار جارمەڭكەسىنە العاش رەت قاتىستى. بۇل ەڭبەگىن ول قوعام مەن مۇمكىندىگى شەكتەۋلى ادامدار اراسىندا تۋىندايتىن كەدەرگىلەردى جويۋعا باعىتتادى. بايقاۋدا ونىڭ ويى كوپشىلىكتىڭ كوڭىلىنەن شىعىپ, ناتيجەسىندە 1 ميلليون 200 مىڭ تەڭگەنىڭ گرانتىنا يە بولدى. كەزەكتى بايقاۋدا تاعى دا جەڭىس بيىگىنەن كورىندى. ۇشقىر وي, ۇتىمدى شەشىم قابىلداۋعا كەلگەندە زامان اعىمىنان قالماۋدى ءبىرىنشى كەزەككە قويا بىلەتىن ىزدەنىمپاز جان بۇل جولى الماتى قالاسىندا وتكەن جوبالار بايقاۋىندا باق سىنادى. بۇل شارانىڭ وتۋىنە «Coca-Cola» كومپانياسى مەن ورتالىق ازيا ۋنيۆەرسيتەتى ىقپال جاسادى. «مەنىڭ قولىمنان كەلەدى» اتتى سايىسقا ەلىمىزدىڭ تۇكپىر-تۇكپىرىنەن 442 ءوتىنىش تۇسكەن ەكەن. ءبىرىنشى كەزەڭدە ولاردىڭ ىشىنەن ءجۇز ادام ىرىكتەلىپ الىنسا, ەكىنشى اينالىمعا تەك 16 ءوتىنىش يەسى عانا جولداما الدى. سولاردىڭ ءبىرى اقجان بولدى. سايدىڭ تاسىنداي ىرىكتەلگەن سايىسكەرلەر ەكى اپتا بويى الماتى قالاسىندا ارنايى وقۋ-جاتتىعۋ ساباقتارىنان ءوتىپ, الەۋمەتتىك كاسىپكەرلىكتىڭ قىر-سىرىن مەڭگەردى. ەمتيحان تاپسىرىپ, جوبالارىنا قاتىستى قويىلعان سۇراقتارعا مۇدىرمەي جاۋاپ بەرىپ, سەرتيفيكات يەلەندى. الەۋمەتتىك سالاعا, ونىڭ ىشىندە مۇمكىندىگى شەكتەۋلى جاندار ءومىرىن جەڭىلدەتۋدى ماقسات ەتكەن ۇمىتكەرلەردىڭ بارلىعى دەرلىك وسى باعىتقا جاڭا لەپ اكەلۋگە سۇبەلى ۇلەس قوستى.حالىقارالىق ساراپشىلاردىڭ باعالاۋىمەن اقجاننىڭ جوباسى ەڭ ۇزدىك بەستىككە ەندى. ول ۇتىپ العان قاراجاتىنا مۇگەدەك جانداردى ينكليۋزيۆتى وقىتاتىن ورتالىق اشۋدى جوسپارلاپ قويعان ەدى.
– ءتورت قابىرعاعا قامالىپ, ۇيدە وتىرا بەرۋگە بولار ەدى. مەنىڭ تۇپكى ماقساتىم – ءوزىم سەكىلدى جاندار ءۇشىن ورتا قالىپتاستىرۋ.شەكتەۋ دەگەن–شارتتى, ول سەنىڭ ويىڭداعى دۇنيە عانا. قازىر وقۋ ورتالىعىن اشىپ, دايىندىق جۇمىستارىن باستاپ كەتتىك.ساباق جاڭا ادىستەرمەن التى باعىت بويىنشا جۇرگىزىلەدى, – دەيدى ول.
ۇيىمداستىرۋشىلاردىڭ جوسپارىنا سايكەس جاڭادان اشىلاتىن وقۋ ورتالىعىنا كەلۋشىلەر IT-تەحنولوگيانى دا مەڭگەرەدى.ينكليۋزيۆتى وقىتۋ بەس ايعا ەسەپتەلگەن. ءبىرىنشى كەزەڭدە كومپيۋتەردىڭ قىر-سىرى ۇيرەتىلەدى. سونىمەن قاتار ينتەرنەت-دۇكەن اشۋ, تاۋارلارعا جارناما جاساۋ ماسەلەلەرى دە قامتىلادى. ساباق اقىلى تۇردە بولعانىمەن مۇمكىندىگى شەكتەۋلى ادامدارعا جەڭىلدىكتەر قاراستىرىلعان. اقجاننىڭ پىكىرىنشە, تەگىن وقۋعا ادامدار بەيجاي قاراپ, جۇمىس ساپاسى ناشارلاپ كەتۋى, كوزدەگەن ماقساتقا قول جەتكىزۋگە كەدەرگى كەلتىرۋى مۇمكىن. ال قالتادان شىققان قاراجات بوسقا كەتپەيدى. وقۋ اياقتالعان سوڭ ارنايى سەرتيفيكات بەرىلىپ, جۇمىسپەن قامتاماسىز ەتىلەدى.
اقجان قازىر «وقۋ ارقىلى شىعارماشىلىق بەلەسكە قول جەتكىزۋ», «التىن قالام»دەپ اتالاتىن سايىستار وتكىزۋدى جوسپارلاپ وتىر. ءداستۇرلى بايقاۋلار مۇمكىندىگى شەكتەۋلى بالالار اراسىندا ۇيىمداستىرىلادى. بۇل جەردە ونىڭ كوزدەگەنى – شىعارماشىلىق ارقىلى ەرەكشە جانداردىڭ قابىلەتىن اشۋعا مۇمكىندىك بەرۋ, قوعامنىڭ مۇگەدەكتەرگە دەگەن وڭ كوزقاراسىن قالىپتاستىرۋ.
تاعى ءبىر جاڭا جوباسى «اق تىزىم»دەپ اتالادى. ونىڭ تالابى بويىنشا جاستار ينتەرنەت ارقىلى ارنايى تىزىمگە ەنگىزىلگەن نىسانداردىڭ جۇمىسىن كورىپ, مۇمكىندىگى شەكتەۋلى جانداردىڭ ەركىن ءجۇرىپ-تۇرۋىنا جاسالىپ جاتقان جۇمىستاردى باعالاي الادى.
مۇگەدەكتەر اراسىندا ساۋالداما جۇرگىزگەندە 73 پايىزى تەاتر, مۇراجاي, كينوتەاتر سەكىلدى مادەنيەت وشاقتارىنا بارۋعا ىنتالى ەكەنىن بىلدىك. وسىعان وراي جوبا شەڭبەرىندە الەۋمەتتىك-مادەني شارالارعا كوبىرەك كوڭىل بولەمىز. تابيعات اياسىنا دەم الۋعا شىعاتىن بولامىز. اتا-انالارمەن پسيحولوگيالىق ترەنينگتەر جۇرگىزەمىز, دەيدى الداعى ءىس-جوسپارلارىمەن بولىسكەن ەلباسى قورى گرانتىنىڭ يەگەرى اقجان كارىم ك ۇلىمسىرەگەن جۇزبەن.
الما قۋاندىققىزى, جۋرناليست
سولتۇستىك قازاقستان وبلىسى