وڭتۇستىك قازاقستان وبلىسى تۇلكىباس اۋدانىندا بۇگىنگى تاڭدا 1507 ازامات تۇرعىن ءۇي كەزەگىندە تۇر. الداعى ۋاقىتتا كەزەكتە تۇرعانداردىڭ سانى ازايا تۇسپەك.
ولاي دەيتىنىمىز, «نۇرلى جەر» مەملەكەتتىك باعدارلاماسى شەڭبەرىندە اۋداندا كوپقاباتتى 7 تۇرعىن ءۇيدىڭ قۇرىلىسى جۇرگىزىلۋدە. وعان قازىنادان جالپى 2 ملرد. 600 ميلليون تەڭگەدەن استام قارجى بولىنگەن. تۇرعىن ۇيلەر اۋداننىڭ ت. رىسقۇلوۆ جانە ساستوبە اۋىلىندا سالىنۋدا. بۇل ەلدى مەكەندەردە بۇگىندە 32 مىڭعا جۋىق حالىق تۇرادى.
ت.رىسقۇلوۆ اۋىلىندا كوپقاباتتى 5 تۇرعىن ءۇي, ال ساستوبە پوسەلكەسىندە 32 پاتەرلىك ەكى تۇرعىن ءۇيدىڭ قۇرىلىس جۇمىستارىن 2018 جىلدىڭ سوڭى مەن 2019 جىلدىڭ باسىندا اياقتاپ, پايدالانۋعا بەرۋ جوسپارلانعان. ناتيجەسىندە 320 وتباسى باسپانالى بولىپ, قونىس تويىن تويلاماق. سونداي-اق تۇرعىن ءۇي قۇرىلىسىمەن بىرگە سول ايماقتىڭ ينجەنەرلىك-كوممۋنيكاتسيالىق ينفراقۇرىلىمى دا جۇرگىزىلۋدە.
ايتا كەتەلىك, بيىل وبلىستا «نۇرلى جەر» باعدارلاماسى اياسىندا جالپى اۋماعى 730 مىڭ شارشى مەتر بولاتىن, 6615 پاتەردى ەل يگىلىگىنە تاپسىرۋ جوسپارلانعان. قازىرگى تاڭدا 236 كوپقاباتتى ءۇي سالىنىپ جاتىر.
ەركىن دوسىمباي,
وڭتۇستىك قازاقستان وبلىسى.