ورتالىق كوممۋنيكاتسيالار قىزمەتىندە III ەۋرازيالىق كونگرەسستىڭ «قان تاپسىرۋدىڭ دامۋىنىڭ وزەكتى ماسەلەلەرى» تاقىرىبىندا ءباسپاسوز كونفەرەنتسياسى وتەدى.
جيىنعا دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين, رەسپۋبليكالىق ترانسفۋزيولوگيالىق عىلىمي وندىرىستىك-ورتالىعى مەديتسينالىق جۇمىس بويىنشا ديرەكتورىنىڭ ورىنباسارى شايجامال مۇسابەكوۆا, ورتالىق ازياداعى اۋرۋلاردى باقىلاۋ جانە الدىن الۋ جونىندەگى اقش ايماقتىق ورتالىعىنىڭ جيتس, ايتۆ جانە تۋبەركۋلەزگە قارسى كۇرەس ءبولىمىنىڭ وكىلى پەرري كيللام, قازاقستانداعى دسۇ وكىلى ولەگ چەستنوۆ قاتىستى.
«2011 جىلى قازاقستان رەسپۋبليكاسى ۇكىمەتىنىڭ قاۋلىسىمەن قۇرىلعان دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعى بۇگىنگى كۇنى ادىستەمەلىك ورتالىعى مەن قازاقستاننىڭ قان قىزمەتىن دامىتۋدىڭ ۇيلەستىرۋشىسى بولىپ تابىلادى. اتالعان كونگرەسس بارىسىندا «قازاقستاننىڭ قان قىزمەتىن رەفورمالاۋدىڭ قورىتىندىسى», «قان قىزمەتىنىڭ پروبلەمالىق سۇراقتارى» جانە تاعى باسقا تاقىرىپتار تالقىلاناتىن بولادى. ايتا كەتەتىن تاعى ءبىر جايت, مۇنداي جيىن استانادا العاش رەت وتكىزىلگەلى وتىر. شارا الەمدىك مەديتسينالىق قاۋىمداستىقتىڭ الدىندا ەلىمىزدىڭ ءيمميدجىن كوتەرۋدە اسا ماڭىزدى جانە قازاقستاندى مەديتسيناعا جوعارى تەحنولوگيالاردى ءتيىمدى ەنگىزەتىن الەۋمەتتىك باعدارلانعان مەملەكەت رەتىندە تانىتۋعا سەپتىگىن تيگىزەدى», دەپ اتاپ ءوتتى ج.بەكشين.
استاناداعى القالى جيىن 4-6 ءساۋىر ارالىعىندا وتەدى.
راۋان قايدار, «ەگەمەن قازاقستان»