ءماجىلىس توراعاسى نۇرلان نىعماتۋلين قىزىلجار وڭىرىنە جۇمىس ساپارمەن كەلىپ, بىرقاتار الەۋمەتتىك-وندىرىستىك نىسانداردى ارالادى. ەڭبەك ۇجىمدارىمەن كەزدەسىپ, «پرەزيدەنتتىڭ بەس الەۋمەتتىك باستاماسى» ۇندەۋىنەن تۋىندايتىن مىندەتتەردى ءتۇسىندىردى.
ءماجىلىس سپيكەرى الدىمەن س.كيروۆ اتىنداعى زاۋىتتا بولىپ, «تسيفرلىق قازاقستان» مەملەكەتتىك باعدارلاماسىنىڭ ورىندالۋ بارىسىمەن, وزىق تەحنولوگيالاردىڭ وندىرىسكە ەنگىزىلۋ جايىمەن تانىستى. الەۋەتتى ءوندىرىس وشاقتارى اراسىندا س. كيروۆ اتىنداعى زاۋىت جەتەكشى ورىنعا يە. مۇندا يندۋستريالاندىرۋ باعدارلاماسى تابىستى جۇرگىزىلىپ كەلەدى. زاماناۋي يننوۆاتسيالار كەڭىنەن قولدانىلادى. تسەحتاردى جاڭا قوندىرعىلارمەن جابدىقتاۋدىڭ ارقاسىندا ەڭبەك ونىمدىلىگى, ونىمدەردىڭ سانى دا, ساپاسى دا ارتتى. مەتالل شكافتار ءوندىرىسى جولعا قويىلدى.
ۇجىم مۇشەلەرىمەن اڭگىمە بارىسىندا بارىسىندا ن. نىعماتۋلين ءوندىرىستى جاڭعىرتۋدىڭ ماڭىزدىلىعىنا ايرىقشا توقتالىپ, پرەزيدەنت يننوۆاتسيالىق يندۋستريالاندىرۋدى جاڭا تەحنولوگيالاردىڭ كوشباسشىسىنا اينالدىرۋ مىندەتىن قويعانىن اتاپ كورسەتتى. جۇرتشىلىق نازارىنا ۇسىنىلعان الەۋمەتتىك باستامالار, باسپانالى بولۋدىڭ, سالىقتى ازايتىپ, جالاقىنى كوبەيتۋدىڭ, جاڭا تابىس كوزدەرىن اشۋدىڭ جاڭا مۇمكىندىكتەرىنە باستايتىنىن اڭگىمەلەدى.
ءماجىلىس توراعاسى ءوز سوزىنە وتباسىلىق بيۋدجەتىنىڭ مۇمكىندىكتەرى اياسىندا باسپانا ساتىپ الۋعا قاراستىرىلعان ارزان رەسۋرستار تەتىگى, سالىق جۇكتەمەسىن ازايتۋ ەسەبىنەن جالاقىسى تومەن جۇمىسشى-قىزمەتكەرلەردىڭ ەڭبەكاقىسىن كوبەيتۋ ماسەلەلەرىن كەڭىنەنە باياندادى. مەملەكەت باسشىسى جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ باعىتىندا ناقتى شارالار ۇسىندى. قازىر جىل سايىن بولىنەتىن 54 مىڭ گرانتقا قوسىمشا 20 مىڭ گرانت قوسىلىپ وتىر. ونىڭ جارتىسىنان استامى تەحنيكالىق ماماندىقتار بويىنشا باكالاۆرلىق ءبىلىم الۋعا باعىتتالادى. مۇنىڭ ءوزى حالىقارالىق ستاندارتتارعا لايىقتالعان ءبىلىم ساپاسىن ورنىقتىرۋمەن قاتار ءتورتىنشى رەۆوليۋتسيا جاعدايىنداعى زور سۇرانىسقا يە ماماندارمەن قامتاماسىز ەتۋگە ىنتالاندىرادى. سونىمەن قاتار ستۋدەنتتەردى جاتاقحانامەن قامتۋ تاپشىلىعى دا شەشىلەدى. ەلباسىنىڭ تاپسىرماسىمەن ۇكىمەت ارنايى جول كارتاسىن ازىرلەپ, باستامالاردى جۇزەگە اسىرۋدىڭ ناقتى قادامدارى بەلگىلەندى. سوعان سايكەس ورىنداۋ تەتىكتەرى مەن مەرزىمى ايقىندالىپ, جاۋاپتى مينيسترلىكتەر مەن قۇرىلىمدار ناقتى بەكىتىلدى, دەي كەلىپ ءماجىلىس سپيكەرى ساپالى قۇقىقتىق- نورماتيۆتىك بازاسىن قۇرۋ وسى سەسسيا جۇمىسىنىڭ نەگىزگى باسىمدىعىنا اينالاتىنىن, 15 شاقتى زاڭعا وزگەرىستەر مەن تولىقتىرۋلار ەنگىزىلەتىنىن, ولاردىڭ قاتارىندا ازاماتتىق, بيۋدجەتتىك, سالىق كودەكستەرى, بانك, تولەم تۋرالى زاڭنامالىق قۇجاتتار بارىن مالىمدەدى.
سپيكەر قىزىلجار اۋدانىنا قاراستى «پەتەرفەلد-اگرو» جشس-دە بولىپ, ونىڭ تىنىس-تىرشىلىگىمەن تانىستى. سەرىكتەستىك 2011 جىلدان بەرى ءىرى قارا مالىن وسىرۋمەن اينالىسىپ كەلەدى. ءسۇت فەرمالارىنا شەتەلدىك قوندىرعىلار ورناتىلعان. بارلىق جۇمىس پروتسەسى كومپيۋتەر ارقىلى اتقارىلادى. اسىل تۇقىمدى شارۋاشىلىق مارتەبەسىنە يە. وسىندا اۋىل شارۋاشىلىق تاۋارلارىن وندىرۋشىلەرمەن وتكەن جۇزدەسۋدە ەلباسىنىڭ الەۋمەتتىك باستامالارى نەگىزگى اڭگىمە وزەگىنە اينالىپ, سپيكەر دە, سويلەۋشىلەر دە اتاپ كورسەتكەندەي شاعىن نەسيە بەرۋدى كوبەيتۋ ارقىلى اۋىلدىق جەرلەردە كاسىپكەرلىكتى ورىستەتۋگە, جۇمىسسىزدىقتى ازايتۋعا, جاڭا جۇمىس ورىندارىن قۇرۋعا, ءوز ءىسىن اشاتىندارعا جان-جاقتى مۇمكىندىكتەر جاسالادى. شاعىن نەسيەلەردىڭ جالپى سوماسى 62 ميلليارد تەڭگەگە ۇلعايىپ, نەسيە الاتىنداردىڭ سانى 14 مىڭ ادامعا جەتەتىن بولادى. اتالعان الەۋمەتتىك جوبا اۋىلدىقتار ءۇشىن وتە ماڭىزدى. جيىندا اۋىل شارۋاشىلىعىنا تسيفرلىق تەحنولوگيانى ەنگىزۋ, استىق ءوندىرىسىن دامىتۋ, ونىمدىلىكتى ارتتىرۋ جايى دا كەڭىنەن ءسوز بولدى.
ن.نىعماتۋلين ەلباسىنىڭ الەۋمەتتىك باستامالارى ءاربىر وڭىرگە تىڭ سەرپىن بەرەتىنىن, حالىقتىڭ ءال-اۋقاتىن كوتەرۋگە زور ىقپال ەتەتىن اتاپ ءوتتى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى