ورتالىق كوممۋنيكاتسيالار قىزمەتىنىڭ ءباسپاسوز ماسليحاتىندا قازاقستان رەسپۋبليكاسى ىشكى ىستەر مينيستىرلىگى اكىمشىلىك پوليتسيا كوميتەتى توراعاسىنىڭ ورىنباسارى ماقسات بايبولوۆ باق وكىلدەرىمەن قۇقىق بۇزۋشىلىقتاردىڭ الدىن الۋ ماسەلەلەرىندە پوليتسيانىڭ حالىقپەن جانە ازاماتتىق قوعاممەن ءوزارا بىرلەسە جۇمىس ىستەۋ تۋرالى مالىمەتپەن ءبولىستى.
«جالپى ەلىمىز بويىنشا قوعامدىق ءتارتىپتى ساقتاۋعا جىل سايىن 29,5 مىڭنان استام ادام قاتىسادى, ولار 4,5 مىڭ قۇقىق قورعاۋ باعىتىنداعى قوعامدىق قۇرىلىمدارعا بىرىكتىرىلگەن. مىسالى, اۋىلدىق جەرلەردە «ساقشى» جاساقتارى جۇمىس ىستەيدى, ولار كوبىنەسە مال ۇرلىعىنىڭ الدىن الۋعا باعىتتالعان. ەلىمىزدىڭ وقۋ ورىندارىندا «ستۋدەنتتىك جاساقتار» جۇمىس ىستەيدى, ولار اتالعان مەكەمەلەردىڭ, سونداي-اق ستۋدەنتتىك قالاشىقتار مەن جاتاقحانالاردىڭ اۋماقتارىن پاترۋلدەيدى, ۇساق قۇقىق بۇزۋشىلىقتاردىڭ جولىن كەسەدى, ستۋدەنتتەر اراسىندا ءتۇسىندىرۋ جۇمىستارىن جۇرگىزەدى. اعىمداعى جىلى كورسەتىلگەن قۇرىلىمداردىڭ قاتىسۋىمەن 1,4 مىڭنان استام قىلمىس اشىلدى, اكىمشىلىك قۇقىق بۇزۋشىلىق جاساعانى ءۇشىن 12,5 مىڭ ادام ۇستالدى. زاڭنامالىق دەڭگەيدە اسا بەلسەندى ازاماتتاردى گراموتا, العىس حات, باعالى سىيلىق جانە اقشالاي سىياقىلارمەن كوتەرمەلەۋ مۇمكىندىگى بار ەكەنىن اتاپ ءوتۋ قاجەت. اعىمداعى جىلدىڭ تەك 1 توقسانىندا پوليتسياعا بەلسەندى كومەك كورسەتكەنى ءۇشىن ءىىو-نىڭ وتىنىشتەرى بويىنشا اكىمدىكتەر 955 ادامدى كوتەرمەلەدى, ونىڭ ىشىندە 765 ادام 14,5 ملن تەڭگەدەن استام سوماعا اقشالاي سىياقىمەن ماراپاتتالدى», دەدى ماقسات بايبولوۆ.
سونىمەن قاتار ول جىل سايىن ەلىمىزدىڭ اۋماعىندا «ۋچاستكە» رەسپۋبليكالىق جەدەل-پروفيلاكتيكالىق ءىس-شاراسى وتكىزىلەتىنىن مالىمدەدى.
ء«ىس-شارا بارىسىندا ۋچاسكەلىك پوليتسيا ينسپەكتورلارى وزدەرىنىڭ ۋچاسكەلەرىندەگى ءاربىر ۇيگە جانە پاتەرگە بارۋعا تىرىسادى, حالىقپەن تانىسادى, تۋىنداعان پروبلەمالار تۋرالى سۇراستىرادى جانە وزدەرىنىڭ ۆيزيت كارتىشكەلەرىن تاراتادى. ودان بولەك, جىل ارالىعىندا ۋچاسكەلىكتەر ۇدايى تۇردە توقساندا كەمىندە ءبىر رەت حالىق الدىندا ەسەپ بەرۋلەر جۇرگىزەدى, ولاردىڭ بارىسىندا اتقارىلعان جۇمىس تۋرالى ەسەپ بەرەدى, سونداي-اق ازاماتتاردان كەلىپ تۇسكەن شاعىمدار مەن ۇسىنىستارعا دەن قويادى. ماسەلەن, اعىمداعى جىلى ۋچاسكەلىك پوليتسيا ينسپەكتورلارى 25 مىڭنان استام ەسەپ بەرۋ كەزدەسۋلەرىن جۇرگىزدى وندا 1,5 ملن. استام ازامات قاتىسقان. سوڭعى بەس جىلدا وتكىزىلگەن وسىنداي اكتسيالاردىڭ ناتيجەسىندە حالىق اقشالاي سىياقىعا ەرىكتى تۇردە 47 مىڭنان استام اتىس قارۋىن, 250 جارىلعىش قۇرىلعىلار مەن 1,7 ملن دانادان استام ويىق قارۋ پاتروندارىن تاپسىردى. بارلىعى ەرىكتى تۇردە قارۋ-جاراق زاتتارىن تاپسىرعانى ءۇشىن وسى جىلدارى 38 مىڭ ازاماتقا 1 ملرد. 418 ملن. تەڭگە تولەنگەن. وسىنداي اكتسيالاردى وتكىزۋدىڭ تيىمدىلىگىن اتىس قارۋىن قولدانا ورتىرىپ جاسالعان قىلمىستار سانىنىڭ جالپى 44,8 پايىزعا جىل سايىنعى ازايعانى كورسەتىپ وتىر. اعىمداعى جىلى اكتسيا ءساۋىردىڭ 10-نان باستالادى, بۇل ماقساتقا رەسپۋبليكالىق بيۋدجەتتەن 125,4 ملن. تەڭگە بولىنگەن. زاڭسىز ساقتالعان قارۋ-جاراق زاتتاردى ازاماتتاردىڭ ەرىكتى تۇردە وتەمەلى تاپسىرۋ قاعيدالارى ىشكى ىستەر ءمينيسترىنىڭ بۇيرىعىمەن بەكىتىلگەن. بۇل قاعيدالاردا قارۋدى ەرىكتى تۇردە تاپسىرعانى ءۇشىن قارۋدىڭ ءار بىرلىگىنە, ونىڭ تەحنيكالىق جاعدايىنا جانە قارۋ تۇرىنە قاراي سوماسى وننان ءجۇز ايلىق ەسەپتىك كورسەتكىشكە دەيىن تولەم كوزدەلگەن. زاڭسىز ساقتالعان اتىس قارۋ-جاراق زاتتاردى ەرىكتى تۇردە تاپسىرعان ادامدار قىلمىستىق جانە اكىمشىلىك جاۋاپكەرشىلىكتەن بوساتىلادى. وسى ءساتتى پايدالا وتىرىپ, ساقتاۋدا زاڭسىز قارۋ-جاراق زاتتارى بار ازاماتتارعا ولاردى اقىلى نەگىزدە ىشكى ىستەر ورگاندارىنا ەرىكتى تۇردە تاپسىرۋدى وتىنەمىن», دەدى ىشكى ىستەر مينيستىرلىگى اكىمشىلىك پوليتسيا كوميتەتى توراعاسىنىڭ ورىنباسارى.
راۋان قايدار, «ەگەمەن قازاقستان»