وڭتۇستىك قازاقستان وبلىسى ماقتاارال اۋدانىنداعى داۋلى ماسەلە شەشىمىن تاۋىپ, «قازماقتا» كورپوراتسياسى ماقتاارالدىق شارۋالارعا بەرەشەگىن تولىقتاي وتەدى. اۋدان اكىمدىگى ءباسپاسوز قىزمەتىنىڭ حابارلاۋىنشا, كورپوراتسيا 307 شارۋاعا بەرەشەك 323,4 ملن تەڭگە تولەپتى.
وتكەن جىلدىڭ 15 جەلتوقسانىندا «قازماقتا» اق-قا ماقتا شيكىزاتىن وتكىزىپ, قارجىسىن الا الماي جۇرگەن ءبىر توپ شارۋا ماقتاارال اۋدانى اكىمدىگىنە ارىزدانعان بولاتىن. كەيىننەن اكىمدىك وكىلدەرى كورپوراتسيانىڭ ديرەكتورىنا كوتەرىلگەن ماسەلەنى شەشۋ تۋرالى حات جولداعان. الايدا «قازماقتا» باسشىلىعى قارجى ماسەلەسى شەشىلمەي جاتقاندىعى جونىندە اۋىزشا حابار بەرىپ, اقشانى تولەمەگەن-ءدى. وسىدان كەيىن شارۋالار اعىمداعى جىلدىڭ اقپانىندا اۋداندىق ىشكى ىستەر باسقارماسىنا ارىزداندى. ارتىنشا كورپوراتسياعا قاتىستى قىلمىستىق كودەكستىڭ 190-بابى, 4-ءبولىمىنىڭ 2-تارماعى بويىنشا ءىس قوزعالىپ, جەدەل تەرگەۋ شارالارى جۇرگىزىلدى.
داۋلى ماسەلەگە وبلىس اكىمى جانسەيىت تۇيمەباەۆ پەن وبلىس پروكۋرورى نۇرعالىم ءابدىروۆ ارالاسىپ, جاعدايدى ءوز باقىلاۋىنا العان. وسىلايشا قولعا الىنعان ءتيىستى شارالاردىڭ ارقاسىندا 15 اقپاندا شارۋالاردىڭ 60 ملن تەڭگەسى تولەنسە, 21 ناۋرىز كۇنى 150 ملن تەڭگە قارجى قايتارىلدى. قالعان 44 شارۋانىڭ اقشاسى 5 ءساۋىر كۇنى تولىعىمەن وتەلىپتى. ءوز كەزەگىندە ماقتالى ءوڭىردىڭ شارۋالارى ماسەلەنىڭ شەشىلۋىنە تىكەلەي ىقپال ەتكەن وبلىس اكىمى مەن ايماق پروكۋرورىنا ريزاشىلىقتارىن ايتۋدا.
ەركەجان ايتقازى, «ەگەمەن قازاقستان»