Facebook-ءتىڭ نەگىزىن قالاۋشى جانە باس اتقارۋشىسى مارك تسۋكەربەرگ سەيسەنبى كۇنى سەنات پەن اقش كونگرەسى وكىلدەر پالاتاسىندا ميلليونداعان الەۋمەتتىك جەلى قولدانۋشىلارى تۋرالى دەرەكتەردىڭ رۇقساتسىز پايدالانىلۋى جانە اقپاراتتىق قاۋىپسىزدىك تۋرالى سۇراقتارعا جاۋاپ بەردى, دەپ حابارلايدى Reuters اگەنتتىگى.
سەناتورلاردىڭ سۇراقتارىنا جاۋاپ بەرگەن تسۋكەربەرگ, Cambridge Analytica كومپانياسى جيناعان Facebook الەۋمەتتىك جەلىسىنىڭ 50 ميلليون پايدالانۋشىسى تۋرالى دەرەكتەردىڭ رەسەيدە ساقتاۋلى ەكەنى تۋرالى بىلمەيتىنىن ايتتى. وسى جاعدايدى انىقتاۋ ۇشىن كومپانيا جىل سوڭىنا دەيىن 20 مىڭنان استام ادامدى جۇمىسقا الىپ, جەلى قولدانۋشىلارىنىڭ اقپاراتتىق قاۋىپسىزدىگى ءۇشىن جۇمىس جاسايتىنىن ايتتى.
ەستەرىڭىزگە سالا كەتەيىك, بريتاندىق Cambridge Analytica كومپانياسى Facebook قولدانۋشىلارى تۋرالى دەرەكتەردى كوپتەگەن ەلدەردە ساياسي جارنامالاردا پايدالانۋ ءۇشىن جيناعان. سوڭعى دەرەكتەرگە سايكەس, كومپانيا الەۋمەتتىك جەلىلەردىڭ 87 ميلليون پايدالانۋشىسى تۋرالى اقپاراتقا قول جەتكىزگەن. تسۋكەربەرگ جەلى قولدانۋشىلارىنىڭ الدىنداعى كىناسىن مويىنداپ, كەشىرىم رەتىندە بريتانيا گازەتتەرىندەگى جارنامانى ساتىپ العان بولاتىن. سونداي-اق, Facebook-ءتىڭ جەلىنى پايدالانۋشىلاردىڭ جەكە حابارلامالارىن ساقتايتىنى تۋرالى بەلگىلى بولعان.
سەناتورلاردىڭ بەس ساعات بويعى ساۋالناما بارىسىندا تسۋكەربەرگ Facebook-تەگى بىرقاتار ماسەلەلەرگە بايلانىستى بىرنەشە رەت كەشىرىم سۇرادى. سونىڭ ءبىرى, جەلىدەگى اقپاراتتىق قاۋىپسىزدىككە بايلانىستى بولدى. مىسالى, اقش-تىڭ سايلاۋىنا ىقپال ەتۋ ءۇشىن رەسەيلىك اگەنتتەردىڭ Facebook-تەگى اقپاراتتاردى پايدالانۋى.
تسۋكەربەرگ Facebook-تە قانداي فۋنكتسيالاردى قوسۋ اسا قاجەت دەگەن سۇراققا «مەن بۇل پىكىرتالاستى ءارتۇرلى ساناتتار بويىنشا تالقىلاۋعا بولاتىنداي ەتىپ, مەنىڭ كومانداممەن بىرگە تالقىلاۋعا شاقىرامىن» دەدى.
ءمادينا جالەلقىزى,
«ەگەمەن قازاقستان»