ازاتتىقتىڭ التىن كۇرەك جەلىنىڭ ەسكەنىنە 30 جىلعا جۋىقتاسا دا شىعىس قازاقستاندا ونوماستيكا ماسەلەسى ءالى دە كۇردەلى قالپىندا قالىپ وتىر. اسىرەسە زىريان, گلۋبوكوە, شەمونايحا, بورودۋليحا اۋداندارى مەن ريددەر, وسكەمەن قالالارىندا وتارشىلدىقتىڭ ءيىسى اڭقىعان اتاۋلاردان كوز سۇرىنەدى. دەسەك تە تاسباقا ىلبىڭمەن بولسا دا بۇرىنعى, تاريحي اتاۋلارى قايتارىلىپ جاتقان اۋىلدار دا جوق ەمەس.
ماسەلەن, جاقىندا وسكەمەندە وتكەن وبلىستىق قوعامدىق كەڭەس وتىرىسىندا بورودۋليحا اۋدانىنىڭ ەكى, ۇلان اۋدانىنىڭ ءبىر اۋىلىنىڭ اتاۋلارى اۋىستىرىلاتىنى جايىندا ايتىلدى. بورودۋليحاداعى پرولەتاركا اۋىلىنا اقشي, ۆوزنەسەنوۆكا اۋىلىنا قىزىلتاي, ال ۇلان اۋدانىنداعى ەل اۋزىندا «17 شاقىرىم» اتالىپ كەلگەن اۋىلعا سارىوزەك سىندى تاريحي اتاۋلارى قايتا بەرىلمەك. سونىمەن قاتار وسكەمەندەگى كارل ماركس داڭعىلى جۋىقتا قازىبەك بي ەسىمىمەن اتالاتىن بولادى. بۇل اتاۋ بيىلعى 2 ناۋرىزدا رەسپۋبليكالىق ونوماستيكالىق كوميسسيادا بەكىتىلىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى