لاتىن الىپبيىنە كوشۋ 2025 جىلدان باستالاتىندىعى بەلگىلى. بۇل سول كەزگە دەيىن بارلىق ءىس قاعازدارى, مەرزىمدى ءباسپاسوز جانە وقۋلىقتار لاتىن الىپبيىمەن باسىپ شىعارىلۋى ءتيىس. وسىعان وراي دايىندىق جۇمىستارى قازىردەن باستالىپ كەتتى.
كوكشەتاۋ قالاسىندا ج.مۋسين اتىنداعى جوعارى قازاق پەداگوگيكالىق كوللەدجىندە «لاتىن گرافيكاسىنا كوشۋ – وقۋشىلاردىڭ فۋنكتسيالىق ساۋاتتىلىعىن دامىتۋ قۇرالى» تاقىرىبىندا پراكتيكالىق سەمينار ءوتتى. وعان ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ عالىم-فيلولوگتارى, اتالعان كوللەدج ۇستازدارى جانە اقمولا وبلىسى مەكتەپتەرىنىڭ ءپان وقىتۋشىلارى قاتىستى. ەلباسى «بولاشاققا باعدار: رۋحاني جاڭعىرۋ» اتتى ماقالاسىندا لاتىن الىپبيىنە كوشۋ سەبەبىن قازىرگى زامانعى تەحنولوگيالىق ورتانىڭ, كوممۋنيكاتسيانىڭ, ءححى عاسىرداعى عىلىمي جانە ءبىلىم بەرۋ پروتسەسىنىڭ ەرەكشەلىكتەرىنە بايلانىستى ەكەندىگىمەن تۇسىندىرگەن بولاتىن. وسى تۇرعىدان كەلگەندە ۇستازدار قاۋىمى لاتىن گرافيكاسىنا ءوتۋدىڭ تەرەڭ لوگيكاسىنا ءۇڭىلىپ كوردى. اتاپ كورسەتكەندەي, لاتىن قارپىنە كوشۋ – قازاقستان ءۇشىن تاريحي قاجەتتىلىك, الەمدىك عىلىمي جانە تەحنولوگيالىق پروتسەستەرگە قوسىلۋدىڭ تاعى ءبىر مۇمكىندىگى.
ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ فيلولوگ عالىمدارىمەن بولعان پىكىر الماسۋ بارىسىندا ەل تاريحىنداعى وسىنداي ىرگەلى وقيعالاردىڭ ادىسنامالىق اسپەكتىلەرى جانە نەگىزگى مىندەتتەرى كەڭىنەن ءسوز بولدى. ەڭ باستىسى, پەداگوگتەر لاتىن گرافيكاسىنا كوشۋ جاعدايىندا تىلدەردى وقىتۋ ادىستەمەسىن ازىرلەۋدىڭ جانە الەمدىك اقپاراتتىق كەڭىستىككە شىعۋدىڭ نەگىزگى جولدارىمەن تانىستى. اسىرەسە قازىر الەمدە تىلدەردى جەڭىلدەتۋ ءۇشىن بارلىق جاعداي جاسالۋدا ەكەندىگى ەرەكشە اتالدى. ءتىپتى قازاق تىلىندە الەمنىڭ كەز كەلگەن نۇكتەسىندە تۇرىپ تا گادجەتتە جازۋعا مۇمكىندىك بار. قازىر زاماناۋي تەحنولوگيانىڭ دامىپ كەتكەنى سونداي, ونلاين رەجىمىندە كەز كەلگەن ماسەلەلەردى شەشە بەرۋ دە ەشقانداي قيىندىق تۋدىرمايدى. وسى تۇرعىدان كەلگەندە لاتىن گرافيكاسىنىڭ ارقاسىندا شەت تىلدەرىن جەڭىل يگەرۋگە ۇلكەن مۇمكىندىك تۋىپ وتىر. ونىڭ ۇستىنە الەمدەگى اقپاراتتاردىڭ 80 پايىزى لاتىن گرافيكاسىمەن تاراتىلاتىندىعى بەلگىلى. بۇل رەتتە جاستاردىڭ جاڭا تىلدەردى, ونىڭ ىشىندە اعىلشىن ءتىلىن مەڭگەرۋگە كوشۋى ماڭىزدى. جاستاردىڭ تىلدەردى ەركىن مەڭگەرۋى باعىتىندا ج.مۋسين اتىنداعى كوللەدج پەداگوگتەرى ارنايى ادىستەمەلىك ازىرلەگەندىگىن دە ايتا كەتۋ كەرەك. سونىمەن قاتار پەداگوگتەر لاتىن گرافيكاسىنا كوشۋ بويىنشا ستۋدەنتتەردى وقىتۋداعى جۇمىس تاجىريبەسىمەن دە الماستى.
اسقار تۇراپباي ۇلى, «ەگەمەن قازاقستان»
اقمولا وبلىسى