قازاقستان سىرتقى ىستەر ءمينيسترى قايرات ءابدىراحمانوۆ تمد سىرتقى ىستەر مينيسترلەرىنىڭ كەڭەسىنىڭ كەزەكتى وتىرىسىنا قاتىستى. بۇل تۋرالى مينيسترلىكتىڭ ءباسپاسوز قىزمەتى حابارلادى.
تمد سىرتقى ىستەر ۆەدومستۆولارىنىڭ باسشىلارى دوستاستىق شەڭبەرىندەگى قازىرگى جاعداي مەن ىقپالداستىقتىڭ پەرسپەكتيۆالارىن تالقىلاپ, حالىقارالىق كۇن ءتارتىبىنىڭ وزەكتى ماسەلەلەرى بويىنشا پىكىر الماستى جانە تاۋەلسىز مەملەكەتتەر دوستاستىعى قىزمەتىنىڭ تيىمدىلىگىن ودان ءارى كوتەرۋ جونىندەگى سۇراقتاردى قاراستىردى.
ق.ءابدىراحمانوۆ ءوزىنىڭ بايانداماسىندا قازاقستان دوستاستىق قۇرىلعاننان بەرى وعان بەلسەندى قاتىسىپ كەلە جاتقاندىعىن جانە ونى ءارتاراپتى ىنتىماقتاستىقتىڭ بىرەگەي جانە امبەباپ الاڭى رەتىندە قارايتىندىعىن اتاپ ءوتتى. وسىعان بايلانىستى ول پرەزيدەنت نۇرسۇلتان نازارباەۆتىڭ تمد دامۋىنىڭ قازىرگى كونتسەپتسياسىن رەۆيزيا جاساۋ جانە سول كونتسەپتسيانىڭ ەرەجەلەرىن زاماناۋي جاعدايلارعا بەيىمدەۋ قاجەتتىگى جونىندەگى باستاماسىنا ايرىقشا نازار اۋداردى.
مينيستر قازاقستاننىڭ تمد-نىڭ قازىرگى توراعاسى تاجىكستان بەلگىلەگەن باسىم ماقساتتاردى قولدايتىندىعىن جانە ولاردى تابىستى جۇزەگە اسىرۋ ءۇشىن جان-جاقتى قولعابىس كورسەتۋگە دايىن ەكەندىگىن مالىمدەدى. قازاقستان تاراپى ءوزىنىڭ بۇۇ-داعى توراعالىعىنىڭ ناتيجەلەرى جونىندە حابارلاپ, پرەزيدەنت ن.نازارباەۆتىڭ توراعالىعىمەن وتكەن بۇۇ قك-ءنىڭ «جاپپاي قىرىپ جويۋ قارۋىن تاراتپاۋ: سەنىم شارالارى» تاقىرىبىنداعى بريفينگىسىنىڭ ماڭىزدى قورىتىندىلارىنا توقتالدى. سونىمەن قاتار, تمد دەلەگاتسيالارىنىڭ باسشىلارى اۋعانستاندا جانە ورتالىق ازيادا ايماقتىق سەرىكتەستىك ورناتۋعا ارنالعان مينيسترلەر پىكىرتالاستارىنىڭ قورىتىندىلارىمەن تانىستىرىلدى.
مينسكىدەگى سىرتقى ىستەر مينسترلەرىنىڭ القاسىندا قاۋىپسىزدىك سالاسىنا قاتىستى قۇجاتتاردىڭ جوبالارى ماقۇلداندى. اتاپ ايتقاندا, اقپاراتتىق تەحنولوگيالار سالاسىنداعى قىلمىستارمەن كۇرەس بويىنشا ىنتىماقتاستىق جونىندەگى كەلىسىمنىڭ جانە 2019 - 2023 جىلدارعا ارنالعان قىلمىسپەن كۇرەسۋ جونىندەگى بىرلەسكەن شارالاردىڭ مەملەكەتارالىق باعدارلاماسىنىڭ جوبالارى بەكىتىلدى. سونىمەن قاتار مينيسترلەر 2018 جىلعا ارنالعان تمد شەڭبەرىندەگى سىرتقى ىستەر مينيسترلىكتەرى اراسىنداعى كوپدەڭگەيلى كونسۋلتاتسيالار جوسپارىن بەكىتتى. بۇل قۇجاتقا سايكەس اعىمداعى جىلدا حالىقارالىق ماسەلەلەر بويىنشى ون ەكى تاقىرىپتىق كونسۋلتاتسيالار كوزدەلگەن. اتاپ ايتقاندا, ول تمد-عا قاتىسۋشى ەلدەردىڭ بۇۇ, ەىقۇ جانە باسقا دا حالىقارالىق بىرلەستىكتەر شەڭبەرىندەگى ىقپالداستىعى, جاڭا سىن-تەگەۋرىندەرگە جانە قاۋىپ-قاتەرلەرگە توتەپ بەرۋ ماسەلەلەرى, قارۋسىزداندىرۋ سالاسىنداعى ىنتىماقتاستىق جانە ت.ب. قامتيدى.
ءىس-شارا بارىسىندا دەلەگاتسيا باسشىلارىنىڭ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەسۋى بولدى. مينيسترلەر كەڭەسىنىڭ اياسىندا ق.ءابدىراحمانوۆ ازەربايجان جانە تۇرىكمەنستان رەسمي دەلەگاتسيالارىنىڭ باسشىلارى حالاف حالافوۆ جانە سەردار بەردىمۇحامەدوۆپەن ەكىجاقتى كەزدەسۋلەر وتكىزدى. كەلىسسوزدەر بارىسىندا تاراپتار ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ دامۋىنىڭ ماسەلەلەرىن قاراستىرىپ, حالىقارالىق جانە ايماقتىق كۇن ءتارتىبىن, سونىڭ ىشىندە بەسىنشى كاسپي ءسامميتىنىڭ دايىندىق بارىسىن تالقىلادى.
تاراپتار مەملەكەتتەر اراسىنداعى ىنىتىماقتاستىق بارلىق دەڭگەيدە جوعارى ىقپالداستىقپەن دامىپ جاتقانىن تىلگە تيەك ەتتى. اسىرەسە, 2017 جىلى مەملەكەتتەر باسشىلارىنىڭ كەزدەسۋلەرى بارىسىندا قول جەتكىزىلگەن كەلىسىمدەر مەن ۋاعادالاستىقتاردىڭ جۇزەگە اسىرىلۋىنا ەرەكشە كوڭىل ءبولىندى. ازەربايجان تاراپىمەن تۇركىتىلدەس مەملەكەتتەردىڭ ىنتىماقتاستىق كەڭەسى قىزمەتىندە ورىن الىپ وتىرعان كادرلىق ماسەلەلەر تالقىلاندى.