ماڭعىستاۋ وبلىسى اۋماعىندا 2018 جىلدىڭ 1 ءساۋىر-31 مامىر ارالىعىندا بالىق پەن بالىق ونىمدەرىن زاڭسىز اۋلاۋدى جانە زاڭسىز اينالىمدى انىقتاۋعا, الدىن الۋعا جانە جولىن كەسۋگە باعىتتالعان «بەكىرە-2018» رەسپۋبليكالىق جەدەل- پروفيلاكتيكالىق ءىس- شاراسى وتكىزىلۋدە.
جەدەل-پروفيلاكتيكالىق ءىس- شاراسى كەزىندە 2018 جىلعى 3 ساۋىردە ءىىد جپق تابيعاتتى قورعاۋ پوليتسيا قىزمەتكەرلەرى اقتاۋ قالاسى تۇرعىن ءۇي قاسىندا جۇرگىزۋشى باسقارۋىنداعى «ۆاز -21114» ماركالى اۆتوكولىگىن تەكسەرۋ كەزىندە ارتقى جۇك سالعىشىنان اق قاپقا سالىنعان 10-دانا «بەكىرە» تۇقىمداس بالىعى تاركىلەندى. سالماعى 30 كگ. بولاتىن زاڭسىز بالىققا قاتىستى دەرەكتەر مۇنايلى ءاىىب-نە تىركەلىپ قر قك-ءنىڭ 339 بابىمەن سوتقا دەيىنگى تەرگەپ-تەكسەرۋ وندىرىسىمەن قىلمىستىق ءىس قوزعالدى. سونداي-اق, 5 ءساۋىر كۇنى اقتاۋ قالاسى حگمز تاس جولى بويىندا جۇرگىزۋشى باسقارۋىنداعى «لادا-لارگۋس» اۆتوكولىگىن كۇدىكتى رەتىندە تەكسەرۋ بارىسىندا اۆتو كولىكتىڭ سالونىنان سۇر ءتۇستى 7 قاپقا سالىنعان 35 دانا سالماعى 171 كگ «بەكىرە» تۇقىمداس بالىعى تابىلدى. وقيعا بويىنشا اقتاۋ قىىب-نا تىركەلىپ قر قك-ءنىڭ 339 بابىمەن سوتقا دەيىنگى تەرگەپ-تەكسەرۋ وندىرىسىمەن قىلمىستىق ءىس قوزعالدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى