كەشە استاناداعى نازارباەۆ ۋنيۆەرسيتەتىندە وقۋ ورنى ستۋدەنتتەرىنىڭ قاتىسۋىمەن «جىر – سەمسەر, كۇي – قۇدىرەت, ولەڭ – ورنەك» اتتى قازاقتىڭ ءبىرتۋار قايراتكەر تۇلعالارى: ماحامبەت وتەمىس ۇلى, قۇرمانعازى ساعىرباي ۇلى جانە فاريزا وڭعارسىنوۆانى ەسكە الۋعا ارنالعان ادەبي-سازدى كەش ءوتتى. ءىس-شارا ەلباسىنىڭ «رۋحاني جاڭعىرۋ» باعدارلاماسى مەن استانانىڭ 20 جىلدىق مەرەيتويى اياسىندا ۇيىمداستىرىلدى.
2010 جىلى ىرگەسى قالانعان الەمدىك ستاندارتقا ساي ءبىلىم بەرەتىن ەلىمىزدەگى بىرەگەي جوعارى وقۋ ورنى – نازارباەۆ ۋنيۆەرسيتەتى جاستاردىڭ ساپالى ءبىلىم الۋىنا جاعداي جاساپ, ولاردىڭ بولاشاعىنا جارقىن جول اشۋدا ۇشان-تەڭىز جۇمىس اتقارىپ, تالاي يگى باستامالارعا مۇرىندىق بولىپ كەلەدى. سونىڭ ءبىرى – «رۋحاني جاڭعىرۋ» مادەني ورتالىعى. ۋنيۆەرسيتەتتە تەك جاراتىلىستانۋ مەن مەديتسينا باعىتىندا ءبىلىم الاتىن جاستاردى رۋحاني كەمەلدەندىرۋ, ۇلتىنىڭ تاريحى مەن تابيعاتىن تانۋدا, ءاربىر ستۋدەنتتى ۇلتجاندى ازامات ەتىپ تاربيەلەۋدە اتالمىش ورتالىقتىڭ بەرەر تاعىلىمى مول. ونىڭ ءبىر دالەلى – ءبىز تاماشالاعان «جىر – سەمسەر, كۇي – قۇدىرەت, ولەڭ – ورنەك» اتتى ادەبي-سازدى كەش.
– مەملەكەت باسشىسى نۇرسۇلتان نازارباەۆتىڭ «رۋحاني جاڭعىرۋ» ماقالاسىندا ەرەكشە اتالىپ وتكەن ماسەلە – ول ءوزىڭنىڭ تەگىڭ مەن تامىرىڭدى تانۋ, تاريحىڭا تاعزىم ەتىپ, سودان تاعىلىم الۋ. ادام قانشا ءبىلىمدى بولسا دا, ءوز ۇلتىنىڭ بولمىسى مەن ءتول تاريحىن بىلمەسە, ول ادامنىڭ ەلى ءۇشىن ەمىرەنىپ, وتانىنا جان جۇرەگىمەن قىزمەت ەتۋى مۇمكىن ەمەس. وسى سەبەپتى دە جاستارىمىزدى تەك جاراتىلىستانۋ سالاسىمەن عانا شەكتەمەي, رۋحاني كەمەلدەندىرۋگە, جان-جاقتى, ينتەللەكتۋال ادام بولىپ ەر جەتۋىنە بارىنشا باسىمدىق بەرىپ, سول ءۇشىن ايانباي جۇمىس ىستەپ جاتىرمىز. نازارباەۆ ۋنيۆەرسيتەتى ۇجىمىنىڭ باستى ۇستانىمى – وسى, – دەيدى جوبا جەتەكشىسى, نازارباەۆ ۋنيۆەرسيتەتى جانىنداعى «رۋحاني جاڭعىرۋ» مادەني ورتالىعىنىڭ ديرەكتورى گۇلتاس قۇرمانباي.
قازاق جانە اعىلشىن تىلىندە قاتار جۇرگىزىلگەن ادەبي-سازدى ونەر كەشىندە ستۋدەنتتەر جىر اتاسى – ماحامبەت وتەمىس ۇلى, كۇي اتاسى – قۇرمانعازى ساعىرباي ۇلى جانە پوەزيا پاتشايىمى – فاريزا وڭعارسىنوۆانىڭ ءومىر جولىن باياندايتىن تەاترلاندىرىلعان قىزىقتى قويىلىمدارىن كورەرمەن نازارىنا ۇسىندى. سونىمەن قاتار شىعارماشىلىق يەلەرىنىڭ ولەڭدەرىن ناقىشىنا كەلتىرە وقىپ, ماحامبەت پەن قۇرمانعازىنىڭ رۋحتى كۇيلەرىن كۇمبىرلەتە ورىندادى. ۋنيۆەرسيتەت ىشىنەن قۇرىلعان «NU» (Nazarbaev University) ۇلتتىق اسپاپتار وركەسترىنىڭ ورىنداۋىنداعى ماحامبەتتىڭ «جۇمىر قىلىش», قۇرمانعازىنىڭ «سارىارقا», «سەرپەر» كۇيلەرى كەشكە جينالعان قاۋىمنىڭ قۇلاق قۇرىشىن قاندىردى. پروفەسسور مارك لوۋرەنس پەن ۋنيۆەرسيتەتتىڭ العاشقى تۇلەگى نۇرسۇلتان ەسەنقۇلوۆتىڭ ورىنداۋىنداعى اقان سەرىنىڭ «بالقاديشا» ءانى دە كوپشىلىك كوڭىلىنەن شىعىپ, قوعام قايراتكەرى ورازكۇل اسانعازى, عالىم ايگۇل ىسماقوۆا جانە ۋنيۆەرسيتەتتىڭ پروفەسسورلىق قۇرامى باستاعان كورەرمەندەردىڭ ىستىق ىقىلاسىنا بولەندى. وسى ارقىلى نازارباەۆ ۋنيۆەرسيتەتى ستۋدەنتتەرى تەك عىلىم جولىندا عانا كوشباسشى ەمەس, ونەردى يگەرۋ مەن رۋحاني كەمەلدەنۋ تۇرعىسىندا باعىتىن ايقىنداعان بولاشاق ناعىز زيالى مامان ەكەندىگىن كورسەتتى.
ماحامبەت وتەمىس ۇلى, قۇرمانعازى ساعىرباي ۇلى جانە فاريزا وڭعارسىنوۆا شىعارماشىلىعىن بىرىكتىرەتىن ورتاق ءتىن – قازاقى رۋح دەسەك, سول وتانسۇيگىشتىك سەزىمدى بۇگىن كوزدەرىندە وت ويناپ, سوزدەرىنەن ۇشقىن اتقان جالىندى جاستاردىڭ دەمىنەن انىق سەزىندىك. ماماندىعىن جەتىك يگەرىپ قانا قويماي, ەلىنىڭ تاريحى مەن ۇلتىنىڭ بولمىسىن تانىپ, تالانتىنا تاعزىم ەتۋگە باعىتتالعان تالپىنىسىنا ءتانتى بولدىق.
نازەركە جۇماباي, «ەگەمەن قازاقستان»