كەشە سەنات توراعاسى قايرات ءماميدىڭ توراعالىعىمەن وتكەن پالاتانىڭ كەزەكتى پلەنارلىق وتىرىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتى ەلىمىزدىڭ جوعارى مەملەكەتتىك ناگراداسى – «حالىق قاھارمانى» اتاعىنا ۇسىنۋ تۋرالى ماسەلە زاڭدىق تۇرعىدان قارالدى.
زاڭ جوبالارى قارالماس بۇرىن سەنات توراعاسى ۇسىنۋ تۋرالى ماسەلەنىڭ ماڭىزىن اشىپ كورسەتتى: «زامانىمىزدىڭ اسا كورنەكتى رەفورماتورى, وڭىرلىك جانە جاھاندىق باستامالار مەن باتىل شەشىمدەردىڭ ۇيىتقىسى, بۇكىل الەم مويىنداعان بيىك بەدەلدى ساياساتكەر رەتىندە نۇرسۇلتان نازارباەۆ ەڭ جوعارى مەملەكەتتىك ناگرادا – «حالىق قاھارمانى» اتاعىنا لايىق ەكەندىگى اقيقات, – دەدى قايرات ابدىرازاق ۇلى. – بۇل جونىندە بۇرىن دا تالاي باستاما كوتەرىلگەن, بىراق نۇرسۇلتان ءابىش ۇلى ءوزىنە ءتان قاراپايىمدىلىقپەن ۇسىنىستاردان ۇنەمى باس تارتىپ كەلەدى».
ق.ءمامي كەلەسى كەزەكتە ۇسىنىلعان تولىقتىرۋلارمەن تاۋەلسىزدىكتىڭ ىرگەتاسىن قالاپ, دەربەس مەملەكەتىمىزدى قۇرۋ جانە دامىتۋداعى, الەمدىك قوعامداستىقتاعى قازاقستان بەدەلىن نىعايتۋداعى ەلباسىنىڭ تاريحي ءرولى بەكىتىلەتىنىن اتاپ كورسەتتى. ەكى زاڭ جوباسى قابىلدانعان قازاقستاننىڭ جاڭا تاريحىنداعى ەرەكشە كۇن – بۇكىلحالىقتىق سايلاۋ ارقىلى نۇرسۇلتان نازارباەۆتىڭ تۇڭعىش پرەزيدەنت بولىپ سايلانعانىنا 20 جىل تولعان كۇنمەن نىشاندىق تۇرعىدا سايكەس كەلىپ وتىرعانىنىڭ وزىندە ۇلكەن ءمان بار. ياعني, وسىدان 20 جىل بۇرىن, 1991 جىلعى 1 جەلتوقساندا ءبۇكىلحالىقتىق سايلاۋدا نۇرسۇلتان نازارباەۆ قازاق كسر-ءىنىڭ پرەزيدەنتى بولىپ سايلانعان بولاتىن. سەنات توراعاسى اتالعان زاڭ جوبالارىنا تولىقتىرۋلار ارقىلى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ وتانىنا سىڭىرگەن وراسان ەڭبەگى زاڭ ءجۇزىندە تانىلادى جانە ونى قازاقستان حالقى تولىق قولدايدى دەپ مەن كامىل سەنەمىن, دەدى ق.ءمامي. ەلباسى مەن قازاقستان حالقىن وسى تاريحي كۇنمەن جانە اتالعان زاڭداردىڭ پارلامەنتتە قابىلدانۋىمەن قۇتتىقتادى.
سونىمەن, «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭ جانە «قازاقستان رەسپۋبليكاسىنىڭ مەملەكەتتىك ناگرادالارى تۋرالى» قازاقستان رەسپۋبليكاسىنىڭ زاڭىنا تولىقتىرۋ ەنگىزۋ تۋرالى» زاڭ جوبالارىن دەپۋتاتتارعا ادىلەت ءمينيسترى راشيد ءتۇسىپبەكوۆ تانىستىردى. ول تاريحي وقيعانى مەرەكەلەۋ الدىندا قازاقستان رەسپۋبليكاسىنىڭ ۇكىمەتى قازاقستان رەسپۋبليكاسىنىڭ تۇڭعىش پرەزيدەنتى –ەلباسىعا «حالىق قاھارمانى» اتاعىن زاڭدى تۇردە بەكىتۋدى ۇسىنادى, دەدى سوزدەرىنە ەرەكشە ەكپىن سالىپ. زاڭ جوبالارى قولداۋ تاپسا ەلباسىعا مارتەبەسىنە سايكەس ايرىقشا ەرەكشەلىك بەلگىسى: «التىن جۇلدىز» جانە «وتان» وردەنى قوسا تاپسىرىلىپ, «حالىق قاھارمانى» اتاعىن يەلەنەتىن بولادى.
