كەشە استانادا قازاقستان كوممۋنيستىك حالىقتىق پارتياسىنىڭ حاتشىلارى ۆلاديسلاۆ كوسارەۆ پەن جامبىل احمەتبەكوۆ جۋرناليستەرگە ءباسپاسوز ءماسليحاتىن وتكىزدى.
ءباسپاسوز ءماسليحاتىن وتكىزۋدەگى ماقساتىمىز مىناۋ – ءبىزدىڭ سايلاۋالدى تۇعىرنامامىزدىڭ العاشقى نۇسقاسى پارتيا سەزى بەكىتپەي جاتىپ-اق, بۇقارالىق اقپارات قۇرالدارىندا جاريا ەتىلىپتى. ارينە, مۇنى ءبىز جامان دەپ وتىرعانىمىز جوق. سەبەبى, كەيبىر ازاماتتار تۇعىرنامامەن تانىسقان دا بولار. الايدا, بۇل سايلاۋالدى باعدارلاما باسىلىمداردا باسىلىپ, ءار جەردە, كەيبىر پارتيا اراسىندا تالقىعا ءتۇسىپ جاتقانعا ۇقسايدى. ءبىز مۇنداي اڭگىمەلەردى تىزگىندەگىمىز كەلەدى. سەبەبى, مۇنداي ارەكەتتەردى ورتالىق سايلاۋ كوميسسياسى, يا بولماسا بيلىك ۇگىت-ناسيحات جۇمىسى دەپ باعالاۋى مۇمكىن. وسى ورايدا مىنانى ءمالىمدەيمىز: ءبىز سايلاۋالدى تۇعىرنامامىز بەن باعدارلامامىزدى ادەيى تاراتقان جوقپىز. بۇل تۇعىرنامانى ءبىزدىڭ پارتيا اتىنان دەپۋتاتتىققا تۇسەتىن كانديداتتار ءۇشىن ۇگىت-ناسيحات جۇمىستارى باستالعان كەزدە عانا تاراتاتىن بولامىز, دەدى ۆ. كوسارەۆ.
ءبىز قازىرگى قوعامنىڭ تۇيتكىلدى ساۋالدارىنا قاراپايىم ادامداردىڭ مۇڭ-مۇقتاجىن ەسكەرە وتىرىپ جاۋاپ ىزدەۋگە ۇمتىلدىق. بىراق, باسقا ازاماتتار دا, ساياسي پارتيالار دا سايلاۋشىلاردىڭ ۇسىنىستارىن ەسكەرە وتىرىپ, وزدەرىنىڭ سايلاۋالدى تۇعىرناماسىندا ءبىز كوتەرىپ وتىرعان ماسەلەلەرگە ۇقساس يدەيالاردى العا تارتقان. ماسەلەن, الەۋمەتتىك سالاعا قاتىستى. سوندىقتان, ساياسي پارتيالار ءوزارا كەلىسىپ, وزدەرىنىڭ ساياسي ۇستانىمدارىن ايقىنداپ الۋى كەرەك. اركىم ءوز الاڭىن ايقىنداپ, سول جەردە جۇمىس ىستەۋى ءتيىس. ماسەلەن, ءبىز الەۋمەتتىك سالا بويىنشا جۇمىس اتقارىپ كەلەمىز. بولاشاقتا دا وسى الاڭدا جۇمىس اتقارعىمىز كەلەدى, سول سەبەپتى وزگەلەردىڭ ءبىزدىڭ الاڭعا باس سۇعىپ, ءبىزدىڭ ماسەلەلەرىمىزگە ارالاسۋلارىن قالامايمىز. بۇل رەتتە, قانداي دا ءبىر پارتيانىڭ اتىن اتاپ, ءتۇسىن تۇستەگەندى ءجون كورمەيمىز. ءبىز تەك ەسكەرتەمىز, دەدى ۆ.كوسارەۆ.
ال قكحپ حاتشىسى جامبىل احمەتبەكوۆ ءبىزدىڭ كوممۋنيستىك حالىقتىق پارتيا ءوزىنىڭ تۇعىرناماسىندا ەڭ الدىمەن الەۋمەتتىك ماسەلەلەردى نازاردا ۇستاعىسى كەلەدى. بۇل رەتتە, وزگە پارتيالار دا وزدەرىنىڭ بۇرىننان كەلە جاتقان يدەيالارىندا تۇرىپ, وزگەنىڭ الاڭىنا اۋىسپاسا ەكەن دەيمىز. سەبەبى, الەۋمەتتىك ماسەلەلەردى شەشۋ – ولاردىڭ تۇپكىلىكتى كوزدەگەن ماقساتى ەمەس. بۇل – تەك سايلاۋ الدىنداعى ۇپاي جيناۋدىڭ ءبىر كورىنىسى, دەدى.
جۋرناليستەردىڭ: «سىزدەردىڭ پارتيالارىڭىز الداعى پارلامەنت ءماجىلىسى سايلاۋىندا قانشا داۋىسقا يە بولادى دەپ ويلايسىزدار؟» دەگەن ساۋالىنا ۆ.كوسارەۆ: «ەگەر ونداي مۇمكىندىك بولسا, ءوزىم دە بىرەۋدەن سۇراپ الار ەدىم. بىراق, بۇرىنعى سايلاۋلارمەن سالىستىرعاندا جوعارى داۋىس جينايمىز عوي دەپ ويلايمىز. ءبىزدىڭ كوزدەگەن ماقساتىمىز دا وسى. پارتيادان سايلاۋعا ۇسىنىلعان 23 ازاماتتىڭ ارقايسىسى دەپۋتاتتىققا لايىق. اراسىندا 3 عىلىم دوكتورى, 6 جۇمىسشى, 6 ايەل ازاماتشا, 4 كاسىپكەر بار. سەزدە ولاردىڭ كانديداتۋرالارىن ەشبىر كەدەرگىسىز بەكىتتىك», دەپ جاۋاپ بەردى.
ءلايلا ەدىلقىزى.