بۇل ۇسىنىس قازاقستاننىڭ ءتاۋەلسىز مەملەكەت رەتىندە قالىپتاسۋى مەن دامۋىنداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ تاريحي رولىمەن نەگىزدەلگەن. قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ باسشىلىعىمەن ەلىمىزدە جيىرما جىلدان بەرى الەۋمەتتىك, ەكونوميكالىق, ساياسي جانە قۇقىقتىق جۇيەلەردى جەتىلدىرۋ تابىستى تۇردە ىسكە اسىرىلۋدا. قازىرگى ۋاقىتتا قازاقستان رەسپۋبليكاسى حالىقارالىق ارەنادا جوعارى بەدەلگە يە.
قوسىمشا بايانداما جاساعان الەۋمەتتىك-مادەني دامۋ كوميتەتىنىڭ توراعاسى اقان بيجانوۆ زاڭ جوبالارىن 2011 جىلدىڭ 30 قاراشاسىنداعى كەڭەيتىلگەن وتىرىسىندا تالقىلاپ, سەنات وتىرىسىنىڭ قاراۋىنا ەنگىزىلگەندىگىن تىلگە تيەك ەتە كەتتى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ ەلدىڭ بىرلىگىن, كونستيتۋتسيانىڭ, ادام مەن ازاماتتىڭ قۇقىقتارى مەن بوستاندىقتارىنىڭ قورعالۋىن قامتاماسىز ەتكەن, جاڭا تاۋەلسىز مەملەكەتتىڭ نەگىزىن قالاۋشى بولىپ تابىلادى. ونىڭ جەتىستىكتەرى قازاقستان حالقى تاراپىنان زور قۇرمەت پەن سەنىم تۋدىرادى. مەملەكەت باسشىسىنىڭ كەمەل دە سارابدال ىشكى جانە سىرتقى ساياساتىنىڭ ناتيجەسىندە قازاقستان رەسپۋبليكاسى ايتارلىقتاي ەكونوميكالىق وسۋگە, حالىقتىڭ ءال-اۋقاتىنىڭ ارتۋىنا قول جەتكىزىپ, بۇكىل الەمدىك قوعامداستىقتا بيىك بەدەلگە يە بولدى. سونداي-اق زاڭ جوبالارى بويىنشا سەناتورلار الەكساندر ساۆچەنكو, جابال ەرعاليەۆ, يۋري تسحاي, عاني قاسىموۆ, مۇحتار التىنباەۆ ءسوز سويلەپ, ەلباسىنىڭ ەل الدىنداعى ەرەن ەڭبەگىن جان-جاقتى اشىپ كورسەتتى. تالقىلاۋ ناتيجەسى بويىنشا زاڭ جوبالارى ءبىراۋىزدان قولداۋ تاپتى.
سونداي-اق وتىرىستا بىرقاتار حالىقارالىق كەلىسىمدەر راتيفيكاتسيالاندى. قولدانىستاعى كەيبىر زاڭنامالىق اكتىلەرگە بانك قىزمەتى مەن قارجى ۇيىمدارىنداعى تاۋەكەلدەردى ازايتۋ تۇرعىسىنان رەتتەۋ جانە وتباسى ۇلگىسىندەگى بالالار اۋىلى مەن جاسوسپىرىمدەر ۇيلەرى ماسەلەلەرى بويىنشا وزگەرىستەردى كوزدەيتىن زاڭ جوبالارى دا قابىلداندى. وسى رەتتە ۆاليۋتالىق رەتتەۋ جانە ۆاليۋتالىق باقىلاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەردى قاراستىراتىن زاڭ جوباسى قابىلدانعاندىعىن ايتا كەتۋ كەرەك. جانە دە ادۆوكاتۋرا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ءبىرىنشى وقىلىمدا ماقۇلداندى.
اسقار تۇراپباي ۇلى.